Bakı Atatürk Liseyi yeni tədris ilinə də böyük ruh yüksəkliyi ilə başlayıb

Bakı:

25 °C

46 %

6 m/s

Əlaqə

AZ RU EN

Ana səhifə / Sosial / Bakı Atatürk Liseyi yeni tədris ilinə də böyük ruh yüksəkliyi ilə başlayıb

Bakı Atatürk Liseyi yeni tədris ilinə də böyük ruh yüksəkliyi ilə başlayıb

16.09.2014 [09:36]

Ali Devrim: Əsas məqsədimiz şagirdlərimizi müasir dünyanın tələblərinə cavab verən, savadlı, həmçinin, Ümummilli liderimiz Heydər Əliyevin bizlərə tövsiyə etdiyi kimi, azərbaycançılıq ruhunda yetişdirməkdir
“Hər zaman olduğu kimi, bu il də əsas məqsədimiz şagirdlərimizi müasir dünyanın tələblərinə cavab verən, savadlı, Azərbaycan dövlətinə və xalqına layiqli vətəndaş olmaq, həmçinin, Ümummilli liderimiz Heydər Əliyevin bizlərə tövsiyyə etdiyi kimi, azərbaycançılıq ruhunda yetişdirməkdir”. Bunu yeni dərs ilinin başlanması ilə əlaqədər qəzetimizə açıqlamasında Türk Dünyası Araşdırmaları Vəqfi Bakı Atatürk Liseyinin direktoru Ali Devrim deyib.
Bu məktəbin rəhmətlik Turan Yazqanın bir yadigarı olduğunu deyən Ali Devrim onun arzularının yaşaması üçün əllərindən gələni etdiklərini bildirib: “Rəhmətlik Turan Yazqan hocamız Bakı Atatürk Liseyinə xüsusi bir önəm verirdi. O, Bakı Atatürk Liseyindən “göz bəbəyim” deyə bəhs edirdi. İnsanlar beyinsiz yaşaya bilmədikləri kimi millətlərin də təhsilsiz var olmaları mümkün deyil. Yəni millətin beyni təhsildir. Bu səbəbdən də təhsilə nə qədər çox önəm verilsə belə yenə də azdır. Təhsil millətin gələcəyidir. Gələcəyimizin var olması üçün mütləq təhsil almaq lazımdır. Biz Bakı Atatürk Liseyi olaraq yetişdirdiyimiz gəncləri Azərbaycanın gələcəyi olaraq görürük. Və bu sahədə əlimizdən gələni etməyə çalışırıq”.
Direktorun sözlərinə görə, 1992-ci ildən Bakıda fəaliyyət göstərən Türk Dünyası Araşdırmaları Vəqfi Bakı Atatürk Liseyi bu günə qədər öz fəal və bacarıqlı məzunları ilə seçilib. Eyni zamanda, başa çatan tədris ili də bu baxımdan uğurlu və yaddaqalan olub. Belə ki, 2013-2014-cü tədris ilində Bakı Atatürk Liseyindən məzun olan 30 şagirdin hamısı ali məktəblərə qəbul olub: “Məzunlarımızdan 13-ü TQDK-nın imtahanlarında iştirak edib və 400-677 arası bal toplayaraq Azərbaycanın ən yaxşı universitetlərinə qəbul olublar. Bir məzunumuz ABŞ-da təqaüdlə oxuma haqqını qazanıb. Digər məzunlarımız isə Türkiyənin müxtəlif universitetlərində ali təhsil almaq hüququna sahib olublar”.
Məhz bu uğurların fonunda yeni tədris ilinə də böyük ruh yüksəkliyi ilə başladıqlarını deyən direktor “2013-2014-cü tədris ili bitdikdən sonra dərhal 2014-2015-ci tədris ilinin hazırlıqlarına başladıq. Əvvəlcə məktəbimizi təmir etdirdik, çatışmazlıqları aradan qaldırdıq. Siniflərdə elektron lövhələr quraşdırdıq. 2014-2015-ci tədris ilinin planını hazırladıq. Müəllimlərimizin tədris texnologiyası və tədris-təlim metodları haqqında biliklərini yeniləmək məqsədi ilə seminar təşkil etdik”, sözlərini əlavə edib.
Bundan başqa, bu il, eyni zamanda, liseyin məktəbli geyimində də dəyişiklik edilib. Ancaq bu dəyişiklik hələlik ikinci növbə təhsil alan şagirdlərə tətbiq edilib. Gələcəkdə isə məktəbin bütün şagirdlərinin pillə-pillə bu geyim formasına keçəcəyi nəzərdə tutulub.
İkinci növbə təhsildən söz düşmüşkən, direktorun sözlərinə görə, məktəbdə təhsilin iki növbəli olmasının başlıca səbəbi bina problemidir: “Məktəbimizin ən böyük problemi həqiqətən də bina ilə əlaqədardır. Binamızın yetərli olmamasına görə məktəbimizə olan tələbatı qarşılamaqda çətinlik çəkirik. Bildiyiniz kimi, bu səbəbdən məktəbimizdə dərslər iki növbədə keçirilir. Bu isə həm bizlər, həm də şagirdlər üçün çətinliklər yaradır. Şagirdlərimizin daha yaxşı bir binada təhsil almalarını arzu edirik. Bununla əlaqədar işlərimizi davam etdiririk. Təhsil Nazirliyinə də bununla bağlı müraciət etmişik. Bundan əlavə özümüz də yeni bina axtarırıq. Bu il olmasa da, gələcək tədris illərində bu problemimizin həll olunacağına ümid edirik”.
Nadir AZƏRİ

Paylaş:

Baxılıb: 1303 dəfə