“4 gündən 44 günə” adlı inşa yazı müsabiqəsinin açılış mərasimi keçirilib

Bakı:

10 °C

87 %

6 m/s

Əlaqə

AZ RU EN

Ana səhifə / YAP xəbərləri / “4 gündən 44 günə” adlı inşa yazı müsabiqəsinin açılış mərasimi keçirilib

“4 gündən 44 günə” adlı inşa yazı müsabiqəsinin açılış mərasimi keçirilib

09.04.2026 [09:58]

Yeni Azərbaycan Partiyası Gəncə şəhər təşkilatının və Gəncə - Daşkəsən Regional Təhsil İdarəsinin birgə təşkilatçılığı ilə şəhərin orta ümumtəhsil məktəblərinin şagirdləri arasında “4 gündən 44 günə” adlı inşa yazı müsabiqəsinin açılış mərasimi keçirilib.

Açılış mərasimində YAP İdarə Heyətinin üzvü, millət vəkili Pərvin Kərimzadə, YAP İdarə Heyətinin üzvü, YAP Gəncə şəhər təşkilatının sədri Bayram Aslanov, Gəncə - Daşkəsən Regional Təhsil İdarəsinin rəisi Elçin Kərimov, YAP Gəncə şəhər təşkilatının əməkdaşları, partiya fəalları, müəllimlər və şagirdlər iştirak ediblər.

Ulu Öndər Heydər Əliyevin, Azərbaycanın azadlığı, istiqlaliyyəti və müstəqilliyi uğrunda, Qarabağ müharibəsi zamanı canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə YAP İdarə Heyətinin üzvü, YAP Gəncə şəhər təşkilatının sədri Bayram Aslanov açaraq, bildirib ki, 44 günlük Vətən müharibəsində əldə edilən Zəfər yalnız torpaqlarımızın azadlığı deyil, həm də şəhidlərimizin ruhuna olan böyük ehtiramın və xalqımızın milli qürurunun bərpasının təsdiqi oldu. Bu gün reallaşan “4 gündən 44 günə” adlı inşa yazı müsabiqəsi, eyni zamanda bu cür müsabiqələr, tədbirlər gənc nəslin tarixi yaddaşını möhkəmləndirir, onlarda dövlətçiliyə və milli dəyərlərə hörməti daha artırır.

YAP İdarə Heyətinin üzvü, millət vəkili Pərvin Kərimzadə çıxış edərək, bildirib ki, hər bir azərbaycanlının qəlbində yüksək qürur hissləri yaradan şanlı və tarixi qələbəmiz Azərbaycan xalqında milli oyanışa, yeni bir dirçəlişə, birliyə səbəb oldu. Bütün Azərbaycan xalqı Prezidentimizin ətrafında dəmir yumruq kimi birləşərək, sözün əsl mənasında, böyük xalq olduğunu bir daha sübut etdi və cəmiyyətimizdə mövcud olan Xalq-Lider-Ordu birliyini daha yüksək səviyyəyə qaldırdı.

“Müzəffər Ali Baş Komandan, möhtərəm Prezident cənab İlham Əliyevin rəhbərliyi ilə başlanan, Azərbaycan xalqının Vətən müharibəsinə çevrilən “Dəmir yumruq” əməliyyatında qazanılan zəfər tariximizə qızıl hərflərlə yazıldı. Rəşadətli Azərbaycan Ordusu cəmi 44 günə 30 illik ağrı-acıya, nisgilə, həsrətə son qoydu. Azərbaycan xalqı məğrur, dönməz və yenilməz xalq kimi tarixə düşdü!” – deyə Gəncə - Daşkəsən Regional Təhsil İdarəsinin rəisi Elçin Kərimov qeyd edib.

Şəhid Candar Cavadovun həyat yoldaşı Vüsalə Cavadova vurğuladı ki, Vətən müharibəsində xalqımız tarixində olmadığı dərəcədə yüksək birlik, həmrəylik nümayiş etdirdi, vahid amal uğrunda birləşdi. 44 gün davam edən savaş xalq-iqtidar birliyindən güc alan Azərbaycanın qüdrətinin, milli birliyinin sarsılmazlığının göstəricisi oldu. Azərbaycanın ərazi bütövlüyünü bərpa etdi, Vətən torpağı uğrunda şəhid olan bütün oğul-qızlarımızın qisası alındı.

Gəncə şəhər 37 saylı tam orta məktəbin 8-ci sinif şagirdi Aytac Qəhrəmanzadə çıxış edərək, dövlətimizin qətiyyəti, ordumuzun gücü, xalqımızın misilsiz dəstəyi sayəsində əldə olunan bu möhtəşəm qələbədən danışıb. O, qürurla vurğulayıb ki, tariximizin şanlı zəfəri gələcək nəsillərin xatirəsində əbədi yaşayacaq.

Yeni Azərbaycan Partiyasının Himni səsləndirilib.

Daha sonra şəhərin orta ümumtəhsil məktəblərinin 90 nəfər 7, 8 - ci sinif şagirdləri öz zehni qüvvələrini sınayaraq, Aprel döyüşlərində, 44 günlük Vətən müharibəsində Azərbaycan Ordusunun göstərdiyi qəhrəmanlıq, şəhidlərimizin fədakarlığı və qazandığımız tarixi qələbə barədə öz düşüncələrini qələmə alıblar.

“4 gündən 44 günə” adlı inşa yazı müsabiqəsinin yekununda qalib gələn şagirdlər mükafatlara layiq görüləcəklər.

Qeyd edək ki, inşa yazı müsabiqəsi gənc nəsildə vətənpərvərlik ruhunun gücləndirilməsi, ölkəmizin işğal altında olan ərazilərinin azad edilməsində Ali Baş Komandanımızın və ordumuzun əldə etdiyi uğurların təşviqinin aparılması, tarixi qələbə haqqında şagirdlərin məlumatlılıq səviyyəsinin artırılmasını təmin etmək və gənclərin bədii-yaradıcılıq bacarıqlarının üzə çıxarılması məqsədilə keçirilib.

Paylaş:

Baxılıb: 270 dəfə