Türk dünyasının birliyi və qardaşlığı gün-gündən möhkəmlənir

Bakı:

26 °C

83 %

10 m/s

Əlaqə

AZ RU EN

Ana səhifə / YAP xəbərləri / Türk dünyasının birliyi və qardaşlığı gün-gündən möhkəmlənir

Türk dünyasının birliyi və qardaşlığı gün-gündən möhkəmlənir

27.03.2023 [12:44]

Martın 16-da Ankarada Türk Dövlətləri Təşkilatının Dövlət Başçılarının Fövqəladə Zirvə görüşündə Prezident İlham Əliyev çıxışında bir çox məsələlərə toxundu. İlham Əliyev çıxışında ilk öncə Türkiyədə baş verən zəlzələdən danışaraq bildirdi ki, qardaş Türkiyədə çoxsaylı insanın tələfatına və xəsarət almasına səbəb olan güclü zəlzələnin fəsadları bizi olduqca kədərləndirdi. Dağıdıcı zəlzələ on minlərlə insanın həyatına son qoydu.

Azərbaycan hökuməti və xalqı zəlzələ baş verən andan qardaş Türkiyəyə humanitar yardımlar etmək üçün səfərbər oldu. Azərbaycandan 940 nəfər, o cümlədən xilasedicilər, tibb personalı və könüllülər zəlzələ bölgəsinə göndərildi. Türkiyəyə göndərilən xilasedicilərin sayına görə Azərbaycan dünya ölkələri arasında birinci oldu. Xilasedicilərimizin və həkimlərimizin səyi nəticəsində dağıntılar altından 53 nəfər sağ çıxarıldı. Həmçinin 780 nəfərin cəsədi dağıntılar altında aşkar edildi. Tibb personalımız ümumilikdə 3 mindən artıq şəxsə tibbi xidmət göstərdi. Zəlzələ bölgəsini ən son tərk edənlər də Azərbaycan xilasediciləri oldu. Cənab prezident qeyd etdi ki, Azərbaycan və Türkiyə həm sevincli, həm də kədərli günlərdə daim bir-birinin yanında olub. Bundan sonra da belə olacaq. 44 günlük müharibə dövründə bütün Türkiyə xalqı Azərbaycanın yanında idi.

Həmçinin ölkə başçısı bilidirdi ki, Türk dünyası türk dövlətlərinin hüdudları ilə məhdudlaşmır. Türk dünyası daha böyük coğrafiyanı əhatə edir. Dünyada yaşayan azərbaycanlıların sayı 50 milyondan çoxdur. Onlardan cəmi 10 milyonu müstəqil Azərbaycan Respublikasında yaşayır.

Ölkə başçısı türk xalqlarının belə geniş coğrafiyada yayılmasını qeyd etməklə onların birliyinin möhkəmlənməsinin dünyada gedən proseslərə böyük təsir imkanları yaradacağına işarə vurmaqla bu birliyin möhkəmlənməsi və inkişaf etdirilməsi zərurətini qeyd etdi.

Daha sonra 44 günlük müharibədə qardaş Türkiyənin Azərbaycana mənəvi və siyasi dəstəyini qeyd edən ölkə başçısı bildirdi: “4 günlük müharibə dövründə bütün Türkiyə xalqı Azərbaycanın yanında idi. Cümhurbaşqanı Rəcəb Tayyib Ərdoğanın 2020-ci ildə İkinci Qarabağ müharibəsində ilk saatlardan başlayaraq son günə qədər Azərbaycana göstərdiyi siyasi və mənəvi dəstək bizə əlavə güc verdi. Müharibə zamanı və tarixi Zəfərimizdən sonra Türkiyədən minlərlə dəstək və təbrik mesajları gəlmişdir. 2021-ci ilin iyun ayında Qarabağın tacı olan Şuşa şəhərində Türkiyə ilə Azərbaycan arasında Şuşa Bəyannaməsi imzalanmışdır və bizim əlaqələrimiz rəsmən müttəfiqlik səviyyəsinə qaldırılmışdır.

Bu gün dünyada Türkiyə ilə hesablaşırlar və ona hörmət edirlər. Türkiyə son 20 ildə Cümhurbaşqanı Rəcəb Tayyib Ərdoğanın liderliyi ilə böyük və şərəfli yol keçmiş, dünyada söz sahibi olmuş, güc mərkəzinə çevrilmişdir.” Bu inkişaf, bu siyasi güc mərkəızinə çevrilmə ilk növbədə qardaş türk xalqları üçün önəmlidir. Çünki Türkiyə hər zaman yanımızdadır və bu, gələcəkdə də belə olacaqdır. Cənab İlham Əliyev bunu çox böyük inamla qeyd edərək Türkiyənin Cümhurbaşqanı Rəcəb Tayyib ərdoğanın tarix qarşısında, türk dünyası qarşısında xidmətini yüksək qiymətləndirdi: “Cümhurbaşqanı Rəcəb Tayyib Ərdoğan bundan sonra da uzun illər ölkələrimiz arasındakı qardaşlıq əsasında qurulmuş əlaqələrin daha da möhkəmləndirilməsinə böyük töhfələr verəcəkdir. 2022-ci ildə Türk Dövlətləri Təşkilatının Səmərqənddə keçirilmiş Zirvə görüşündə Cümhurbaşqanı Rəcəb Tayyib Ərdoğanın Türk Dünyasının Ali Ordeni ilə təltif edilməsi onun Türk dünyasının gücləndirilməsində böyük xidmətlərini bir daha sübut edir.”

Postmüharibə dövründə Azərbaycanda gedən proseslərə toxunan cənab ilham Əliyev Qarabağda aparılan bərpa- quruculuq i şlərindən bəhs edərkən qardaş Özbəkistan və Qazaxıstanın bu işdə fəal iştirakını qeyd etdi. Türkiyə şirkətlərinin işğaldan azad olunmuş ərazilərdə həyata keçirdiyi layihələrə xüsusi yer ayıran cənab Prezident, Türkiyənin daim qardaş xalqların yanında olduğunu bildirdi. Cənab Prezident onu da qeyd etdi ki, “Qarabağda qanunsuz erməni dəstələri və kriminal ünsürlər qalmaqdadır. 2022-ci ildə Praqa və Soçidə Ermənistanın Azərbaycanın ərazi bütövlüyünü və suverenliyini tanımasına baxmayaraq, hələ də öz qoşunlarını tam olaraq Azərbaycan ərazilərindən çıxarmamışdır.” Təəssüf ki bir sıra dövlətlər, beynəlxalq təşkilatlar hələ də bu məsələdə Ermənistana dəstək verməkdə davam edirlər. Belə ikili standart yürüdən beynəlxalq təşkilatlardan biri də UNESKO-dur. İşğaldan sonra ermənilərin haray-həşirinə dərhal reaksiya verən bu təşkilat Azərbaycan həqiqətlərini görməzdən gəlməkdə davam edir. Cənab Prezident İlham Əliyev nitqində bunu belə ifadə etdi: “Ermənistan Qarabağda və Şərqi Zəngəzurda olduğu kimi, indiki Ermənistan ərazisində, yəni, Qərbi Azərbaycanda da mədəni irsimizi, məscidləri, tarixi abidələrimizi dağıtmışdır. Azərbaycan ictimaiyyəti dəfələrlə UNESCO-ya indiki Ermənistanda Azərbaycan xalqının mədəni irsinin monitorinq edilməsi məqsədilə bu ölkəyə faktaraşdırıcı missiyanın göndərilməsi xahişi ilə müraciət etmişdir və UNESCO-dan müsbət cavab gözləyir.”

Paylaş:

Baxılıb: 704 dəfə