Enerji təhlükəsizliyində Azərbaycan modeli

Bakı:

21 °C

50 %

6 m/s

Əlaqə

AZ RU EN

Ana səhifə / YAP xəbərləri / Enerji təhlükəsizliyində Azərbaycan modeli

Enerji təhlükəsizliyində Azərbaycan modeli

03.06.2026 [11:35]

Bu gün dünya iqtisadiyyatının və sənayesinin hərəkətverici qüvvəsi olan faydalı qazıntılar bəzi hallarda birtərəfli yanaşmaların və əsassız ittihamların hədəfinə çevrilir. Lakin real dünya reallıqları və praqmatik yanaşma diktə edir ki, bəşəriyyətin mövcud mərhələdə ənənəvi enerji resursları olmadan tam fəaliyyət göstərməsi qeyri-mümkündür. Təbii sərvətlərə sahib olmaq hər hansı bir dövlətin günahı deyil, əksinə, bu, xalqların rifahı və müstəqilliyi üçün təbiətin bəxş etdiyi strateji bir imkandır.

Bakı Enerji Həftəsi çərçivəsində keçirilən mötəbər tədbirlərin rəsmi açılış mərasimində çıxış edən Prezident İlham Əliyev bu məsələyə toxunaraq olduqca mühüm bir reallığı diqqətə çatdırmışdır. Dövlət Başçısı haqlı olaraq vurğuladı ki, uzun illər neft və qaz hasilatı ilə məşğul olan ölkələr və şirkətlər əsassız olaraq qarayaxma obyektinə çevrilir, planetin dağıdılmasında ittiham olunurdular. Lakin dünya faydalı qazıntı olmadan yaşaya bilməz.

Prezident İlham Əliyevin qeyd etdiyi kimi, praqmatik olmalı, enerji təhlükəsizliyini təmin etməklə və bərpaolunan enerjiyə sərmayə yatırmaqla gələcəyimizi düzgün planlaşdırmalıyıq. Ölkələr sahib olduqları təbii resurslara görə deyil, bu resurslardan əldə etdikləri gəlirləri necə istifadə etdiklərinə görə mühakimə olunmalıdır.

Azərbaycan müstəqilliyinin ilk illərindən etibarən bu imkandan maksimum dərəcədə səmərəli istifadə edən, milli maraqları beynəlxalq tərəfdaşlıqla uğurla uzlaşdıran nadir ölkələrdən biridir. Müstəqilliyin bərpasının ilkin dövrlərində üzləşdiyimiz iqtisadi böhran, daxili sabitliyin pozulması və geosiyasi təzyiqlər fonunda neft və qaz resursları Azərbaycan üçün bir dövlət kimi ayaqda qalmağın, suverenliyi qorumağın yeganə və ən etibarlı yolu oldu. Həyata keçirilən müdrik və uzaqgörən enerji strategiyası ölkəni qısa müddətdə regional liderə və qlobal enerji bazarının etibarlı tərəfdaşına çevirdi.

Prezident İlham Əliyevin rəhbərliyi ilə Azərbaycan xalqın rifahının yüksəldilməsində və yaşıl gündəlik məsələlərində çox bariz bir nümunə ortaya qoymuşdur. Müasir dövrün çağırışlarına cavab olaraq, Azərbaycan bu gün həm də yaşıl enerji keçidinin ön sıralarında qərarlaşıb. Ənənəvi enerji növlərindən qazanılan iqtisadi güc indi bərpaolunan enerji mənbələrinin yaradılmasına və ekoloji layihələrin maliyyələşdirilməsinə yönəldilir. Ölkəmiz beynəlxalq investisiyalara tam açıq olmaqla yanaşı, həm də qlobal iqlim dəyişikliyi ilə mübarizəyə öz praktiki töhfəsini verir. Bu yanaşma sübut edir ki, əsl uğur birtərəfli ideoloji şüarlarla deyil, praqmatik, real hədəflərə söykənən və gələcəyi düzgün planlaşdıran strategiya ilə qazanılır. Bakı Enerji Həftəsində bəyan edildiyi kimi, milli maraqlara əsaslanan müdrik siyasət və beynəlxalq tərəfdaşlıq ölkəmizin dayanıqlı gələcəyinin əsas qarantıdır.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 85 dəfə