Qubadlı rayonunun ictimaiyyəti 1992-ci ilin 6 avqustunda ölməzlik zirvəsinə yüksəlmiş 12 şəhidin anım mərasimini keçirib

Bakı:

25 °C

47 %

5 m/s

AZ RU EN

Ana səhifə / Sosial / Qubadlı rayonunun ictimaiyyəti 1992-ci ilin 6 avqustunda ölməzlik zirvəsinə yüksəlmiş 12 şəhidin anım mərasimini keçirib

Qubadlı rayonunun ictimaiyyəti 1992-ci ilin 6 avqustunda ölməzlik zirvəsinə yüksəlmiş 12 şəhidin anım mərasimini keçirib

07.08.2014 [09:48]

Dünən Qubadlı rayon İcra Hakmiyyətinin təşkilatçılığı ilə Şəfa sanatoriyasının mərasim evində rayonun 6 avqust 1992-ci il tarixində ölməzlik zirvəsinə yüksəlmiş 12 nəfər şəhidinin anım mərasimi keçirilib. Tədbirdə Qubadlı rayon İcra Hakimiyyətinin (RİH) başçısı Malik İsaqov, Milli Məclisin deputatı İmanverdi İsmayılov, Qubadlı RİH-nin məsul işçiləri, hüquq-mühafizə orqanlarının, idarə, müəssisə və təşkilatların rəhbərləri, respublikanın digər dövlət orqanlarının nümayəndələri, ictimaiyyət nümayəndələri və şəhid ailələri iştirak ediblər. Tədbirdən öncə şəhidlərin məzarları ziyarət edilib, gül dəstələri qoyulub, Azərbaycan dövləti və xalqı uğrunda canından keçmiş bütün şəhidlərin xatirəsi bir dəqiqəlik sükutla yad edilib. Daha sonra şəhidlərin keçdiyi şərəfli ömür yolundan bəhs edən videomaterial nümayiş etdirilib.
Anım mərasimində çıxış edən Qubadlı rayon İcra Hakimiyyətinin başçısı Malik İsaqov bildirib ki, Qubadlı rayonu 5 ilə yaxın Ermənistan təcavüzkarlarına qarşı mərdliklə mübarizə aparıb. Bu mübarizədə 238 nəfər Qubadlı sakini şəhid olub, 200 nəfərə yaxını ağır yaralanıb, 316 nəfər əlil olub, 100 nəfərdən çoxu itgin düşüb. Şəhidlərdən 8-i Azərbaycanın Milli Qəhrəmanı adı ilə təltif olunublar.
Vurğulanıb ki, torpaqlarımızın müdafiəsi zamanı rayonun Qaracallı kənd ərazi nümayəndəliyinin sakinləri də fədakarlıq nümayiş etdiriblər. Təkcə bir döyüşdə -1992-ci ilin avqust ayının 6-da Laçın rayonunun Qızartı və Susuzdağ yüksəklikləri uğrunda gedən döyüşlərdə şəhid olan 12 nəfərdən 9 nəfəri bu nümayəndəliyin sakinidir. Həmin şəhidlərin 8-i bir kənddən-Qarağaclı kəndindəndir. Bu döyüşlərdə şəhid olanların 4 nəfəri Azərbaycanın Milli Qəhrəmanı adına layiq görülüb.
M.İsaqov bildirib ki, şəhid ailələrinə qayğı hər zaman dövlətimizin və Prezident İlham Əliyevin diqqət mərkəzindədir. Son illər respublikamızda şəhid ailələrinin sosial müdafiəsinin gücləndirilməsi, onların mənzil-məişət şəraitinin yaxşılaşdırılmasına yönəlmiş tədbirlər bunun bariz nümunəsidir.
Tədbirdə çıxış edən digər şəxslər, o cümlədən, şəhidlərin ailə üzvləri vətənpərvərliyin gücləndirilməsi yönündə belə tədbirlərin təşkilini vacib sayıblar. Bundan başqa, rayon ictimaiyyətinin nümayəndələri Azərbaycan dövlətinin şəhid ailələrinə göstərdiyi qayğıdan razılıqlarını ifadə ediblər.
Daha sonra tədbir ədəbi-bədii kompozisiya ilə davam etdirilib.
Pərviz SADAYOĞLU

Paylaş:

Baxılıb: 1057 dəfə