Su təsərrüfatı sahəsinin uzunmüddətli inkişaf istiqamətinin müəyyən edən mühüm sənəd

Bakı:

26 °C

63 %

11 m/s

Əlaqə

AZ RU EN

Ana səhifə / YAP xəbərləri / Su təsərrüfatı sahəsinin uzunmüddətli inkişaf istiqamətinin müəyyən edən mühüm sənəd

Su təsərrüfatı sahəsinin uzunmüddətli inkişaf istiqamətinin müəyyən edən mühüm sənəd

15.01.2026 [21:23]

Yanvarın 12-də Azərbaycan Respublikasının Prezidenti cənab İlham Əliyevin sədrliyi ilə “Bakı şəhərində və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair 2026–2035-ci illər üçün Dövlət Proqramı”na həsr olunmuş müşavirə keçirilib. Müşavirə paytaxt və Abşeron yarımadası üçün mühüm əhəmiyyət daşıyan su təsərrüfatı məsələlərinin kompleks və uzunmüddətli həllinə yönəlmiş strateji yanaşmanın təqdimatı baxımından xüsusi əhəmiyyət kəsb edir.

Möhtərəm Prezident cənab İlham Əliyev çıxışında su resurslarının səmərəli idarə olunmasının milli təhlükəsizlik, əhalinin rifahı və dayanıqlı inkişaf baxımından vacib olduğunu vurğulayıb. Dövlət başçısı qeyd edib ki, Bakı şəhərinin və Abşeron yarımadasının sürətlə artan əhalisi, urbanizasiya prosesləri, sənaye və xidmət sahələrinin genişlənməsi mövcud su infrastrukturuna düşən yükü əhəmiyyətli dərəcədə artırır. Bu baxımdan yeni Dövlət Proqramı müasir çağırışlara cavab verən sistemli və elmi əsaslara söykənən yanaşmanı nəzərdə tutur.

Çıxış zamanı son illərdə ölkə üzrə həyata keçirilmiş su və kanalizasiya layihələrinin müsbət nəticələri xatırladılıb, eyni zamanda mövcud problemlər açıq şəkildə təhlil edilib. Ölkə başçısı, xüsusilə yağış sularının idarə olunması sahəsində yaranan çətinliklərə diqqət çəkərək, güclü yağıntılar zamanı paytaxtda müşahidə olunan fəsadların aradan qaldırılması üçün müasir drenaj və kollektor sistemlərinin qurulmasının vacibliyini bildirib.

Dövlət Proqramının əsas məqsədləri sırasında içməli su təchizatının dayanıqlığının artırılması, tullantı sularının tam təmizlənərək ətraf mühitə zərərsiz şəkildə axıdılması, su itkilərinin minimuma endirilməsi və rəqəmsal idarəetmə mexanizmlərinin tətbiqi xüsusi yer tutur. Dövlət rəhbəri cənab İlham Əliyev aidiyyəti qurumlara proqramın icrasında koordinasiyalı fəaliyyətin təmin olunması, layihələrin mərhələli və vaxtında həyata keçirilməsi ilə bağlı konkret tapşırıqlar verib.

Müşavirədə, həmçinin vurğulanıb ki, 2026–2035-ci illəri əhatə edən Dövlət Proqramı təkcə infrastruktur layihəsi deyil, eyni zamanda sosial rifahın yüksəldilməsinə, şəhər mühitinin sağlamlaşdırılmasına və ekoloji tarazlığın qorunmasına xidmət edən strateji sənəddir. Bu proqramın icrası nəticəsində Bakı və Abşeron yarımadasında yaşayış keyfiyyətinin əhəmiyyətli dərəcədə yaxşılaşacağı gözlənilir.

Beləliklə, cənab Prezidentin rəhbərliyi ilə keçirilən müşavirə ölkənin su təsərrüfatı sahəsində uzunmüddətli inkişaf istiqamətlərini müəyyən edən mühüm siyasi və strateji addım kimi dəyərləndirilir.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 501 dəfə