YAP Gənclər Birliyi ilə Gənclər və İdman Nazirliyi arasında qarşılıqlı əməkdaşlığa dair görüş keçirilib

Bakı:

12 °C

76 %

8 m/s

AZ RU EN

Ana səhifə / YAP xəbərləri / YAP Gənclər Birliyi ilə Gənclər və İdman Nazirliyi arasında qarşılıqlı əməkdaşlığa dair görüş keçirilib

YAP Gənclər Birliyi ilə Gənclər və İdman Nazirliyi arasında qarşılıqlı əməkdaşlığa dair görüş keçirilib

20.03.2021 [09:18]

Martın 19-da Yeni Azərbaycan Partiyası Gənclər Birliyi ilə Gənclər və İdman Nazirliyi arasında qarşılıqlı əməkdaşlığa dair videoformatda görüş keçirilib.

Görüşdə çıxış edən Gənclər və İdman nazirinin müavini İntiqam Babayev YAP Gənclər Birliyinin yeni heyətini təbrik edib. O, gənclərin göstərilən yüksək etimadı layiqincə doğruldacağına inandığını bildirib. Nazir müavini qeyd edib ki, Ulu Öndər Heydər Əliyevin yaradıcısı olduğu Yeni Azərbaycan Partiyası bu gün Prezident İlham Əliyevin rəhbərliyi ilə böyük uğurlar qazanır. Prezident İlham Əliyevin partiyanın VII qurultayında proqram xarakterli çıxış etdiyini deyən İ.Babayevin sözlərinə görə, ötən illər ərzində ölkəmiz böyük inkişaf yolu keçib, güclü dövlətə çevrilib, beynəlxalq müstəvidə mövqeləri əhəmiyyətli dərəcədə möhkəmlənib. Ən mühüm hadisə isə ötən il 44 günlük Vətən müharibəsi nəticəsində torpaqlarımızın işğaldan azad olunması, ölkəmizin ərazi bütövlüyünün təmin edilməsidir. Ali Baş Komandanımızın rəhbərliyi ilə rəşadətli Azərbaycan Ordusu bu tarixi missiyanı şərəflə yerinə yetirdi. Bu missiyada da əsas yük dövlətimizin başçısının dediyi kimi, gənc nəslin üzərinə düşdü. Müharibədə qəhrəman Azərbaycan gəncləri ön cəbhədə mətanətlə döyüşdülər. Arxa cəbhədə olan gənclərimiz isə sosial şəbəkələrdə və digər sahələrdə informasiya müharibəsində fəal iştirak edərək böyük qələbəyə öz töhfələrini verdilər.

Qarabağın quruculuq işlərinə gənclərin cəlb edilməsi məsələsinə toxunan İ.Babayev deyib ki, dövlətimizin başçısının müvafiq sərəncamlarına uyğun olaraq, geniş miqyaslı tədbirlər planı hazırlanır. Aidiyyəti üzrə müvafiq dövlət qurumlarının qarşısına vəzifələr qoyulub. Qarabağın dirçəldilməsi istiqamətində gənclərimiz Prezidentin çağırışlarına hazırdırlar və quruculuq prosesində iştirak etmək arzusundadırlar.

Nazir müavini söyləyib ki, YAP Gənclər Birliyi ölkəmizin ən böyük gənclər təşkilatıdır. YAP-da 270 mindən çox gənc birləşib. Bu baxımdan, təşkilatın potensialı çox böyükdür. Gənclər və İdman Nazirliyi bundan sonra da YAP Gənclər Birliyi ilə fəal əməkdaşlıq edəcək.

Qarabağda gənclərlə bağlı müxtəlif layihələrin həyata keçirilməsinin nəzərdə tutulduğunu deyən İ.Babayev bu layihələrdə YAP-ın gənc üzvlərinin də fəal iştirak edəcəyinə inandığını söyləyib.

Çıxış edən YAP Gənclər Birliyinin sədri Bəxtiyar İslamov bildirib ki, rəhbərlik etdiyi təşkilat qarşıya qoyulan vəzifələrin uğurla yerinə yetirilməsi üçün bütün qüvvəsini səfərbər edəcək. Onun sözlərinə görə, YAP-ın VII qurultayında partiyamızın sədri, Prezident İlham Əliyev gənclərə müvafiq tövsiyə və tapşırıqlarını verib. Bu baxımdan, gənclər milli tarixi köklərə bağlı olmaqla, yeni, müasir və innovativ fəaliyyət əsasında öz işlərini quracaqlar.

Vətən müharibəsinin tarixi qələbə ilə başa çatdığını deyən B.İslamovun sözlərinə görə, bu qələbədə gənclər mühüm rol oynadı. Çünki ordunun əsasını gənclər təşkil edir. YAP Gənclər Birliyinin sədri qeyd edib ki, işğaldan azad olunmuş ərazilərlə, Böyük Qayıdışla bağlı məsələlərdə rəhbərlik etdiyi təşkilat üzərinə düşən müssiyanı uğurla yerinə yetirilməsi üçün bütün imkanlarını səfərbər edəcək. Bütövlükdə, gələcək fəaliyyətlə əlaqədar YAP Gənclər Birliyi müxtəlif layihələr və proqram üzərində işləyir. Təşkilatın əsas hədəflərindən biri öz fəaliyyətində təkcə partiya üzvü olan gəncləri deyil, bütün Azərbaycan gənclərini də əhatə etməkdir.

B.İslamov YAP Gənclər Birliyinin Gənclər və İdman Nazirliyi ilə fəal əməkdaşlığın davam etdirilməsinə maraqlı olduğunu da diqqətə çatdırıb.

Tədbirdə həmçinin, YAP Gənclər Birliyinin üzvlərindən Milli Məclisin deputatı Cəbi Quliyev, Anastasia Lavrina, Fərid Sadıqlı və Nihad Allahyarlı çıxış edərək təşkilatın gələcək fəaliyyəti, eləcə də qarşılıqlı əməkdaşlıqla bağlı fikir və təkliflərini səsləndiriblər.

Paylaş:

Baxılıb: 624 dəfə