Bankların qanunsuz “dollar oyunu”

Bakı:

21 °C

64 %

1 m/s

Əlaqə

AZ RU EN

Ana səhifə / Sosial / Bankların qanunsuz “dollar oyunu”

Bankların qanunsuz “dollar oyunu”

08.01.2022 [00:21]

“Qara bazar”da dollar qıtlığı nədən xəbər verir?

Nicat Dilqəmli

Son günlər cəmiyyətdə dolların satışının dayandırılması ilə bağlı məlumatlar yayılmaqdadır. Bəziləri iddia edirlər ki, banklarda ABŞ valyutasının satışı dayandırılıb. Bunu dolların qiymətinin artacağı ilə əlaqələndirənlər də var.

Bəs, reallıq nə deyir? Həqiqətən ölkədəki banklar dolların satışını dayandırıb?

Suallarımıza cavab tapmaq üçün paytaxtdakı bəzi banklara yollandıq. Əvvəlcədən bildirim ki, müraciət etdiyim banklara 17 min manatım olduğunu dedim. İndiki kursla bu qədər pula təxminən 9 min 985 dollar düşür.

Müraciət etdiyim banklarda aldığım cavablar eyni olmadı. Verilən müxtəlif cavabları oxucularımıza olduğu kimi təqdim edirik.

Günay bank (Sahil filialı): “Mən sizə maksimum 1000 dollar verə bilərəm. Daha çox məbləğ üçün Kapital və Beynəlxalq banklarına gedin...”

Elə həmin bank işçisinin məsləhətilə etmədik tənbəllik yollandıq Kapital Bankın 28 May filialına. Eyni sualla müraciət etmək istəyirdim ki, xanım sanki nə soruşacağımı bilirmiş kimi elə ağzımı açmamış “Dollar yoxdur...” dedi...

Unibank (Sahil filialı): “Bəli, satırıq. Növbə götürün, istədiyiniz məbləği sizə verək...”

Banklarla yanaşı, 28 May metro stansiyası yaxınlığındakı “qara bazar”a da yollandıq. Əllərində “Pul dəyişirəm...” deyə qışqırıb, müştəri çağıran valyuta dəyişənlərin bir neçəsinə yaxınlaşıb eyni sualla müraciət etdik.

Yan-yana dayanan iki nəfər pul dəyişən dayı: “Dollarımız yoxdur, qardaş!”

Bir az irəlidə yenə bir nəfər dayanmışdı, ümidlə yollandım onun yanına - başını bulayaraq eyni cavabı verdi.

Biz hazırda mövcud olan vəziyyəti olduğu kimi qələmə aldıq, kimsə dollar almaq istəyirsə, xeyirli olsun!

Necə deyərlər, başqa sözə nə hacət?

Məsələ ilə bağlı “Yeni Azərbaycan”a danışan deputat Vahid Əhmədov bildirib ki, Mərkəzi Bankın rəsmi məktubu yoxdursa, banklar özbaşına dolların satışını dayandırırsa, bu, qanuna ziddir: “Biz 2022-ci ilin dövlət büdcəsinin müzakirələrində bu məsələlərə toxunmuşuq. Mərkəzi Bankın İdarə Heyətinin sədri deyir ki, dolların bahalaşması üçün heç bir zəmin yoxdur. Neftin qiyməti çox yüksəkdir, 75-80 dollardır, o cümlədən ehtiyatımız da kifayət qədərdir. Yəni manatı istədikləri qədər bu səviyyədə qoruyub-saxlaya bilərlər”.

“Amma bunu uzun müddət saxlamaq qeyri-mümkündür. Ola bilər nə isə problem yarana bilər, elə olduğu halda hansısa dəyişiklik ola bilər. Biz dövlət büdcəsini müzakirə edəndə bu məsələlərə hər zaman baxırıq. Biz istəyirik ki, milli valyuta normal səviyyədə fəaliyyət göstərsin. Ona görə də mən hesab edirəm ki, dolların qiymətinin artmasına hələlik bir əsas yoxdur”, - deyə V.Əhmədov fikirlərinə əlavə edib.

Bildirmək istərdik ki, V.Əhmədovun məsələyə operativ reaksiyasının nəticəsi olaraq həm bizim olduğumuz, həm də digər banklarda yoxlanışa başlanıldı.

Paylaş:

Baxılıb: 916 dəfə