"Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin bəyanatı

Bakı:

10 °C

81 %

9 m/s

AZ RU EN

Ana səhifə / Siyasət / "Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin bəyanatı

"Azərbaycan Respublikası Dağlıq Qarabağ Bölgəsinin Azərbaycanlı İcması" İctimai Birliyinin bəyanatı

17.12.2009 [09:45]

“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi olaraq biz Avropanın ən nüfuzlu kütləvi informasiya vasitələrindən biri olan “Euronews” televiziya kanalının yayımladığı, Dağlıq Qarabağla bağlı ictimai fikrin yanlış formalaşmasına şərait yaradan qərəzli və qeyri-obyektiv reportaja öz qəti etirazımızı bildiririk. Azərbaycan Respublikasının Dağlıq Qarabağ bölgəsinə ezam olunan “Euronews” telekanalının əməkdaşları çalışdıqları media qurumunun ənənələrinə zidd olaraq Azərbaycanın əleyhinə hazırlanan “Dağlıq Qarabağda dəyişiklik küləkləri” adlı videomaterial təqdim ediblər. “DQR”in müstəqil dövlət olması ilə bağlı bir neçə dəfə xatırlatmalar edilən bu veriliş başdan-ayağa anti-Azərbaycan xarakterlidir. Reportajda Dağlıq Qarabağdakı kilsə göstərilərək, bölgənin həm dini, həm də mənəvi baxımdan Ermənistanın tərkib hissəsi olması qeyd olunur. Lakin kilsəni göstərib, Şuşada olan 17 məscid haqqında heç bir məlumatın verilməməsi insanda təəssüf doğurur. Ən acınacaqlısı isə bu cür qeyri-obyektiv, birtərəfli və Avropanın ictimai rəyini çaşdırmağa yönəlmiş reportajın telekanalda dəfələrlə təkrarən yayımlanmasıdır. Biz, Azərbaycan Respublikası Dağlıq Qarabağ bölgəsinin Azərbaycanlı icması adından bir daha bəyan edirik ki, Dağlıq Qarabağ Azərbaycanın əzəli və əbədi torpağıdır. Erməni təcavüzü nəticəsində Azərbaycanın 20 faiz torpaqları işğal edilmiş, azərbaycanlılara məxsus tarixi və mədəniyyət abidələri dağıdılaraq erməni vandalizminin qurbanı olmuş, bir milyondan çox insan öz doğma yurdundan qovularaq qaçqın və məcburi köçkün həyatı sürməkdədir.
Azərbaycan torpaqlarına təcavüz edən Ermənistanın işğalçı ölkə olduğu və etnik təmizləmə siyasət aparması faktları BMT, Avropa Şurası, ATƏT, İslam Konfransı Təşkilatı və digər nüfuzlu beynəlxalq qurumların qəbul etdikləri sənədlərdə, əksər dövlət başçılarının və rəsmilərinin bəyanatlarında öz əksini tapmışdır.
Təəssüf hissi ilə bildiririk ki, Belçikanın Luven Katolik Universitetinin Akademik Şurasının direktoru, professor Bernar Kuli Dağlıq Qarabağın “erməni mədəniyyətinə aid cəlbedici, unikal bölgə” olduğunu söyləyərək, Dağlıq Qarabağı “Ermənistanın qəlbi” adlandırıb. Bunlar azmış kimi, Dağlıq Qarabağı “müstəqil dövlət”, separatçıların başçısını isə qondarma qurumun “prezidenti” kimi qələmə vermişdir.
“Azərbaycan Respublikası Dağlıq Qarabağ bölgəsinin Azərbaycanlı İcması” İctimai Birliyi tarixi-siyasi faktların aşkar və kobud təhrifinə əsaslanan bu tip iddialara qəti etirazını bildirir.
Geniş tamaşaçı auditoriyasına malik bir kanalın təxribat xarakterli reportajı Dağlıq Qarabağ münaqişəsinin ədalətli həllinə olan ümidləri azaldır. “Euronews” telekanalı bu cür qərəzli və qeyri-obyektiv reportajı ilə ATƏT-in Minsk Qrupunun vasitəçiliyi ilə aparılan nizamlanma prosesinə ciddi xələl gətirir, regionda sülhün, əmin-amanlığın və qarşılıqlı etimadın yaranmasına ağır zərbə vurur. Bundan əlavə, Dağlıq Qarabağın tarixən Azərbaycan torpağı olması, orada həmişə azərbaycanlıların yaşaması, ermənilərin isə həmin bölgədə məskunlaşmalarının XIX əsrə təsadüf etməsi barədə məlumatı olmayan telekanalın bu reallığı bilməməsi qəbul edilməzdir.
“Euronews” telekanalının səhmlərinin 25,37 faizi Fransa Dövlət Televiziya Korporasiyasına, 16,94 faizi isə ümumrusiya Dövlət Televiziya Şirkətinə məxsusdur. Bu isə ATƏT-in Minsk qrupunun Fransa və Rusiyadan olan həmsədrlərinin Ermənistan-Azərbaycan, Dağlıq Qarabağ münaqişəsi ilə bağlı mövqelərinə mənfi təsir göstərir.
Biz ümid edirik ki, “Euronews” telekanalı bütün bu yanlışları aradan qaldıracaq, geniş auditoriyasına Azərbaycan ictimaiyyətinin mövqeyini çatdıracaq və tarixi həqiqətləri olduğu kimi işıqlandırmaq üçün tədbirlər görəcəkdir.
Bayram SƏFƏROV,
“Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin sədri

Paylaş:

Baxılıb: 1243 dəfə