Bakı Dövlət Universitetində keçirilən beynəlxalq konfransa 170-dən çox məruzə təqdim edilib

Bakı:

26 °C

64 %

10 m/s

Əlaqə

AZ RU EN

Ana səhifə / Sosial / Bakı Dövlət Universitetində keçirilən beynəlxalq konfransa 170-dən çox məruzə təqdim edilib

Bakı Dövlət Universitetində keçirilən beynəlxalq konfransa 170-dən çox məruzə təqdim edilib

06.05.2015 [10:04]

Mayın 5-də Bakı Dövlət Universitetində (BDU) “Heydər Əliyevin Azərbaycan Respublikasının hüquq elminin və təhsilinin inkişafında rolu” mövzusunda beynəlxalq elmi-praktik konfrans işə başlayıb.
AZƏRTAC xəbər verir ki, Ümummilli lider Heydər Əliyevin anadan olmasının 92-ci ildönümünə həsr edilmiş konfransda çıxış edən BDU-nun rektoru, Milli Məclisin deputatı, akademik Abel Məhərrəmov görkəmli dövlət xadimi Heydər Əliyevin vətən və xalq qarşısındakı tarixi xidmətlərindən, Azərbaycan hüquq elminin və təhsilinin inkişafındakı böyük rolundan danışıb. Konfransda xarici ölkələrdən olan alimlərin iştirakını yüksək dəyərləndirən rektor bölmə iclaslarında mövzuya dair mühüm məruzələrin dinləniləcəyini, hüquq sistemi, hüquq elmi və təhsilinin inkişafı ilə bağlı müzakirələrin aparılacağını bildirib, iştirakçılara uğurlar arzulayıb.
BDU-nun hüquq fakültəsinin dekanı, professor Əmir Əliyev altı bölmə üzrə keçirilən konfransa Azərbaycandan və müxtəlif ölkələrdən 170-dən çox məruzənin təqdim edildiyini diqqətə çatdırıb. Sonra Ə.Əliyev fakültənin təsis etdiyi “Tələbə hüquq jurnalı”nın birinci buraxılışını təqdim edib. Məlumat verilib ki, jurnalda tələbələrin məqalələrinə geniş yer ayrılir və ən yaxşı məqalənin müəllifləri mükafatlandırılır.
Konfransda ilk olaraq Kiyev Milli Aviasiya Akademiyasının professoru, Ukraynanın Əməkdar elm xadimi Arif Quliyevin “Söz Heydər Əliyevin ən güclü silahıdır” mövzusunda məruzəsi dinlənilib. Qeyd edilib ki, Azərbaycan xalqının Ümummilli lideri Heydər Əliyev bütün sahələrdə, o cümlədən ana dilimizin inkişafında, təbliğində həmişə örnək olub. O, hər bir auditoriyanın səviyyəsini məharətlə müəyyənləşdirir, nitqini buna uyğun qururdu. Azərbaycan dilini qoruyub saxlamaq, inkişaf etdirmək onun həyat amalı idi. Ulu öndər Azərbaycan dilinə xalqımızın əvəzsiz tarixi sərvəti kimi yanaşırdı. Heydər Əliyevin işlətdiyi sözlər, ifadələr, cümlələr, söz və cümlələrin sıralanması, sözə və ifadəyə xüsusi məna verməsi, fikirlərini çox sadə, anlaşıqlı tərzdə çatdırması müdrik dövlət xadiminin başlıca silahı idi. Bu mənada O, ən məşhur natiqləri belə heyran qoyurdu.
Sonra Ukrayna Milli Elmlər Akademiyasının həqiqi üzvü, professor Oleq Zayçuk, ABŞ-ın Tuleyn Universiteti Hüquq Məktəbinin dekanı, professor Martin Davies, Andjey Modjevski adına Krakov Akademiyasının professoru Aleksandr Merejko (Polşa), Ukrayna Dövlət Vergi Xidməti Milli Universitetinin professoru Leonid Timçenko, BDU-nun hüquq fakültəsinin dekanı, professor Əmir Əliyev məruzələrlə çıxış ediblər.
Konfransda, həmçinin Kiyev Milli Aviasiya Universitetinin professoru Arif Quliyevin “Ukrayna-Azərbaycan münasibətləri: hüquq, siyasət, diplomatiya” kitabının ikinci cildinin təqdimatı keçirilib. Çıxış edənlər kitabın məziyyətlərindən danışıb, nəşrin Ukrayna ilə Azərbaycan arasında dostluq münasibətlərinin inkişafına töhfə verəcəyinə əminliklərini bildiriblər.
Daha sonra beynəlxalq konfrans işini “İnsan hüquqları”, “Avropa hüququ”, “Beynəlxalq hüquq”, “Dövlət və hüquq nəzəriyyəsi və tarixi, konstitusiya hüququ”, “Cinayət hüququ, cinayət prosesi, kriminalistika və məhkəmə ekspertizası”, “Mülki hüquq, mülki proses və kommersiya hüququ, əmək və ekologiya hüququ” bölmələri üzrə davam etdirib.
Bölmə iclaslarında “XXI əsr və insan hüquqlarına yeni yanaşmalar”, “Avropa cinayət hüququnun aktual problemləri”, “Beynəlxalq nəzarətin forma və metodları”, “Konstitusiyanın sosial-siyasi mahiyyəti və funksiyaları”, “Heydər Əliyevin ideyaları gələcəyimizin və inkişafımızın qarantıdır” və digər mövzularda məruzələr dinlənilərək müzakirə olunub.
Konfrans mayın 6-da işini bölmə iclasları ilə davam etdirəcək.

Paylaş:

Baxılıb: 893 dəfə