Ermənistanda siyasi qarşıdurma: Paşinyanın istefası tələb olunur

Bakı:

32 °C

51 %

3 m/s

Əlaqə

AZ RU EN

Ana səhifə / Siyasət / Ermənistanda siyasi qarşıdurma: Paşinyanın istefası tələb olunur

Ermənistanda siyasi qarşıdurma: Paşinyanın istefası tələb olunur

13.01.2021 [09:30]

Məlum olduğu kimi, Azərbaycanın qarşısında ağır məğlubiyyətə uğrayan Ermənistanda hər keçən gün vəziyyət daha da gərginləşir. Belə ki, indiki durum ictimai-siyasi dairələrdə böyük narahatlığa səbəb olur və ölkədə cəmiyyətin bütün təbəqələri tərəfindən hökumətin istefası tələb edilir. Ölkə prezidentinin, müxalifətin, bütün təbəqələrdən olan vətəndaşların, erməni katolikoslarının və erməni diasporunun çağırışlarına baxmayaraq, Nikol Paşinyanın istefa verməməsi isə kütləvi etiraz aksiyalarının davam edəcəyindən xəbər verir. Ermənistan mediasının yazdığına görə, “Vətənin xilası naminə hərəkat”ın nümayəndələri bu günlərdə baş nazirin hakimiyyətdən kənarlaşdırılması üçün ölkədə vətəndaş itaətsizliyi və kütləvi etiraz aksiyalarının geniş şəkildə davam etdiriləcəyini bəyan ediblər. Belə ki, müxalifət Gümrü, Sünik və Vanadzor vilayətlərində vətəndaş itaətsizliyi aksiyaları təşkil etməyi planlaşdırır.
Qeyd edək ki, baş nazirin Moskvaya səfər etməsi də həm ölkə əhalisi, həm də Rusiyadakı ermənilər tərəfindən birmənalı qarşılanmayıb. Yerli media yazır ki, paytaxt sakinləri baş nazirin hava limanına getməsinin qarşısını almaq üçün Yerevanda yolları bağlayıblar. “Panorama.am”ın məlumatına görə, Rusiyadakı erməni icması N.Paşinyanın Moskvaya səfərinə qarşı çıxıb. Belə ki, Rusiya erməniləri ittifaqının rəhbəri Ara Abramyan səfərdən öncə yaydığı bəyanatda Paşinyana çoxsaylı suallar ünvanlayıb. Erməni icmasının baş nazirin səfərini yox, istefasını gözlədiyini deyən A.Abramyanın sözlərinə görə, artıq iki aydır ki, Ermənistanda hüquqi müstəvidən kənarda fəaliyyət göstərən, dövlətlə, xalqla heç bir əlaqəsi olmayan və ölkədə yaxşılığa doğru heç bir dəyişiklik edə bilməyən Paşinyan bu səfərlə Rusiyadakı erməni icmasını təhqir edib. Yeri gəlmişkən, qeyd edək ki, “Tert.am”ın yazdığına görə, yanvarın 11-də Ermənistanın Rusiyadakı səfirliyi qarşısında N.Paşinyana qarşı etiraz aksiyası keçirilib. “Daşnaksutyun”un Moskva ofisinin rəhbəri Nerses Nersisyan Rusiyadakı erməni icmasının Paşinyanın istefası tələbi ilə imzatoplama kampaniyasına da başladığını deyib. Onun sözlərinə görə, pandemiya səbəbi ilə aksiyaya toplaşanların sayı az olsa da, Rusiyadakı ermənilərin hamısı Paşinyanın dərhal hakimiyyətdən getməsini tələb edir.
Qeyd edək ki, əksər yerli ekspertlər də ölkədəki acınacaqlı vəziyyətdən xilas yolunun N.Paşinyanın hakimiyyətdən uzaqlaşdırılmasında görürlər. Məsələn “News.am” yazır ki, polittexnoloq Karen Koçaryanın sözlərinə görə, hazırda cəmiyyətin yeganə vəzifəsi Paşinyanı hakimiyyətdən uzaqlaşdırmaq olmalıdır. Onun fikrincə, bütün uğursuzluqlardan sonra Paşinyan hakimiyyətdə qalmamalıdır: “Kimin baş nazir olacağı məni maraqlandırmır. Paşinyanın parlament sədri Ararat Mirzoyanla və ya 17 siyasi partiyanın dəstəklədiyi müxalifət namizədi Vazgen Manukyanla əvəzlənməsini istisna etmirəm”.
K.Koçaryanın fikrincə, savadsız və səriştəsiz bir insan olduğu üçün N.Paşinyanın hakimiyyətdə qalması Ermənistanı fəlakətə sürükləyir.
Göründüyü kimi, xaos və anarxiyanın mövcud olduğu məğlub ölkədə bütün səviyyələrdə hakimiyyətin istefası tələb olunur. Əksər ekspertlər də Ermənistanda mövcud olan siyasi, sosial-iqtisadi, hətta mənəvi-psixoloji böhrandan, eyni zamanda, xaos vəziyyətindən çıxmaq üçün hakimiyyətin dəyişməsini labüd hesab edirlər.
Qaşqay ZİYƏDDİNOĞLU

Paylaş:

Baxılıb: 777 dəfə