YAP Abşeron rayon təşkilatı Gənclər Birliyinin V hesabat-seçki konfransı keçirilib

Bakı:

26 °C

53 %

4 m/s

Əlaqə

AZ RU EN

Ana səhifə / YAP xəbərləri / YAP Abşeron rayon təşkilatı Gənclər Birliyinin V hesabat-seçki konfransı keçirilib

YAP Abşeron rayon təşkilatı Gənclər Birliyinin V hesabat-seçki konfransı keçirilib

04.04.2019 [09:42]

Yeni Azərbaycan Partiyası (YAP) Abşeron rayon təşkilatı Gənclər Birliyinin V hesabat-seçki konfransı keçirilib.
Konfransda Abşeron rayon İcra Hakimiyyətinin başçısı İradə Gülməmmədova, Milli Məclisin deputatı Mirzəcan Xəlilov və digər qonaqlar iştirak ediblər.
Konfrans iştirakçıları əvvəlcə partiyanın qurucusu, Ulu Öndər Heydər Əliyevin abidəsi önünə gül dəstələri düzərək, əziz xatirəsini ehtiramla yad ediblər.
Tədbirdə giriş nitqi söyləyən YAP Abşeron rayon təşkilatının sədri Bilman Vəliyev konfransın gündəliyi haqqında məlumat verib.
Sonra Bilman Vəliyev bildirib ki, yarandığı gündən YAP Abşeron rayon təşkilatı mühüm inkişaf yolu keçib, üzvlərinin və ərazi təşkilatlarının sayı əhəmiyyətli dərəcədə artıb. Abşeron rayonunda əhalinin YAP-a axını, ilk ərazi partiya təşkilatlarının yaradılması Ulu Öndər Heydər Əliyevin əsasını qoyduğu siyasi kursa və Onun layiqli davamçısı, Prezident İlham Əliyevə inamdan irəli gəlir. O həmçinin ölkəmizdə layiqincə həyata keçirilən dövlət gənclər siyasəti və bu siyasətin uğurlu bəhrələrindən də danışıb.
YAP Abşeron rayon təşkilatı Gənclər Birliyinin sədr müavini Rəşad Baxşaliyev hesabat məruzəsi ilə çıxış edib. O, birliyin təşəbbüsü ilə ötən illərdə görülən işlər, həyata keçirilən tədbirlər haqqında ətraflı məlumat verib.
Sonra hesabat ətrafında çıxışlar olub.
Çıxış edən YAP Abşeron rayon təşkilatı Qadınlar Şurasının sədri Təyyubə Hüseynova, Bakı Mühəndislik Universitetinin tələbəsi Elnur Mirzəyev, Bakı Dövlət İqtisadiyyat və Humanitar Kollecinin direktor müavini Gəray Gəraylı əvvəlki konfransdan ötən müddət ərzində görülmüş işlərə dair hesabatı qənaətbəxş hesab etdiklərini bildirib və gənclərin fəaliyyətini yüksək qiymətləndiriblər.
Sonra təşkilati işlərə baxılıb, YAP Abşeron rayon təşkilatı Gənclər Birliyinin Şura və İdarə Heyətinə üzvlər seçilib.
Konfrans iştirakçılarının yekdil səsverməsinə əsasən Bakı Mühəndislik Universitetinin tələbəsi Elnur Mirzəyev YAP Abşeron rayon təşkilatı Gənclər Birliyinin sədri, 17 nəfərdən ibarət İdarə Heyəti seçiliblər.
Sonra çıxış edən YAP Abşeron rayon təşkilatı Gənclər Birliyinin sədri Elnur Mirzəyev göstərilən etimada görə partiya rəhbərliyinə və gənclərə minnətdarlığını bildirib. O deyib ki, YAP Abşeron rayon təşkilatı Gənclər Birliyi bundan sonra da rayonun və respublikanın ictimai-siyasi, sosial-mədəni həyatında aktiv olacaq, veriləcək tapşırıqları vaxtında və effektiv yerinə yetirəcəkdir.
Sonra Milli Məclisin deputatı Mirzəcan Xəlilov çıxış edərək gənclərə gələcək fəaliyyətlərində uğurlar arzulayıb. O bildirib ki, Prezident İlham Əliyev Azərbaycan gəncliyinin inkişafı üçün bütün imkanları yaradıb: “Gənclərimiz ölkəmizi beynəlxalq aləmdə layiqincə təmsil edir, Azərbaycanla bağlı həqiqətlərin dünya ictimaiyyətinə çatdırılmasında, mədəni-mənəvi irsimizin təbliğ olunmasında fəallıq nümayiş etdirirlər”.
Abşeron rayon İcra Hakimiyyətinin başçısı İradə Gülməmmədova rəhbərlik etdiyi rayonun həyatında gənclərin fəal iştirak etdiyini diqqətə çatdırıb. O qeyd edib ki, rayon rəhbərliyi gənclərin bütün təşəbbüslərinə dəstək verir və bundan sonra da dəstək verəcək.

Paylaş:

Baxılıb: 793 dəfə