Baş verən cinayətə görə İran dövləti də məsuliyyət daşıyır

Bakı:

25 °C

66 %

4 m/s

Əlaqə

AZ RU EN

Ana səhifə / YAP xəbərləri / Baş verən cinayətə görə İran dövləti də məsuliyyət daşıyır

Baş verən cinayətə görə İran dövləti də məsuliyyət daşıyır

28.01.2023 [12:36]

Xeyli müddətdir ki, İranda həm rəsmi şəxslər, həm də hakimiyyətin ayrı-ayrı qolları tərəfindən Azərbaycan əleyhinə təbliğat aparılır. Rəsmi Tehranın bu mövqeyi nəticəsində qarşılıqlı münasibətlərimizdə soyuqluq yaranıb. Bütün bunların ardınca Tehrandakı səfirliyimizə ölümlə nəticələnən hücum iki ölkə arasında münasibətlərin daha da gərginləşməsinə yönəlmiş addımdır. Azərbaycanın regionumuzda,eləcə də dünyada güclənən mövqeyi İranı da narahat edir. Buna görə də, rəsmi Tehran dövlətimizin bölgədəki sülh və əməkdaşlıq təşəbbüslərinə əngəl olmağa çalışır. Bütün bunların fonunda Tehrandakı səfirliyimizə hücum edilməsi ciddi suallar doğurur. Çünki bu adi hücum yox, terror hadisəsidir. Hadisəyə İranın dövlət səviyyəsində mövqeyi isə təəssüf və hiddət doğurur. Çünki məsuliyyətdən yayınmaq məqsədi güdən molla rejimi baş verən hücumun səbəbi kimi ailə-məişət münaqişəsini göstərməyə, dünya ictimaiyyətini aldatmağa çalışır. Azərbaycan-Türkiyə ittifaqını və Azərbaycanın İsraillə münasibətlərini pozmaq istəyən İranın molla rejimi istəyinə çatmayanda terrora əl atmaqla özünün mahiyyətini bir daha ortaya qoymuş oldu. Ermənilərlə qardaşlığın da mahiyyəti budur. Eyni yolu hər iki “qardaş” birlikdə gedir. Ermənilərin terror əməlləri zatən dünyaya bəllidir. İranın da bu yoldan istifadəsi onların eyni mahiyyət daşıdığını göstərir. Bu hadisədə İranda Azərbaycan əleyhinə davamlı olaraq aparılan təbliğatın da rolu böyükdür. Səfirliyimizə silahlı hücumla bağlı məsuliyyəti bilavasitə İran tərəfi özü daşıyır. Çünki İran mediası, televiziya kanalları, radiosu, qəzetləri davamlı olaraq Azərbaycan əleyhinə düşmənçiliyi təbliğ edirlər. Bu təbliğatın nəticəsi də ancaq terror ola bilərdi ki, bu da oldu. İndi İran rəsmilərinin nala-mıxa vurması, hadisənin mahiyyətini müxtəlif versiyalarda yozması heç nəyi dəyişmir.

Baş verən hadisə ilk növbədə "Diplomatik əlaqələr haqqında" 1961-ci il tarixli Vyana Konvensiyasının müddəalarının kobud şəkildə pozulmasıdır. Belə ki, Vyana Konvensiyasının 22-ci maddəsinə əsasən, nümayəndəlik binaları toxunulmazdır, nümayəndəliyi hər cür hücumlardan və zərər vurulmasından qorumaq, nümayəndəliyin normal fəaliyyətinin təmini üçün lazımi tədbirlər görmək ev sahibi olan dövlətin vəzifəsidir. İndi bu vəzifəsini yerinə yetirmək əvəzinə mənasız və məntiqsiz bəyanat verməklə İran bir dövlət olaraq ən azı məsuliyyətdən kənarda qalmaq istəyir. Lakin bu mümkün olmayacaqdır. İran bu terrorun məsuliyyətindən yayına bilməz. Ona görə də ilk növbədə terrorçunun Azərbaycanda mühakimə olunmasını təmin etməlidir.

Azərbaycana qarşı mövqeyini dəyişməyən İran bir şeyi anlamalıdır ki, bu millət onun əfsanə təbliğatına uymayacaq və öz dövlətinin siyasətini sona qədər dəstəkləyəcəkdir.

Hücum nəticəsində şəhid olan mühafizə postunun rəisi Orxan Əsgərovun ailə üzvləri və əzizlərinə dərin hüznlə başsağlığı verir, Allahdan ona rəhmət, yaralılarımıza isə tezliklə şəfa diləyirik.

Bəxtiyar Mustafayev,

YAP Mingəçevir şəhər təşkilatının sədri

Paylaş:

Baxılıb: 576 dəfə