Kirmanda terror...

Bakı:

17 °C

63 %

12 m/s

Əlaqə

AZ RU EN

Ana səhifə / Analitik / Kirmanda terror...

Kirmanda terror...

08.01.2024 [11:15]

Yeni mülahizələr səslənir

İranın Kirman şəhərində baş vermiş terror hadisəsi ilə bağlı yeni təfərrüatlar ortaya çıxıb. Belə ki, İranın cənub-şərqindəki Kirman şəhərində bu yaxınlarda törədilmiş terror aktında iştirak edən bütün terrorçular həbs edilib. “Mehr” agentliyinin məlumatına görə, bu barədə şəhər prokuroru Mehdi Bəxşi bildirib. O, telekanalların birinə müsahibəsində qeyd edib ki, “Kirmandakı terror cinayəti işi ilə bağlı 32 nəfər həbs edilib və ilkin istintaq aparılır”. Bundan başqa, ədliyyə rəsmisi əlavə edib ki, “bütün Kirman vilayəti ərazisində daha güclü 16 bomba aşkar edilib.

Son məlumatlara görə, general Qasım Süleymaninin qətlə yetirilməsinin dördüncü ildönümü münasibətilə keçirilən mərasim zamanı törədilən partlayışlar nəticəsində 91 nəfər, o cümlədən 78 iranlı və 13 əfqan ölüb, 286 nəfər yaralanıb, onlardan bəzilərinin vəziyyəti ağırdır.

Prokuror Bəxşi hücum zamanı istifadə edilən partlayıcı qurğuların zibil qutularına qoyulması və uzaqdan işə salınması ilə bağlı şayiələri rədd edərək, hər iki partlayışın terrorçu kamikadzelər tərəfindən törədildiyini deyib. Terrorçuların şəhidlərin dəfn olunduğu qəbiristanlığın içərisinə heç bir partlayıcı maddə yerləşdirə bilmədiyini vurğulayan prokuror əlavə edib ki, son aylar ərzində Kirman vilayətində intihar hücumları etməyə hazır olan 23-ə yaxın İŞİD üzvü həbs edilib. O, builki tədbirin qabaqlayıcı təhlükəsizlik tədbirləri ilə yadda qaldığını və daha çox təhlükəsizlik qüvvələrinin yerləşdirildiyini, eyni zamanda, termal kameralar və PUA-lardan geniş istifadə edildiyini bildirib.

Xatırladaq ki, İŞİD terror təşkilatı İrandakı partlayışlara görə məsuliyyəti öz üzərinə götürmüşdü. Terror təşkilatı teleqram kanalında hücumu həyata keçirdiklərini açıqlamışdı.

Ümumiyyətlə, son dövrlərdə Yaxın Orta Şərqdə yenidən silah səslərinin intensivləşməsi, qarşıdurmaların artması terrorun da şiddətlənməsini şərtləndirib. Təsadüfi deyil ki, bölgədəki bəzi terror qruplarının yenidən fəallaşması müşahidə olunur. Buna qarşı mübarizədə isə bütün dövlətlər öz gücünü ortaya qoyur. Məsələn, bu mənada, Türkiyə öz səyləri ilə seçilir. Rəsmi Ankaranın həyata keçirdiyi antiterror tədbirləri bölgədə sabitliyin təmin olunması və təhdidin aradan qalxması üçün əsaslı baza formalaşdırıb.

İrana gəldikdə isə, bəzi siyasətçilər bu ölkənin daxilində baş verən terror hadisələrini fərqli məcralarda izah edir. Belə ki, ötən ilin payızında bu ölkədə baş verən silsilə etiraz aksiyalarının yenidən aktiv fazaya qədəm qoyma ehtimalı ortaya atılır - diqqət çəkən məqam odur ki, həmin aksiyalar zamanı Kirman vilayəti əsas etirazçı ərazilərdən biri kimi qeyd edilirdi. Qərbin siyasi institutlarının təhlillərinə nəzər salsaq, bu aksiyaların yeni metodlara əsaslanması ehtimalından bəhs olunur.

Digər məsələ isə, İranın Yaxın Şərqdə baş verən bəzi proseslərdə aktiv iştirakı ilə əsaslandırılır. Xüsusilə, Suriya, Livan və Qəzza bölgələrində, hətta husilərlə bağlı məlum situasiyada Tehranın apardığı siyasətin bəzi dairələri hərəkətə gətirdiyi bildirilir. Bəzi siyasi mütəxəssislər hətta bu partlayışları “Tehrana xəbərdarlıq” kimi də dəyərləndirirlər. Onların qənaətinə görə, qarşıdakı dövrdə daha fərqli vasitələrdən də istifadə olunacağı istisna edilmir.

Baş verənlərlə bağlı ortaya atılmış daha bir versiya isə İranın son dövrlərdə Şərq-Qərb tranziti ilə bağlı qlobal müzakirələrə aktiv qoşulması ilə bağlıdır. Belə ki, məhz bu kimi partlayışlarla diqqətin “Tehran xətti”ndən uzaqlaşdırılmasına nail olunması arzulanır - qlobal tranzitin İrandan keçməsinin “təhlükə” ilə bağlı görüntü yaradıldığı da bildirilir...

Ümumiyyətlə, terror birmənalı şəkildə qəbul olunmayan haldır və bütün dünyada bu anti-insani aksiyaya qarşı tədbirlər həyata keçirilir. Hər bir problemin sülh yolu ilə tənzimlənməsi yeganə çıxış yolu kimi qeyd edilir. Azərbaycan dövləti də hər zaman terrora qarşı olduğunu, bütün problemlərin sülh yolu ilə tənzimlənməsində maraqlı olduğunu nümayiş etdirib. Azərbaycan dövləti hər zaman terror hadisələrini qətiyyətlə pisləyir.

Mənsur

Paylaş:

Baxılıb: 814 dəfə