Mətbuat Şurasının tədbirində media və məsuliyyət mövzusu müzakirə olunub

Bakı:

14 °C

62 %

12 m/s

Əlaqə

AZ RU EN

Ana səhifə / Sosial / Mətbuat Şurasının tədbirində media və məsuliyyət mövzusu müzakirə olunub

Mətbuat Şurasının tədbirində media və məsuliyyət mövzusu müzakirə olunub

21.11.2015 [10:26]

Noyabrın 20-də Beynəlxalq Mətbuat Mərkəzində Mətbuat Şurasının təşəbbüsü ilə “Media və məsuliyyət: mövcud durum və perspektiv məsələlərə baxış” mövzusunda tədbir keçirilib.
AZƏRTAC xəbər verir ki, tədbirdə informasiya agentliklərinin, qəzetlərin, internet xəbər saytlarının baş redaktorları, jurnalist təşkilatlarının təmsilçiləri, ictimaiyyət nümayəndələri iştirak ediblər.
Tədbirdə son günlər bəzi media orqanlarının, xüsusən də internet informasiya resurslarının bir sıra dövlət qurumları ilə bağlı məlumat və şərhlərinin cəmiyyətdə yaratdığı vəziyyət müzakirə olunub.
Mətbuat Şurasının sədri Əflatun Amaşov çıxış edərək deyib ki, mətbuat ölkə ictimaiyyətində baş verən proseslərə hər zaman xüsusi həssaslıqla yanaşır. Həm cəbhə bölgəsində baş verən hadisələri, həm Milli Məclisə keçirilən seçkiləri və digər hadisələri nəzərə alaraq görürük ki, media öz işini lazımi qaydada yerinə yetirir və həssaslıq nümayiş etdirir. Təəssüf ki, bəzi hallarda xəbərlər mənbələrə baxmadan, onu dəqiqləşdirmədən, sadəcə ajiotaj yaratmaq məqsədilə yayılır. Bu, heç də ürəkaçan deyil. Mətbuat Şurasının monitorinq qrupunun ekspertləri tərəfindən son vaxtlar ölkədə baş verən hadisələrlə bağlı bəzi kütləvi informasiya vasitələrində həqiqətə uyğun olmayan məlumatların yayılmasının səbəbləri araşdırılıb. Məlum olub ki, bəzi mətbuat orqanları araşdırmalar aparmadan, imic xatirinə məlumat yayırlar. Təəssüf ki, bəzi xəbər saytları şantaj, təqib yolunu tuturlar, həqiqətə uyğun olmayan məlumatlar yayırlar. Həmin media qurumları ilə bağlı hüquqi addımların atılması mümkün olsa da, indiyə qədər bundan istifadə edilməyib. Amma bu, o demək deyil ki, onlar yalan məlumatlar yaymalıdırlar.
Sonra çıxış edən “Azərbaycan” qəzetinin baş redaktoru Bəxtiyar Sadıqov, “APA Holdinq”in rəhbəri Vüsalə Mahirqızı, Mətbuat Şurasının sədr müavini, Jurnalistlərin Həmkarlar İttifaqının sədri Müşfiq Ələsgərli, “SƏS” Media Qrupunun rəhbəri Bəhruz Quliyev, “525-ci qəzet”in baş redaktoru Rəşad Məcid, “Xalq Cəbhəsi” qəzetinin baş redaktoru Elçin Mirzəbəyli, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli və başqaları yalan xəbər yayan mətbuat orqanlarına qarşı mübarizənin gücləndirilməsinin vacibliyini qeyd ediblər. Onlar bu cür əsassız xəbər yayanları məsuliyyətli olmağa, dövlətçilik mövqeyindən çıxış etməyə çağırıblar. Çıxışlarda bu məsələ ilə bağlı monitorinq qrupunun yaradılması təklifi irəli sürülüb. Vurğulanıb ki, yalan, əsassız məlumatlar yayan saytların fəaliyyətinin araşdırılması və bununla bağlı ictimaiyyətin məlumatlandırılması önəmlidir.

Paylaş:

Baxılıb: 730 dəfə