Fikirdə, əməldə birlik!

Bakı:

24 °C

78 %

5 m/s

Əlaqə

AZ RU EN

Ana səhifə / MEDİA / Fikirdə, əməldə birlik!

Fikirdə, əməldə birlik!

11.03.2025 [09:29]

Diaspor fəaliyyətimiz uğurla davam edir...

Hər bir ölkənin tarixinin, milli adət-ənənələrinin, mədəniyyətinin xaricdə tanıdılmasında diaspor fəaliyyətinin böyük rolu var. Hazırda lobbiçilik və diaspor dünyada beynəlxalq münasibətlərin vacib elementi sayılır. Hələ ötən əsrdən etibarən, ciddi təşkilatlanma mərhələsindən keçən Azərbaycan diasporu ölkəmizi xaricdə layiqincə təmsil edir. Bu çərçivədə xaricdəki soydaşlarımızın Azərbaycanın milli dövlət maraqlarının müdafiəsində bir çox lobbi qrupları ilə qarşılıqlı əməkdaşlıq şəraitində fəaliyyət göstərdiyini xüsusi vurğulaya bilərik. Lakin qlobal miqyasda ciddi proseslərin cərəyan etdiyini nəzərə alsaq, Azərbaycan diasporunun da öz işini günün tələblərinə uyğun qurmağının vacibliyi ön plana çıxır.

İqtisadi inkişaf, güclü dövlət quruculuğu, maddi imkanlar, hərbi və milli birlik ölkəmizə tarixi qələbə qazandırdı. Bütün bu amillər ermənilərə layiqli cavab verməyimiz üçün əsaslı rol oynadı, amma həmin qələbəmizin əldə edilməsində həmrəyliyimizin, birliyimizin, diasporlarımızın fəaliyyətinin də rolu danılmazdır.

Məhz diasporlarımızın fəaliyyəti sayəsində...

Mövzunu “Yeni Azərbaycan”a dəyərləndirən “Diaspor Press” informasiya mərkəzinin rəhbəri Toğrul Allahverdi bildirib ki, 44 günlük müharibə dövründə bütün dünya ictimaiyyəti xalqımızın həmrəyliyinin, birliyinin şahidi oldu: “Bütün dünya gördü ki, Azərbaycan xalqı öz milli dəyərlərinin, özünəməxsus olanın müdafiəsi uğrunda necə birləşdi və ən qısa zamanda qələbə qazandı. Milli birliyimiz, həmrəyliyimiz bizə Zəfər qazandırdı. Həmin dövrdə hətta ölkə hüdudlarından kənarda, xarici ölkələrdə yaşayan həmvətənlərimiz də həmrəylik, birlik nümayiş etdirdi. Diasporlarımız xarici ölkədə yaşayan ermənilərin ölkəmizin haqq işinə qarşı bir sıra həmlələrinin, bəd niyyətlərinin və əməllərinin qarşısını aldı. Dəfələrlə bir neçə xarici ölkə səfirlikləri qarşısında ölkəmizin haqq işinə kölgə salmaq, müxtəlif don geyindirmək istəyən ermənilər diasporlarımızın ciddi müqaviməti ilə qarşılaşmalı oldular və öz çirkin niyyətlərini həyata keçirə bilmədilər. Məhz diasporlarımızın fəaliyyəti sayəsində ölkəmiz əleyhinə yalan, təhrif olunmuş məlumatları yayan ermənilərin təbliğat maşınının fəaliyyəti məhdudlaşdırıldı, hətta ifşa edildi və onlar istədiklərinə nail ola bilmədilər. Azərbaycan həqiqətlərinin, bizim doğru işimizin bütün dünyaya çatdırılmasında, ərazilərimizin erməni separatçıları tərəfindən işğal edilməsi barədə məlumatlandırılmasında diasporlarımızın və lobbilərimizin xüsusi rolu oldu. Ölkəmizin haqlı mövqeyi, milli maraqları dünya miqyasında müdafiə edildi. Bir sözlə, diasporlarımız da qələbəmizə öz töhfəsini vermiş oldu. Bütün bunlar onu göstərir ki, diaspor və lobbiçilik nə qədər vacib məqamdır. Xatırladaq ki, Ulu öndər Heydər Əliyev hakimiyyətə yenicə qayıtdığı dövrdə məhz xarici ölkələrə səfərləri zamanı həmvətənlərimizlə görüşlər təşkil edərək, onların birləşməsini, birliyini tövsiyyə edirdi. Dahi rəhbərin tövsiyələrindən doğru, düzgün nəticələr hasil edən həmvətənlərimizin birliyi ilə diasporlarımız formalaşdı. Bu isə o deməkdir ki, diaspor quruculuğumuz da məhz Ümummilli Liderin adı ilə bağlıdır. Ulu Öndərin siyasi kursunu layiqincə davam etdirən Prezident İlham Əliyev də diaspor quruculuğuna, lobbiçiliyin inkişafına xüsusi diqqətlə yanaşır. Diqqətə çatdıraq ki, Ermənistanın hər hansı maddi problemləri ortaya çıxdığı zaman erməni diasporu həmin ölkəyə maddi yardımlar etdiyi halda, Azərbaycan dövləti xarici ölkələrdə mövcud olan diasporlarımızı özü maliyyələşdirir. Hansı ki bu məqam özü də ölkə rəhbərimizin diasporlarımıza diqqətinin, qayğısının bariz nümunəsidir”.

Birliyimiz və həmrəyliyimiz əvəzsizdir

T.Allahverdili bildirib ki, İkinci Qarabağ müharibəsində Zəfər qazandıq, amma ermənilər hələ də öz çirkin niyyətlərindən əl çəkən kimi görünmürlər: “Savaş meydanında müharibə başa çatsa da, informasiya müharibəsi hələ davam edir. Bu baxımdan da həmrəyliyimiz, birliyimiz, diasporlarımızın fəaliyyətinin genişləndirilməsi öz aktuallığını qorumaqdadır, çünki düşmənə təkcə hərb meydanında deyil, istənilən müstəvidə qalib qəlmək üçün buna indi daha çox ehtiyac duyulur. Təsadüfi deyil ki, ölkə rəhbərimiz birliyimizə, həmrəyliyimizə xüsusi önəm verir, diasporlarımızın fəaliyyətini də yüksək qiymətləndirir. Qloballaşan dünyada birliyimiz, həmrəyliyimiz əvəzsizdir və xalqlar arasında sürətli inteqrasiya prosesi getdiyi bir zamanda diaspor təşkilatlarının beynəlxalq siyasətdə rolunun da artması həqiqətə çevrilib. Bu gün dünyanın reallıqları diaspor quruculuğu istiqamətində qarşıya yeni vəzifələr qoymaqdadır. Diaspor təşkilatlarının fəaliyyəti tarixi zərurətə çevrilib”.

Səlim

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır.

Paylaş:

Baxılıb: 837 dəfə

Xəbər lenti

Hamısına bax