Beynəlxalq etimadın təntənəsi

Bakı:

23 °C

68 %

2 m/s

Əlaqə

AZ RU EN

Ana səhifə / YAP xəbərləri / Beynəlxalq etimadın təntənəsi

Beynəlxalq etimadın təntənəsi

09.02.2026 [11:45]

“Şeyx Zayedin adını daşıyan bu mükafata layiq görülmək böyük şərəfdir” bu sözləri Azərbaycan Respublikasının Prezidenti Cənab İlham Əliyev fevralın 4-də Birləşmiş Ərəb Əmirliklərinin paytaxtı Əbu-Dabi şəhərində keçirilən “Zayed İnsan Qardaşlığı Mükafatı”nın təqdimat mərasimində səsləndirmişdir. Cənab Prezident çıxışında vurğulamışdır ki, “Birləşmiş Ərəb Əmirliklərinin banisi, mərhum Şeyx Zayedin adını daşıyan bu mükafata layiq görülmək mənim üçün böyük şərəfdir. O, elə bir böyük lider idi ki, onun uzaqgörənliyi və fəaliyyəti BƏƏ-ni dünyanın ən firavan və ən uğurlu ölkələrindən birinə çevirmişdir. Əziz qardaşım Şeyx Məhəmməd atasının inkişaf, tərəqqi və davamlı müasirləşmə siyasətini davam etdirir. Bu gün Birləşmiş Ərəb Əmirlikləri tarixi köklərinə möhkəm, bağlı qalmaqla yanaşı, gələcəyə də inamla baxan, sülh və ahəngdar şəraitdə yaşayan bir cəmiyyətin necə qurulması baxımından həqiqətən də bir çox ölkələr üçün nümunədir”.

2019-cu ildən etibarən təqdim olunan “Zayed İnsan Qardaşlığı Mükafatı” dünyada sülhün təşviqi, humanitar dəyərlərin qorunması, mədəniyyətlərarası dialoqun gücləndirilməsi və qarşılıqlı hörmət prinsiplərinin yayılmasına töhfə verən şəxslərə təqdim edilir. Bu mükafatın Azərbaycan Prezidentinə təqdim olunması ölkəmizin beynəlxalq aləmdə artan nüfuzunun, diplomatik fəaliyyətinin və qlobal əməkdaşlıq proseslərində aktiv iştirakının göstəricisi kimi qiymətləndirilə bilər. Bu, eyni zamanda Azərbaycanın həyata keçirdiyi daxili və xarici siyasətin beynəlxalq səviyyədə diqqətlə izlənildiyini və qiymətləndirildiyini göstərir.

Ölkədə siyasi sabitliyin qorunması, iqtisadi inkişafın təmin olunması, sosial layihələrin həyata keçirilməsi və beynəlxalq tərəfdaşlıqların genişləndirilməsi Azərbaycanın etibarlı tərəfdaş kimi qəbul edilməsinə zəmin yaratmışdır. Enerji, nəqliyyat, humanitar və təhlükəsizlik sahələrində qurulan əməkdaşlıq əlaqələri ölkənin regional və qlobal səviyyədə rolunu daha da möhkəmləndirmişdir. Bu mükafatın təqdim olunması həm də Azərbaycan ilə Birləşmiş Ərəb Əmirlikləri arasında dostluq münasibətlərinin inkişafının göstəricisidir və iki ölkə arasında siyasi, iqtisadi və mədəni əlaqələrin daha da genişlənməsinə stimul verir.

Son illərdə Azərbaycanın BMT, Avropa İttifaqı, İslam Əməkdaşlıq Təşkilatı və digər beynəlxalq qurumlarla əməkdaşlıq çərçivəsində müxtəlif təşəbbüslərlə çıxış etməsi ölkənin sülh və təhlükəsizlik məsələlərinə töhfə vermək niyyətini ortaya qoymuşdur. Multikulturalizm və tolerantlıq dəyərlərinin təşviqi də bu siyasətin əsas istiqamətlərindən biri kimi çıxış edir. Azərbaycan tarixən müxtəlif dinlərin və mədəniyyətlərin nümayəndələrinin birgə yaşadığı məkan olmuş, bu ənənə müasir dövrdə də qorunaraq dövlət siyasətinin mühüm komponentinə çevrilmişdir.

Mükafatın təqdim olunmasına təsir göstərən amillər sırasında regionda sülh təşəbbüsləri və sabitlik istiqamətində atılan addımlar da qeyd edilir. Uzun illər davam edən münaqişələrin ardından yaranan yeni geosiyasi reallıqlar bölgədə əməkdaşlıq və inkişaf üçün yeni imkanlar yaratmışdır. Aparılan siyasət nəticəsində Azərbaycanın ərazi bütövlüyünün təmin olunması və regionda yeni əməkdaşlıq perspektivlərinin formalaşması Cənubi Qafqazda sabitliyin möhkəmlənməsinə töhfə kimi qiymətləndirilir. Bu proseslər yalnız milli səviyyədə deyil, regional miqyasda da iqtisadi və siyasi əlaqələrin genişlənməsi üçün zəmin yaradır.

Beləliklə, “Zayed İnsan Qardaşlığı Mükafatı”nın Azərbaycan Respublikasının Prezidentinə təqdim olunması ölkənin sülhə, əməkdaşlığa və humanitar dəyərlərə verdiyi önəmin beynəlxalq səviyyədə tanınmasının ifadəsi kimi qəbul edilə bilər. Bu hadisə Azərbaycanın qlobal münasibətlər sistemində mövqeyini gücləndirir, yeni tərəfdaşlıqların qurulmasına imkan yaradır və ölkənin beynəlxalq platformalarda fəal iştirakının davamlı xarakter aldığını göstərir. Şeyx Zayedin adını daşıyan bu mükafata layiq görülmək həm simvolik, həm də siyasi baxımdan Azərbaycanın dünyada sülh, humanizm və qardaşlıq dəyərlərinin təşviqinə verdiyi töhfələrin təsdiqi kimi dəyərləndirilə bilər.

Həmidə Qoçəliyeva

YAP Naxçıvan şəhər təşkilatının fəalı

Paylaş:

Baxılıb: 862 dəfə