Süni intellektlə bağlı geniş platforma

Bakı:

15°C

82%

1m/s

Əlaqə

AZ RU EN

Ana səhifə / MEDİA / Süni intellektlə bağlı geniş platforma

Süni intellektlə bağlı geniş platforma

15.04.2025 [10:40]

Bakı süni zəka üzrə liderləri bir araya toplayıb

Bugünlərdə Azərbaycanda süni intellekt sahəsində qabaqcıl şirkətlərdən biri olan “Neurotime” və ADA Universitetinin təşkilatçılığı ilə 6-cı Beynəlxalq Süni İntellekt və Big Data Forumu keçirilib. Forumda yerli və beynəlxalq mütəxəssislər, tədqiqatçılar, sahibkarlar və dövlət nümayəndələrinin iştirakı ilə müxtəlif sahələrdə süni intellektin tətbiqi imkanları geniş şəkildə müzakirə edilib. ADA Universiteti, Florida Texnologiya İnstitutu, Nyu-York Universiteti, Tallin Texnologiya Universiteti və Kolumbiya Universitetinin professorları çıxış edərək innovasiyalar və süni intellektin perspektivləri barədə dəyərli bilik və təcrübələrini bölüşüblər. Tədbir çərçivəsində süni intellekt və Big Data sahəsindəki ən son texnoloji yeniliklər, elmi nailiyyətlər və innovativ həllər təqdim olunub.

2030-cu ilə qədər...

Forum Azərbaycanın süni intellekt və rəqəmsal transformasiya sahəsində regional liderliyə doğru atdığı növbəti mühüm addım kimi qiymətləndirilir. Tədbirdə iştirak edən İqtisadiyyat Nazirliyinin Dördüncü Sənaye İnqilabının Təhlili və Koordinasiyası Mərkəzinin icraçı direktoru Fariz Cəfərov bildirib ki, qlobal süni intellekt bazarı 2025-ci ilin sonuna qədər 500 milyard dollara çatacaq. 2030-cu ilə qədər bu göstərici 1,8 trilyon dollara qədər artacaq. “Biz yeni bir dövrün astanasındayıq. Hazırda süni intellekt və böyük məlumatlar sadəcə həyatımızı dəyişmir və innovasiyaları transformasiya etmir, həm də onlar problemləri həll etmə, xidmətlər göstərmə və cəmiyyəti formalaşdırma üsullarımızı yenidən nəzərdən keçirməyimizə səbəb olur”.

F.Cəfərovun sözlərinə görə, səhiyyədən təhsilə, logistikadan energetikaya qədər - bu texnologiyalar nəhəng transformasiya potensialına malikdir. Həmin sahələrdə süni intellektə çıxış imkanlarının artırılması hədəflənib.

Dünya Süni İntellekt Alyansının üzvü

Fariz Cəfərov qeyd edib ki, Azərbaycan Dünya İqtisadi Forumu (DİF) ilə birgə müxtəlif istiqamətlərdə, o cümlədən enerji sahəsində süni intellektin tətbiqi ilə bağlı layihələr həyata keçirir: “Hazırda DİF ilə birgə bir neçə layihə həyata keçiririk. Azərbaycan DİF-in Süni İntellektin İdarə Edilməsi Alyansının üzvüdür. Biz müxtəlif istiqamətlərdə işləyirik, o cümlədən energetikada süni intellektin tətbiqi ilə bağlı layihələr üzərində çalışırıq. Eyni zamanda çağrı mərkəzlərində süni intellektdən istifadə edirik”.

Pilot layihələr - strateji yolun istiqamətləri

F.Cəfərov bildirib ki, Azərbaycanda səhiyyə, təhsil, kənd təsərrüfatı, idman, rəqəmsal dövlət və bir çox digər sahələrdə süni intellektin məsuliyyətli istifadəsi üzrə pilot layihələr sınaqdan keçirilir. Hökumət tərəfindən qəbul edilmiş süni İntellekt üzrə Milli Strategiya sənədi ölkənin etik, inklüziv və innovasiyaya yönəlmiş süni intellektə gedən yolunu müəyyən edir və bu strategiya 5 əsas istiqamət üzərində qurulub: “Birincisi - süni intellektin idarə edilməsi və tənzimlənməsidir: onun tətbiqi üçün normativ bazanın, etik standartların və qaydaların yaradılması. İkincisi - istedadlar və təhsildir: gənclərin süni intellektə yönəlmiş gələcək əmək bazarına hazırlanması, həmçinin bütün Azərbaycan vətəndaşlarının süni intellektin gətirəcəyi dəyişikliklərə uyğunlaşması. Üçüncüsü - infrastruktur və məlumat ekosistemidir. Superkompüterlər, data mərkəzləri, məlumatların saxlanması və yüksəksürətli internet olmadan süni intellektin inkişafını təmin etmək mümkün deyil”.

F.Cəfərov qeyd edib ki, bu istiqamət ölkədə keyfiyyətli, təhlükəsiz və uyğun məlumatların təmin edilməsini nəzərdə tutur: “Dördüncü istiqamət - tədqiqat və innovasiyalardır: süni intellekt sahəsində akademik cəmiyyətin, startapların və tətbiqi tədqiqatların dəstəklənməsi. Beşinci istiqamət - beynəlxalq əməkdaşlıqdır. Süni intellekt sahəsində dünya inkişafından təcrid olunmaq müsbət nəticələr verməyəcək. Məhz buna görə qlobal tərəfdaşlarla qarşılıqlı əlaqə və süni intellektin məsuliyyətli gələcəyinin formalaşmasında iştirak həlledici rol oynayır”.

Yeganə

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İnformasiya və kommunikasiya texnologiyalarının inkişaf etdirilməsi” istiqaməti üzrə hazırlanmışdır.

Paylaş:

Baxılıb: 197 dəfə