Elman Nəsirov: ABŞ-dakı erməni lobbisinin liderlərindən biri olan şəxsin etirafı erməni təbliğatının bel sütununu sındırdı

Bakı:

20 °C

52 %

6 m/s

AZ RU EN

Ana səhifə / Siyasət / Elman Nəsirov: ABŞ-dakı erməni lobbisinin liderlərindən biri olan şəxsin etirafı erməni təbliğatının bel sütununu sındırdı

Elman Nəsirov: ABŞ-dakı erməni lobbisinin liderlərindən biri olan şəxsin etirafı erməni təbliğatının bel sütununu sındırdı

03.03.2018 [01:09]

ABŞ-ın Kaliforniya ştatının Senatında ermənipərəst senatorların və erməni diasporunun Sumqayıt hadisələrinin 30-cu ildönümü ilə bağlı fevralın 28-də keçirdikləri dinləmələrdə səslənən fikirlər “dil çaşar, düzünü deyər” atalar misalının təsdiqi kimi də dəyərləndirilə bilər. Həmin dinləmələrdə söz alan Amerika Erməni Assambleyasının ABŞ-ın qərb regionu üzrə direktoru Mihran Tumacan öz çıxışı ilə Xocalı soyqırımına münasibətdə dünya erməni diaspor və lobbisinin müdafiə etdiyi saxta arqumentləri tərksilah edən bir mövqe ortaya qoydu. Başqa sözlə, ABŞ erməni lobbisinin rəhbərlərindən biri olan M.Tumacan Xocalı soyqırımını Ermənistan silahlı qüvvələrinin törətdiyini etiraf etdi.
Bu fikirləri AZƏRTAC-a açıqlamasında Milli Məclisin deputatı, Azərbaycan Respublikasının Prezidenti yanında Dövlət İdarəçilik Akademiyasının Siyasi Araşdırmalar İnstitutunun direktoru, siyasi elmlər doktoru, professor Elman Nəsirov deyib.
Elman Nəsirov Mihran Tumacanın həmin etirafını xatırladıb: “Mən burada azərbaycanlı tələbələrin səsləndirdiyi fikirlərə cavab vermək istəyirəm. Onlar yanlış olaraq Xocalıda baş verənləri soyqırımı adlandırırlar. Orada baş verənlər soyqırımı deyil, faciədir. Gənc yaşında həlak olmuş tanınmış azərbaycanlı jurnalist Çingiz Mustafayevin faciə yerindən çəkdiyi videolar açıq-aydın göstərir ki, Ermənistan silahlı qüvvələri Xocalıda yaşayan azərbaycanlıları öncədən xəbərdarlıq etmişdi ki, Xocalıda ... (dili dolaşır) gərgin döyüşlər gedəcək. Bundan başqa, Ermənistan qoşunları mülki əhalinin sərbəst çıxması üçün dəhliz də açmışdılar. Çoxlu azərbaycanlı bu dəhlizdən keçib gedə bildi, ancaq bir çoxu da keçə bilmədi. Çingiz Mustafayev və hadisə yerindən reportajlar hazırlayan digər azərbaycanlı jurnalistlər də qeyd ediblər ki, çoxlu sayda azərbaycanlı məhz o dəhlizdən keçmədikləri üçün öldürülüblər”.
Milli Məclisin deputatı deyib ki, 26 ildir Ermənistan rəhbərliyinin, ABŞ-dakı erməni lobbisi və diasporunun dəridən-qabıqdan çıxaraq Xocalı soyqırımında Ermənistan silahlı qüvvələrinin iştirak etmədiklərini qızğın şəkildə müdafiə etdikləri bir reallıqda erməni lobbisinin Amerikadakı liderlərindən biri olan bu şəxsin məlum etirafı erməni təbliğatının bel sütununu sındırdı. Erməni diaspor rəhbərinin özünü itirmiş halda məlum etiraflara imza atması onun özünün də bel sütununun taleyini böyük sual altında qoyacağını deməyə əsas verir. Bu şəxsin terroru həyat devizinə çevirmiş erməni siyasi dairələrinin qəzəbinə tuş gələcəyini təxmin etmək elə də çətin deyil.
Elman Nəsirov qeyd edib ki, anti-Azərbaycan mahiyyət kəsb edən bu dinləmələr başqa bir həqiqəti də üzə çıxardı. Erməni siyasi dairələrinə məlum oldu ki, artıq ABŞ-da və dünyanın bir çox ölkələrində vətənpərvər, savadlı xarici dilləri mükəmməl bilən azərbaycanlı gənclər nəsli yetişməkdədir və onlar dövlətimizin və xalqımızın milli maraqlarını ən yüksək səviyyədə müdafiə etməyə qadirdirlər. Kaliforniyada yaşayan azərbaycanlı icmanın gənc nümayəndələrinin qaldırdıqları məsələlər qarşı tərəfi olduqca çıxılmaz vəziyyətə salıb, elə bu səbəbdən də məntiqsiz və dolaşıq söz yığınından ibarət sayıqlamalarına səbəb olub. Soydaşlarımızın “Siz Sumqayıt hadisələrindən danışırsınız, bəs niyə Xocalı soyqırımı ilə bağlı susursunuz?”, “Siz nə üçün Ermənistanın etnik təmizləmə və təcavüzkar siyasəti nəticəsində bir milyondan artıq soydaşımızın məcburi köçkün və qaçqın vəziyyətinə düşməsinə biganə qalırsınız?”, “Siz niyə bu dinləmələrdə azərbaycanlıları ittiham edirsiniz, lakin onların heç bir təmsilçisini rəsmi çıxış üçün dəvət etmirsiniz?” kimi kəskin sualları hələ uzun müddət ABŞ erməni lobbisi və diasporunun yuxusuna haram qatacaq.

Paylaş:

Baxılıb: 578 dəfə