Prezident İlham Əliyevin namizədliyinin irəli sürülməsi bütövlükdə Azərbaycan cəmiyyətinin rəyinin ifadəsidir

Bakı:

4 °C

87 %

10 m/s

AZ RU EN

Ana səhifə / YAP xəbərləri / Prezident İlham Əliyevin namizədliyinin irəli sürülməsi bütövlükdə Azərbaycan cəmiyyətinin rəyinin ifadəsidir

Prezident İlham Əliyevin namizədliyinin irəli sürülməsi bütövlükdə Azərbaycan cəmiyyətinin rəyinin ifadəsidir

21.06.2013 [01:27]

Yeni Azərbaycan Partiyasının Sədr müavini-İcra katibi Əli Əhmədov partiyanın Qaradağ rayon təşkilatının ərazi ilk təşkilatlarının sədrləri ilə görüşüb
İyunun 20-də Yeni Azərbaycan Partiyası (YAP) Sədrinin müavini - İcra katibi, Milli Məclisin deputatı Əli Əhmədov partiyanın Qaradağ rayon təşkilatının ərazi ilk təşkilatlarının sədrləri ilə görüşüb. Lökbatan qəsəbəsində Heydər Əliyev Mərkəzində baş tutan görüşdə YAP-ın Sədr müavini Əli Əhmədov deyib ki, partiyanın ilk təşkilatları ilə görüşlər mütəmadi olaraq keçirilir və bundan əvvəl bir sıra rayonlarda da belə görüşlər keçirilib. İyun ayının 7-də Yeni Azərbaycan Partiyasının V Qurultayının keçirildiyini xatırladan Əli Əhmədov deyib ki, Qurultayda bir sıra mühüm qərarlar qəbul olunub. Qurultay Yeni Azərbaycan Partiyasının, o cümlədən, bütövlükdə xalqımızın namizədini rəsmi şəkildə təsdiq edib.
YAP İcra katibi Əli Əhmədov vurğulayıb ki, bu cür görüşlərin keçirilməsində məqsəd Yeni Azərbaycan Partiyasının qarşıdan gələn prezident seçkiləri kampaniyasının yüksək səviyyədə keçirilməsinə ilk təşkilatlarımızı və onların rəhbərlərini səfərbər etməkdir: “Məmnunluq hissi ilə qeyd etmək istəyirəm ki, Yeni Azərbaycan Partiyası ötən illər ərzində keçirilən bütün seçkilərdə uğurlar qazanıb və böyük seçki kampaniyasını yüksək səviyyədə keçirməkdən ibarət olan zəngin təcrübə toplayıbdır. Bir çox həlledici səbəblərlə yanaşı, eyni zamanda, Yeni Azərbaycan Partiyasının bütövlükdə mənimsədiyi böyük və zəngin təcrübə seçki kampaniyasının yüksək səviyyədə keçirilməsinə inamımızı artırır. Hər birinizə məlum olduğu kimi, Azərbaycan cəmiyyətinin seçkiqabağı ovqatı Prezident İlham Əliyevin namizədliyinin irəli sürülməsi ilə müəyyənləşibdir. Əslində, Prezident İlham Əliyevin namizədliyinin irəli sürülməsi bütövlükdə Azərbaycan cəmiyyətinin rəyinin ifadəsi idi. Eyni zamanda, bu, bütün Azərbaycan xalqının və Azərbaycan vətəndaşlarının seçkiöncəsi ovqatını əks etdirir”.
Seçkiöncəsi ovqatın məhz bu duyğular əsasında köklənməsinin səbəbləri haqqında danışan YAP-ın Sədr müavini Əli Əhmədov deyib ki, bu, ölkəmizdə Prezident İlham Əliyevin rəhbərliyi altında 10 il ərzində həyata keçirilən böyük işlər və onların nəticələrinə Azərbaycan vətəndaşlarının verdiyi qiymətlə əlaqədardır. İnsanlar Prezident İlham Əliyevin rəhbərliyi altında bu illər ərzində Azərbaycanın böyük inkişaf yolu keçdiyini birmənalı şəkildə etiraf edirlər. “Həqiqətən, güman edirəm ki, sizin hər biriniz də, tək Yeni Azərbaycan Partiyasının fəalları kimi deyil, həm də xüsusilə Azərbaycan vətəndaşları olaraq, ölkəmizdə son illər ərzində iqtisadiyyatdan tutmuş, həyatın bütün sahələrində nə qədər böyük dəyişikliklərin baş verdiyinin bilavasitə şahidlərisiniz. Bu dəyişikliklər bizim hamımızın həyatımızı dəyişdirib, həyatımıza yeni çalarları gətirib, həyatımızın mənası daha da zəngin olubdur. Əgər biz 10 il bundan əvvəlki Azərbaycanla bugünkü Azərbaycanı müqayisə etsək, eynilə, 10 il bundan əvvəlki həyatımızla bugünkü həyatımızın mənasını təşkil edən məqamları müqayisə etsək, nə qədər böyük dəyişikliklərin baş verdiyinin şahidi olarıq. Bu illər ərzində Azərbaycan iqtisadiyyatı 3 dəfə inkişaf edib, insanlarımızın rifah halında ciddi dəyişikliklər baş verib, ölkəmizdə böyük yeniləşmə, modernləşmə siyasəti həyata keçirilməkdədir ki, bu siyasətin də məqsədi Azərbaycanı müasir dünyanın ən qabaqcıl dövlətlərindən birinə çevirməkdən ibarətdir. Şəhərlərimizin, kəndlərimizin simasının dəyişməsi, müasirləşməsi, yeniləşməsi həm Azərbaycanı dünyanın müasir dövlətlərindən birinə çevirir, onun ikinci daha mühüm əhəmiyyəti ondan ibarətdir ki, insanlarımızın həyatı dəyişir, yeniləşir. İstər əməkhaqlarının artması, pensiyaların, təqaüdlərin artması, istər əhalinin ümumi gəlirlərinin yüksəlməsi bütövlükdə insanlarımızın rifahını xeyli yaxşılaşdırır”, - deyə Yeni Azərbaycan Partiyasının Sədr müavini qeyd edib.
Yeni Azərbaycan Partiyasının Sədr müavini - İcra katibi Əli Əhmədov daha sonra qarşıda duran məqsədlər və görüləcək işlərlə bağlı ətraflı danışıb, həmçinin, ərazi ilk partiya təşkilatlarının sədrlərinə müvafiq tövsiyə və göstərişlərini verib.
Aqşin ŞAHİNOĞLU

Paylaş:

Baxılıb: 1339 dəfə