Azərbaycan və İtaliya: Strateji Tərəfdaşlığın Üfüqləri

Bakı:

23 °C

83 %

8 m/s

Əlaqə

AZ RU EN

Ana səhifə / YAP xəbərləri / Azərbaycan və İtaliya: Strateji Tərəfdaşlığın Üfüqləri

Azərbaycan və İtaliya: Strateji Tərəfdaşlığın Üfüqləri

07.05.2026 [11:04]

Azərbaycan Respublikasının xarici siyasətində Avropa ölkələri ilə münasibətlər mühüm yer tutur. Bu kontekstdə İtaliya Respublikası Azərbaycanın ən yaxın və etibarlı strateji tərəfdaşlarından biri kimi çıxış edir. İki ölkə arasındakı əlaqələr yalnız enerji təhlükəsizliyi sahəsini deyil, siyasi, iqtisadi və humanitar istiqamətləri də əhatə edən dərin və çoxşaxəli əməkdaşlıq modeli formalaşdırmışdır.

Azərbaycan ilə İtaliya arasında münasibətlərin hüquqi bazası kifayət qədər möhkəmdir. 2014-cü ildə imzalanmış “Azərbaycan Respublikası və İtaliya Respublikası arasında Strateji tərəfdaşlıq haqqında Birgə Bəyannamə” və 2020-ci ildə Romada qəbul olunmuş “Azərbaycan Respublikası və İtaliya Respublikası arasında Çoxölçülü Strateji Tərəfdaşlığın gücləndirilməsinə dair Birgə Bəyannamə” münasibətlərin gələcək inkişaf istiqamətlərini müəyyən etmişdir. Dövlət başçıları və digər yüksək səviyyəli rəsmilər arasında qarşılıqlı səfərlər və görüşlər iki ölkə arasında mövcud olan siyasi etimadın bariz nümunəsidir.

İtaliya uzun illərdir Azərbaycanın əsas ticarət tərəfdaşlarından biri hesab olunur. Bu əməkdaşlığın əsasını enerji sektoru təşkil edir. Cənub Qaz Dəhlizinin mühüm hissəsi olan TAP (Trans-Adriatik Boru Kəməri) vasitəsilə Azərbaycan təbii qazının İtaliya bazarına nəqli həm İtaliyanın, həm də bütövlükdə Avropanın enerji təhlükəsizliyinə əhəmiyyətli töhfə verir.

Bununla yanaşı, iki ölkə arasında əməkdaşlıq yalnız neft-qaz sahəsi ilə məhdudlaşmır.

Qeyri-neft sektorunda kənd təsərrüfatı, toxuculuq, moda və dizayn sahələrində İtaliya təcrübəsindən geniş istifadə olunur. Eyni zamanda, İtaliya şirkətləri Azərbaycanın işğaldan azad edilmiş ərazilərində həyata keçirilən yenidənqurma və bərpa layihələrində, eləcə də müasir şəhərsalma prosesində fəal iştirak edirlər.

Təhsil sahəsində əməkdaşlıq da xüsusi əhəmiyyət daşıyır. Bakıda fəaliyyət göstərən İtaliya–Azərbaycan Universiteti iki ölkə arasında akademik əlaqələrin inkişafına və yüksək ixtisaslı kadrların hazırlanmasına xidmət edir.

Azərbaycan və İtaliyanı birləşdirən mühüm istiqamətlərdən biri də mədəni-humanitar əməkdaşlıqdır. Heydər Əliyev Fondu tərəfindən İtaliyada həyata keçirilən tarixi abidələrin bərpası layihələri, o cümlədən “Villa Maraini” kompleksi və Müqəddəs Marçellinio və Pietro katakombalarının bərpası Azərbaycanın multikultural dəyərlərinin və mədəni irsə verdiyi önəmin təbliğinə töhfə verir. Digər tərəfdən, İtaliya incəsənəti, operası və memarlığı Azərbaycan cəmiyyətində daim böyük maraq və rəğbətlə qarşılanır.

Bu gün Azərbaycan ilə İtaliya arasındakı münasibətlər yalnız iki dövlətin milli maraqlarına xidmət etmir, həm də regionda sabitliyin, enerji təhlükəsizliyinin və çoxtərəfli əməkdaşlığın möhkəmlənməsində mühüm rol oynayır. Qarşılıqlı hörmət və tərəfdaşlıq prinsiplərinə əsaslanan bu əlaqələr dinamik şəkildə inkişaf edir və gələcəkdə daha da genişlənəcəyi gözlənilir.

Xüsusilə, 4 may 2026-cı il tarixində həyata keçirilmiş yüksək səviyyəli rəsmi səfər və səsləndirilmiş bəyanatlar bir daha göstərdi ki, Azərbaycan–İtaliya strateji tərəfdaşlığı yeni və daha dinamik inkişaf mərhələsinə qədəm qoyur.

Arif Qasımov

YAP Sədərək rayon təşkilatının sədri

Paylaş:

Baxılıb: 463 dəfə