İşğaldan azad olunmuş ərazilərdə tarixi-mədəni irsin, multikultural dəyərlərin bərpası Azərbaycan dövlətinin diqqət mərkəzindədir

Bakı:

23 °C

68 %

1 m/s

AZ RU EN

Ana səhifə / Sosial / İşğaldan azad olunmuş ərazilərdə tarixi-mədəni irsin, multikultural dəyərlərin bərpası Azərbaycan dövlətinin diqqət mərkəzindədir

İşğaldan azad olunmuş ərazilərdə tarixi-mədəni irsin, multikultural dəyərlərin bərpası Azərbaycan dövlətinin diqqət mərkəzindədir

06.05.2021 [08:19]

Dünyada multikulturalizm məkanı və tolerantlıq nümunəsi sayılan Azərbaycanda ümumbəşəri dəyərlərə verilən qiymət hər zaman təqdirlə qarşılanır. Bununla yanaşı, ölkəmizdə hər zaman bütün dinlərə məxsus tarixi-dini abidələrin qorunması, onlara diqqət göstərilməsi aktuallıq daşıyıb. Vurğulanmalıdır ki, ermənilər tərəfindən dağıdılmış tarixi-mədəni irsimiz sayılan dini abidələrimiz 44 günlük müharibə nəticəsində torpaqlarımızın işğaldan azad edilməsindən sonra Prezident İlham Əliyevin xüsusi tapşırığı ilə bərpa edilməkdədir. Nəzərə alınmalıdır ki, ermənilər 30 ilə yaxın bir müddətdə Azərbaycanın dini-tarixi abidələrini, məscidləri təhqir etmişdilərsə, Azərbaycan dövləti bu məscidlərlə yanaşı, xristian dininə məxsus abidələri də bərpa edir, qoruyur. Şuşadakı kilsənin təmiri də bunun bariz nümunəsidir.
Məsələ ilə bağlı fikirlərini bölüşən Yeni Azərbaycan Partiyası (YAP) İdarə Heyətinin üzvü, Milli Məclisin deputatı Azər Badamov bildirib ki, Ermənistanın 30 ilə yaxın davam etmiş işğalçılıq siyasəti nəticəsində tarixi, dini, mədəni abidələrimiz dağıdılıb, bu abidələr erməni vandalizminin qurbanına çevrilib. Təcavüzkar dövlətin bu cür vandal əməllərə əl atmaqda əsas məqsədi isə xalqımızın minilliklər ərzində yaşadığı torpaqlarda həm tarixi keçmişimizi, həm də mənəvi yaddaşımızı məhv etmək olub: “Amma düşmənin bu cəhdi heç bir işə yaramadı. Azərbaycan dövləti öz torpaqları ilə yanaşı, tarixi abidələrimizi də düşməndən azad etdi. Prezident İlham Əliyevin və birinci xanım Mehriban Əliyevanın Cəbrayıl və Zəngilan rayonlarına son səfəri zamanı bu tarixi-mədəni abidələrimizin bərpası ilə bağlı məsələlər diqqət mərkəzində oldu. Bəlli olduğu kimi, Zəngilan məscidi Heydər Əliyev Fondu tərəfindən təmir olunacaq. Xüsusi vurğulamaq lazımdır ki, təmir-bərpa prosesi bütün dinlərə məxsus tarixi abidələrdə aparılır. Şuşadakı kilsənin bərpa edilməsi, Kəlbəcər rayonundakı qədim alban kilsələrinin qorunması bunun bariz nümunəsidir. Azərbaycan dövləti bu fəaliyyəti ilə bir daha multikultural dəyərlərə hörmət nümayiş etdirdiyini ortaya qoymaqdadır”.
Yeni Azərbaycan Partiyası İdarə Heyətinin üzvü, partiyanın Sumqayıt şəhər təşkilatının sədri Ramiz Hüseynov da Azərbaycan dövlətinin daim multikultural dəyərlərə hörmətlə yanaşdığını bildirib. O deyib ki, Heydər Əliyev Fondunun müxtəlif ölkələrdə tarixi-mədəni, dini obyektləri bərpa etməsi Azərbaycanın ümumbəşəri irsin qorunub saxlanılmasına dəyərli töhfəsidir.
“Ermənilərin işğal etdikləri ərazilərdə bütün mədəni, dini obyektləri dağıtması, təhqir etməsi cinayətdir. Bu gün Azərbaycan dövlətinin ermənilər tərəfindən dağıdılmış tarixi-mədəni abidələrimizi bərpa etməsi isə bəşəri dəyərlərə verdiyimiz qiymətin növbəti göstəricisidir. Ən əsası isə, bu bərpa prosesində heç bir ayrı-seçkiliyə yol verilmir və bütün dinlərə məxsus abidələr bərpa olunur. Bu fakt bir daha Azərbaycan dövlətinin multikultural dəyərlərə hörmətinin təcəssümüdür”, - deyə R.Hüseynov əlavə edib.
Pərviz SADAYOĞLU

Paylaş:

Baxılıb: 813 dəfə