Laçın – Qayıdışın ünvanı

Bakı:

26 °C

83 %

10 m/s

Əlaqə

AZ RU EN

Ana səhifə / YAP xəbərləri / Laçın – Qayıdışın ünvanı

Laçın – Qayıdışın ünvanı

26.08.2026 [13:47]

Bəzi şəhərlər var ki, onların adı çəkiləndə yalnız bir coğrafi məkan deyil, bütöv bir tarix göz önündə canlanır. Laçın da belə şəhərlərdəndir. Onun adı illərlə həsrət, ayrılıq və doğma yurda qayıdış arzusu ilə yanaşı çəkildi. Bu gün isə Laçın artıq həsrətin deyil, Zəfərin və Böyük Qayıdışın ünvanıdır.
1992-ci ilin mayında Laçının işğal olunması minlərlə insanın həyatını dəyişdi. Laçınlılar doğma evlərindən, küçələrindən, torpaqlarından ayrı düşdülər. Lakin illər keçsə də, doğma yurda bağlılıq heç vaxt itmədi. Laçın yaddaşlarda yaşadı, xatirələrdə qorundu və qayıdış ümidi nəsildən-nəslə ötürüldü.
2020-ci il Azərbaycanın şanlı tarixində yeni səhifə açdı. 44 günlük Vətən müharibəsində əldə edilən Zəfər işğal altında olan torpaqlarımızın azadlığına yol açdı. Dekabrın 1-də Laçın rayonunun Azərbaycana qaytarılması ilə uzun illər davam edən həsrətin sonuna doğru mühüm addım atıldı. 2022-ci il avqustun 26-da isə Laçın şəhəri, Zabux və Sus kəndləri Azərbaycanın tam nəzarətinə keçdi. Bu tarix Laçının yeni həyatının başlanğıcı oldu.
Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə azad edilmiş ərazilərdə genişmiqyaslı bərpa və quruculuq işlərinə başlanıldı. Laçında da bu proses xüsusi sürətlə həyata keçirildi. Dağıdılmış və viran qoyulmuş şəhərin yerində müasir, rahat və ekoloji baxımdan nümunəvi yaşayış məkanı yaradılmağa başladı. Yeni yollar çəkildi, kommunikasiya xətləri yeniləndi, yaşayış binaları və sosial obyektlər inşa edildi. Şəhərin təbii simasının qorunmasına xüsusi diqqət yetirildi.
Lakin Laçının dirçəlişinin ən böyük göstəricisi tikilən binalar deyil, qayıdan insanlardır. 2023-cü ilin mayından etibarən laçınlıların doğma şəhərinə qayıdışı başladı. İllər sonra öz evinə dönən insanların yaşadığı sevinc sözlə ifadə olunmayacaq qədər böyük idi. Çünki insan üçün doğulduğu, uşaqlığının keçdiyi torpağa qayıtmaq sadəcə bir ünvanı dəyişmək deyil, həyatının itirilmiş bir parçasına qovuşmaqdır.
Bu gün Laçında həyat yenidən öz axarına düşür. Küçələrdə insanlar gəzir, uşaqlar məktəbə gedir, yeni evlərdə ailələrin ocaqları yanır. Bir vaxtlar yalnız xatirələrdə yaşayan Laçın indi real həyatın içində yenidən qurulur.
Laçının gələcəyi də böyük ümidlər vəd edir. Rayonun zəngin təbiəti, dağları, meşələri, çayları və bulaqları turizm üçün geniş imkanlar yaradır. Yeni nəqliyyat infrastrukturu, Laçın Beynəlxalq Hava Limanı və həyata keçirilən digər layihələr şəhərin iqtisadi və turizm potensialının daha da artırılmasına xidmət edir.
Laçının bugünkü mənzərəsi Azərbaycanın Zəfərinin yalnız hərbi qələbədən ibarət olmadığını göstərir. Əsl Zəfər torpağın azad edilməsindən sonra orada yenidən həyat yaratmaqdır. Dağıdılmış evlərin yerində yeni evlər tikmək, məktəbləri yenidən açmaq, yollar salmaq, insanları doğma yurdlarına qaytarmaq və gələcək nəsillər üçün təhlükəsiz, firavan həyat qurmaqdır.
Laçın bu gün Azərbaycanın Zəfərdən Böyük Qayıdışa gedən yolunun canlı salnaməsidir. Burada hər yeni tikili, hər abad küçə, hər qayıdan ailə tariximizin yeni bir səhifəsini yazır.
Laçın illərlə həsrətlə gözlədi. Bu gün isə o, öz sakinlərini qucaq açaraq qarşılayır.
Laçın artıq qayıdışın deyil, qayıdışın gerçəkləşdiyi torpağın adıdır.

Bəhruz Ramazanov- YAP Qusar rayon təşkilatının məsləhətçisi

Paylaş:

Baxılıb: 49 dəfə