“Şuşa İli”ndə Şuşa Bəyannaməsinin təsdiq edilməsi...

Bakı:

21 °C

58 %

2 m/s

Əlaqə

AZ RU EN

Ana səhifə / Xəbər lenti / “Şuşa İli”ndə Şuşa Bəyannaməsinin təsdiq edilməsi...

“Şuşa İli”ndə Şuşa Bəyannaməsinin təsdiq edilməsi...

03.02.2022 [10:06]

Azərbaycan ilə Türkiyə arasında dostluq, qardaşlıq və strateji tərəfdaşlığın zirvəsidir

Nurlan

Azərbaycan Respublikasının Milli Məclisi Şuşa Bəyannaməsini təsdiqlədi. Bu gün isə Türkiyə Böyük Millət Məclisinin (TBMM) komissiyasının iclasında Şuşa Bəyannaməsi müzakirə olunacaq. Bundan sonra sənədin TBMM-nin plenar iclasında müzakirəsi planlaşdırılır. Ekspertlər qeyd edirlər ki, Şuşa Bəyannaməsinin təsdiq edilməsi hərbi-siyasi təhlükəsizliyə və müttəfiqlik münasibətlərinin daha da gücləndirilməsinə töhfə olacaq.

Milli Məclisin Azərbaycan-Türkiyə parlamentlərarası əlaqələr üzrə işçi qrupunun üzvü Elman Məmmədov “Yeni Azərbaycan”a açıqlamasında deyib ki, dünyada Azərbaycan ilə Türkiyə qədər bir-birinə yaxın iki ölkə tapmaq mümkün deyil: “Bizim münasibətlərimiz nümunəvi xarakter daşıyır, dostluğa, qardaşlığa və strateji tərəfdaşlığa əsaslanır. Eyni zamanda, müttəfiqlik münasibətlərinin inkişafı daim diqqət mərkəzində saxlanılır, bu istiqamətdə mühüm addımlar atılır. Ötən ilin iyun ayının 15-də imzalanmış Şuşa Bəyannaməsi də bu baxımdan xüsusi əhəmiyyətə malikdir. Bəyannamədə Azərbaycan və Türkiyə arasında müxtəlif sahələrdə əlaqələrin inkişafı ilə əlaqədar vacib məqamlar yer alıb. Xüsusilə də, sənəddə hərbi-siyasi təhlükəsizlik, suverenliyin və ərazi bütövlüyünün qorunması məsələlərinin əks olunması böyük önəm daşıyır. Ümumiyyətlə, postmüharibə dövründə imzalanmış Şuşa Bəyannaməsi yeni geostrateji reallıqları təsdiqləyən sənəddir. Bu, onu göstərir ki, Azərbaycan və Türkiyə yeni mərhələdə də birlikdə hərəkət edərək zəruri təşəbbüslər irəli sürəcək, sülh, təhlükəsizlik və əməkdaşlıq məsələlərini diqqətdə saxlayacaq”.

Millət vəkili söyləyib ki, Azərbaycan və Türkiyə parlamentləri tərəfindən Şuşa Bəyannaməsinin təsdiq edilməsini həm iki ölkə arasındakı münasibətlərdə, həm də regional təhlükəsizlik müstəvisində yeni mərhələnin başlanğıcı kimi səciyyələndirmək olar.

Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva isə bildirib ki, ötən il imzalanmış müttəfiqlik münasibətləri haqqında Şuşa Bəyannaməsi Azərbaycan-Türkiyə dostluğunun və qardaşlığının zirvə nöqtəsi, strateji tərəfdaşlığın yeni mərhələsidir: “Azərbaycan ilə Türkiyə arasında siyasi, iqtisadi, mədəni, humanitar və hərbi-strateji münasibətlər ən yüksək zirvədədir. Tərəflər, eyni zamanda, beynəlxalq arenada bir-birinin maraqlarını, mənafelərini qətiyyətlə müdafiə edirlər, prinsipial dəstək nümayiş etdirirlər. Xüsusilə də, suverenlik və ərazi bütövlüyünün qorunması məsələsində Bakı ilə Ankara ortaq mövqedən çıxış edir. Şuşa Bəyannaməsində də bütün bu məqamlar öz əksini tapıb”.

Millət vəkili vurğulayıb ki, Şuşa Bəyannaməsi tərəflərin siyasi iradəsini əks etdirməklə yanaşı, regional təhlükəsizlik amili kimi də müstəsna əhəmiyyətə malikdir: “Bəyannamədə vurğulanıb ki, tərəflərdən hər hansı birinin fikrincə, onun müstəqilliyinə, suverenliyinə, ərazi bütövlüyünə, beynəlxalq səviyyədə tanınmış sərhədlərinin toxunulmazlığına və ya təhlükəsizliyinə qarşı üçüncü dövlət və ya dövlətlər tərəfindən təhdid və ya təcavüz edildiyi təqdirdə, Tərəflər birgə məsləhətləşmələr aparacaq və bu təhdid və ya təcavüzün aradan qaldırılması məqsədilə BMT Nizamnaməsinin məqsəd və prinsiplərinə müvafiq təşəbbüs həyata keçirəcək, bir-birinə BMT Nizamnaməsinə uyğun zəruri yardım göstərəcəklər. Bu, olduqca vacib məqam və prinsipial məsələdir. Azərbaycan və Türkiyə arasında bu zamana qədər hərbi-texniki və strateji əməkdaşlıq əlaqələrinin inkişafı diqqət mərkəzində olub. Şuşa Bəyannaməsinin imzalanması isə artıq hərbi-siyasi təhlükəsizliyin təmin olunması və başqa qüvvələrdən gələcək təhdidlərlə mübarizə baxımından hüquqi əsaslar formalaşdırır”.

“Azərbaycan Respublikasının Milli Məclisi Şuşa Bəyannaməsini təsdiqlədi. Eyni addımın Türkiyə Böyük Millət Məclisi tərəfindən atılması da gözlənilir. “Şuşa İli”ndə Şuşa Bəyannaməsinin hər iki ölkənin qanunverici orqanı tərəfindən təsdiqlənməsi ortaq təhlükəsizliyimizin təmin olunması və ikitərəfli, çoxşaxəli münasibətlərin inkişafı baxımından böyük önəm daşıyır. Bəyannamədən irəli gələn strateji vəzifələrin yerinə yetirilməsi Azərbaycan-Türkiyə birliyinin güclənməsinə və ölkələrimizin regional güc mərkəzi kimi beynəlxalq arenada mövqeyinin möhkəmlənməsinə müstəsna töhfə verəcək”, - deyə S.Fətəliyeva əlavə edib.

Paylaş:

Baxılıb: 1055 dəfə