Dəqiq məqam, ideal məkan...

Bakı:

26 °C

63 %

11 m/s

Əlaqə

AZ RU EN

Ana səhifə / Siyasət / Dəqiq məqam, ideal məkan...

Dəqiq məqam, ideal məkan...

23.12.2023 [10:00]

Mübariz ABDULLAYEV

Xalqımız dekabrın 21-də tarixi hadisəyə şahidlik etdi. Həmin gün futbol üzrə Azərbaycan Kubokunun 1/8 final mərhələsində Ağdamın “Qarabağ” və Bakının MOİK komandaları üz-üzə gəldilər. Tarixi önəm daşıyan əsas məsələ isə bəhs olunan qarşılaşmanın Xankəndi stadionunda keçirilməsidir. İlk növbədə onu qeyd edək ki, “Qarabağ” - MOİK oyunu sıradan bir idman yarışması deyildi. Son 30 illik tariximizdə ilk dəfə idi ki, Azərbaycan idmançılarının iştirakı ilə Xankəndidə böyük təntənə yaşanırdı. Oyun üçün dəqiq məqam və ideal məkan seçilmişdi

Üç il və üç ay əvvəl

“Nəyi, necə, nə vaxt etmək lazımdır, bunu mən bilirəm. Yaxın tarix dəfələrlə bunu göstərib, həm siyasi müstəvidə, diplomatik müstəvidə, eyni zamanda, döyüş meydanında. Nəyi ediriksə, dəqiqliklə edirik”. Prezident İlham Əliyevin ifadə etdiyi bu fikirlər Onun çoxşaxəli fəaliyyətində qırmızı xətt kimi diqqət çəkir. Biz çox şahidi olmuşuq. Bəzən insanlar hansısa bir məsələnin həllində dözümsüzlük ortaya qoyurlar, dövlət başçısının tez qərar verməsini istəyirlər. Lakin İlham Əliyev strateji baxışlara malik siyasətçidir. O, həm də dövlət başçısı kimi üzərinə düşən məsuliyyəti yaxşı dərk edir. Buna görə də həmişə öz təbirincə - hər şeyi ölçüb-biçdikdən, bütün zəruri məqamları nəzərə aldıqdan sonra tələsmədən və gecikmədən qərarlarını verir, addımlarını atır. Bunun faydasını isə dövlətimiz və xalqımız görür və yüksək dəyərləndirir.

Təbii ki, “Qarabağ” - MOİK qarşılaşmasının uğurlu antiterror tədbirləri nəticəsində separatçılardan təmizlənən Xankəndinin stadionunda keçirlməsi təşəbbüsü bilavasitə Prezident İlham Əliyevdən gəlib. Dövlətimizin başçısı oyun başlamazdan öncə stadionda etdiyi çıxışında iki tarixi xüsusi qeyd edib. “İşğal edilmiş torpaqların böyük hissəsi üç il bundan əvvəl - İkinci Qarabağ müharibəsi nəticəsində işğalçılardan azad edildi. Qarabağın tacı olan Şuşa şəhərində Azərbaycan Bayrağı qaldırıldı. Üç ay bundan əvvəl - sentyabrın 19-20-də Xankəndi, Xocalı, Əsgəran, Xocavənd, Ağdərə rayonları da işğalçılardan azad edildi”, - deyə dövlətimizin başçısı vurğulayıb.

Üç il əvvələ qayıdaq. Müxtəlif auditoriyalarda İlham Əliyevdən dərhal müharibəyə başlamaq çağırışları edilirdi. İlham Əliyev isə populist çağırışlara məhəl qoymadı. Ərazi bütövlüyümüzün təmin olunması prioritetini ölkənin gündəliyinin mərkəzində saxlamaqla, diplomatik səyləri artırmaqla paralel şəkildə güclü potensial əsasında müasir Ordu formalaşdırıldı. Beləliklə, torpaqları işğaldan azad etmək üçün zaman yetişmişdi - həm cəmiyyətin əhval-ruhiyyəsi buna köklənmişdi, həm də Silahlı Qüvvələrimiz düşmənə sarsıdıcı zərbələr vurmağa hazır və qadir vəziyyətə gəlmişdi. Eyni zamanda, diplomatik müstəvidə beynəlxalq rəy Azərbaycanın xeyrinə dəyişmişdi. Prezident

İlham Əliyevin bu kimi zəruri məqamları nəzərə almaqla 2020-ci il sentyabrın 27-də keçmiş təmas xətti boyunca düşmənin genişmiqyaslı təxribatlarının qarşısının alınması ilə bağlı Orduya göstəriş verməsi özünü doğrultdu. Silahlı Qüvvələrimiz cəmi 44 gün ərzində düşməni kapitulyasiyaya məruz qoymaqla ərazi bütövlüyümüzün təmin edilməsinə nail oldu. Bax budur Liderin strateji düşüncəsi, imkanları və zamanı dəqiq uzlaşdırmaq məharəti!

İndi isə üç ay bundan əvvəl baş verənləri xatırlayaq. Müharibə başa çatandan sonra Ermənistan təxminən 15 minlik hərbi kontingentii ərazilərimizdə saxlamaqda davam edirdi. Bu dəfə də İlham Əliyev bütün tələsik çağırışlara məhəl qoymayaraq ən uyğun məqamın gəlməsini gözlədi və sentyabrın 19-da separatçıların yuva saldıqları ərazilərimizdə lokal xarakterli tədbirlərin həyata keçirilməsinə göstəriş verdi. Yenə də Qələbə sevinci yaşadıq.

Nə üçün Xankəndi?

Əlbəttə, “Qarabağ” - MOİK oyununu müxtəlif məkanlarda keçirmək mümkün idi. Necə ki, indiyədək belə edilirdi. Ancaq Prezident İlham Əliyevin təşəbbüsü əsasında bu qarşılaşma məhz Xankəndidə keçirildi. Dövlətimizin başçısı çıxışında bildirib ki, bu futbol matçının Xankəndidə keçirilməsinin çox böyük mənası var.

Xankəndi qədim Azərbaycan diyarıdır. Onun təməli Qarabağ xanı tərəfindən qoyulub. Sonrakı dövrdə Azərbaycan Respublikasının vəsaiti hesabına memarlarımız və inşaatçılarımız tərəfindən burada böyük şəhər yaradılıb. Xankəndinə ermənilər məkrli qüvvələr tərəfindən məqsədli şəkildə köçürülüblər. Ona verilən “Stepanakert” adı da tamam qondarma idi. Dövlət başçısının vurğuladığı kimi, əfsuslar olsun ki, 30 il ərzində bu şəhərdə separatçılar yuva salmışdılar. Xankəndi separatizmin rəmzinə çevrilmişdi. Cəmi 23 saat davam edən antiterror tədbirləri nəticəsində şanlı Azərbaycan Ordusu qarşı tərəfə və bütün dünyaya sübut etdi ki, Xankəndi tarixi, əzəli Azərbaycan ərazisidir. Bundan sonra burada separatizmə heç vaxt yer olmayacaq, şəhərin üzərində Azərbaycan Bayrağı əbədiyyətə qədər dalğalanacaq!

Paylaş:

Baxılıb: 659 dəfə