Biz Avrasiyanın enerji xəritəsini yenidən cızırıq

Bakı:

26 °C

53 %

4 m/s

Əlaqə

AZ RU EN

Ana səhifə / YAP xəbərləri / Biz Avrasiyanın enerji xəritəsini yenidən cızırıq

Biz Avrasiyanın enerji xəritəsini yenidən cızırıq

01.05.2023 [15:55]

Nihad Pənahov

YAP Tovuz rayon təşkilatının sədri

Dövlət başçısı İlham Əliyev bu günlərdə Bolqarıstana işgüzar səfəri zamanı Sofiyada “Bulgartransgaz” (Bolqarıstan), “Transgaz” (Rumıniya), FGSZ (Macarıstan) və “Eustream” (Slovakiya) və Azərbaycan Respublikasının Dövlət Neft Şirkəti (SOCAR) arasında əməkdaşlığın təşviqi ilə bağlı Anlaşma Memorandumu”nun imzalanması mərasimində keçilən yolun təhlili əsasında bu reallığı xüsusi qeyd etdi ki, fəal enerji diplomatiyamızı davam etdiririk. Neft meqalayihələrindən tutmuş, hazırda qaz, sonra yaşıl hidrogenə qədər layihələr var. Ölkə Prezidenti, eyni zamanda, bildirdi ki, bütün bunlardan əlavə, bizim aramızda güclü ötürmə xətləri olacaq və bu, tamamilə yeni vəziyyət yaradacaq. Bir sözlə, biz Avrasiyanın enerji xəritəsini yenidən cızırıq.

Azərbaycan ilə Bolqarıstan arasında diplomatik münasibətlər 1992-ci ildə qurulub. Ötən il ölkələrimiz arasında əlaqələrin yaradılmasının 30-cu ildönümü qeyd olundu. Ötən müddət ərzində qarşılıqlı hörmət və etimad üzərində qurulmuş Azərbaycan-Bolqarıstan əlaqələri siyasi, iqtisadi, enerji, mədəni və digər sahələrdə dinamik şəkildə inkişaf edib və ölkələrimiz arasında səmərəli əməkdaşlıq formalaşıb. Qarşılıqlı səfərlər ölkələr arasında əlaqələrin inkişafında əsas amildir. Cənab İlham Əliyevin aprelin 25-də Bolqarıstana reallaşdırdığı səfər bu ölkəyə sayca beşinci səfərdir. Bolqarıstan Prezidenti Rumen Radev ölkəmizə iki dəfə səfər edib. Azərbaycan-Bolqarıstan münasibətləri Prezident İlham Əliyevin 2015-ci ildə Sofiyaya rəsmi səfəri zamanı Strateji tərəfdaşlıq haqqında Birgə Bəyannamənin imzalanması ilə keyfiyyətcə daha yüksək mərhələyə qalxıb. Bu sənədlə tərəflər qarşılıqlı maraq doğuran sahələrdə həm ikitərəfli formatda, həm də beynəlxalq miqyasda iki ölkə arasında əməkdaşlığı dərinləşdirmək və genişləndirmək məqsədilə strateji tərəfdaşlığa daxil olduqlarını bəyan ediblər. Birgə Bəyannaməyə əsasən, Azərbaycan-Bolqarıstan Strateji Dialoqu təsis olunub. Strateji Dialoqun birinci iclası 2018-ci ildə, ikinci iclası isə 2022-ci ildə keçirilib.

Göründüyü kimi tərəflər əlaqələrin inkişafında maraqlıdır, bunun üçün səylər göstərirlər. İmzalanan hər bir sənəd əməkdaşlıqda yeni bir istiqamət üçün hüquqi baza olaraq gələcək inkişafa öz müsbət təsirini göstərir. O da məlumdur ki, Bolqarıstan Prezidentinin bu ilin martında ölkəmizə səfəri Azərbaycanda ənənəvi keçirilən Qlobal Bakı Forumunda iştirak etmək məqsədi daşıyırdı. Səfər çərçivəsində iki ölkənin Prezidentlərinin görüşü keçirildi. Rumen Radev Azərbaycan Prezidenti ilə görüşündə bildirmişdir: “Sizin Sofiyaya səfəriniz bizim əməkdaşlığımızın digər çox vacib sahələrini inkişaf etdirmək üçün dönüş nöqtəsi idi. Əvvəlcə enerjidən başlayaq. Yunanıstanla Bolqarıstan arasında interkonnektorun işə salındığı ilk gündən hər şey mükəmməl və heç bir problem olmadan işləyir. Biz Azərbaycandan qaz aldığımıza görə məmnunuq. Biz daha da irəli getməyə hazırıq. Bizim “Həmrəylik Həlqəsi” təşəbbüsümüz Sizə məlumdur. Biz Bolqarıstan, Rumıniya, Macarıstan və Slovakiyanın qazötürücü operatorlarının imkan və səylərini birləşdirərək əlavə həcmdə Azərbaycan qazı nəql etməyə hazırıq.” Bu fikirlərin davamı olaraq o da qeyd edilmişdir ki, atılan addımlar şaxələndirməni, təchizatın təhlükəsizliyini təmin edir.

Azərbaycanın Avropanın enerji təhlükəsizliyinin təminatında rolu daim yüksək dəyərləndirilir. Ölkəmizin hər bir layihənin uğurlu sonluqla başa çatdırılmasına göstərdiyi səylər əməkdaşlığa verdiyi önəmin təsdiqidir. Birgə səylər hədəfə yüksək səviyyədə nail olmağa əsas verir. Dövlət başçısı İlham Əliyev Azərbaycanın mövqeyini bu fikirləri ilə tərəfdaşların diqqətinə çatdırdı: “Biz qaz təchizatımızın coğrafiyasını 6 ölkədən, ən azı 10 ölkəyə qədər genişləndirəcəyik. Mən “ən azı” ona görə deyirəm ki, fikrimcə, bu, planların sonu deyil. Biz Avropanın qaz bazarında fəaliyyətimizi daha da genişləndirməyi planlaşdırırıq. Tərəfdaşlardan ibarət güclü komandanı yaratmaq kimi bu təşəbbüsdə Bolqarıstan Prezidenti cənab Radevin xüsusi rolunu qeyd etmək istərdim. Əminəm ki, “Həmrəylik Halqası” birgə geniş planlarımızın icrasında mühüm rol oynayacaq.”

Bütün bunlar Azərbaycan-Bolqarıstan münasibətlərinin bundan sonra da davamlı olaraq genişlənəcəyini və dinamik inkişaf edəcəyini bir daha təsdiqləyir.

Paylaş:

Baxılıb: 582 dəfə