Azərbaycan–Qazaxıstan əlaqələrinin yeni dövrü

Bakı:

20 °C

51 %

0 m/s

Əlaqə

AZ RU EN

Ana səhifə / YAP xəbərləri / Azərbaycan–Qazaxıstan əlaqələrinin yeni dövrü

Azərbaycan–Qazaxıstan əlaqələrinin yeni dövrü

22.10.2025 [12:29]

18 oktyabr 2025-ci il tarixində Prezident İlham Əliyevin Qazaxıstanın nüfuzlu dövlət xəbər agentliklərindən biri olan "Kazinform" a verdiyi geniş müsahibə, Azərbaycan–Qazaxıstan əlaqələrinin dərinliyi və gələcək istiqamətləri baxımından xüsusi əhəmiyyət kəsb edir. Müsahibə həm regional inteqrasiya, həm də türkdilli dövlətlər arasında münasibətlərin möhkəmləndirilməsi baxımından mühüm mesajlar ehtiva edir.

Prezident İlham Əliyevin səfəri ərəfəsində verilən bu müsahibə, yalnız diplomatik münasibətlərin deyil, həm də iqtisadi, mədəni və geosiyasi əməkdaşlığın dərinləşməsinin göstəricisidir.

Prezident İlham Əliyev müsahibədə vurğulayıb ki, Azərbaycan ilə Qazaxıstan arasındakı münasibətlər "yüksək dərəcədə güclü və qarşılıqlı etimada əsaslanır." Dövlət başçısı qeyd edir ki, bu münasibətlər "yalnız dövlətlərarası deyil, eyni zamanda xalqlarımız arasında qardaşlıq əlaqələri üzərində qurulub."

Prezident İlham Əliyev müsahibədə bildirib ki, son 3 il ərzində Qazaxıstana yeddi dəfə səfər edib. Bu tezlik, ölkələr arasındakı əlaqələrin intensivliyini və siyasi dialoqun səmərəliliyini sübut edir.
"Qazaxıstan bizim üçün nəinki dost, həm də ən yaxın qardaş dövlətdir. İkitərəfli münasibətlərimiz regionda sabitliyin mühüm sütunlarından biridir."-deyə Dövlətimizin başçısı əlavə edib.

Bu məqam Azərbaycan və Qazaxıstanın Türk Dövlətləri Təşkilatı (TDT) çərçivəsində oynadığı rolu da ön plana çıxarır. Liderlərarası münasibətlərin səmimiyyəti və qarşılıqlı hörmət, TDT-nin gələcəkdə daha da güclənməsinə zəmin yaradır.

Prezident Əliyev iqtisadi münasibətlərin dinamik artımını vurğulayaraq qeyd edib ki, 2024-cü ildə Azərbaycan və Qazaxıstan arasında ticarət dövriyyəsi 470 milyon ABŞ dolları təşkil edib. 2025-ci ilin yalnız ilk 8 ayında bu rəqəm 547 milyon dollara çataraq üç dəfəyə yaxın artım nümayiş etdirib.

Bundan əlavə, Azərbaycan tərəfindən Qazaxıstan iqtisadiyyatına 225 milyon ABŞ dolları məbləğində investisiya yatırıldığı, Qazaxıstanın isə Azərbaycana 136 milyon dollar sərmayə qoyduğu bildirilir. Bu göstəricilər, iki ölkə arasında iqtisadi əməkdaşlığın sabit və güclü əsaslar üzərində qurulduğunu sübut edir. Bu əməkdaşlıq yalnız ticarətlə məhdudlaşmır, eyni zamanda infrastruktur, enerji və nəqliyyat-logistika sahələrində də böyük potensial daşıyır. Xüsusilə “Orta Dəhliz” (Transxəzər Beynəlxalq Nəqliyyat Marşrutu) layihəsi çərçivəsində Azərbaycan və Qazaxıstanın rolu ön plana çıxır.

Müsahibədə Prezident İlham Əliyev mədəni-humanitar sahədə də əlaqələrin dərinləşməsindən bəhs edib. O xatırladıb ki, 2023-cü ildə Azərbaycanda Qazaxıstan Mədəniyyəti Günləri, 2024-cü ildə isə Qazaxıstanda Azərbaycan Mədəniyyəti Günləri uğurla təşkil olunub.

Bu tədbirlər yalnız mədəniyyətin təbliği baxımından deyil, həm də ortaq türk kimliyinin yaşadılması və gələcək nəsillərə ötürülməsi baxımından mühüm rol oynayır. Azərbaycan Prezidenti vurğulayır:
"Xalqlarımız arasında mədəni yaxınlıq bizim birliyimizin təməlini təşkil edir. Türk mədəniyyəti və dili ortaq tariximizin daşıyıcısıdır."

TURKSOY və Türk Akademiyası kimi təşkilatların dəstəklədiyi layihələr, bu birliyin davamlı inkişafına xidmət edir.

Prezident Əliyev müsahibəsində Xəzər dənizinin səviyyəsinin aşağı düşməsi ilə bağlı narahatlığını da dilə gətirib. O qeyd edib ki, bu proses yalnız ətraf mühit üçün deyil, həm də iqtisadi fəaliyyətlər – xüsusilə nəqliyyat və enerji infrastrukturu üçün ciddi təhdid yaradır.

Bu baxımdan, Prezident bütün sahilyanı ölkələri birgə əməkdaşlığa və elmi əsaslı qərarlar verməyə çağırıb: "Ekoloji problemlər milli sərhəd tanımır. Xəzər problemi bizim ortaq məsuliyyətimizdir." Bu çağırış, Azərbaycanın ekoloji diplomatiyada da fəal mövqe tutmaq niyyətini göstərir.

Prezident İlham Əliyevin “Kazinform” agentliyinə verdiyi müsahibə, Azərbaycan və Qazaxıstan münasibətlərinin yalnız keçmişə söykənən dostluq üzərində deyil, həm də konkret iqtisadi və geosiyasi maraqlar çərçivəsində dərinləşdiyini göstərir.

Artan ticarət dövriyyəsi, qarşılıqlı sərmayələr, mədəni tədbirlər və regional ekoloji çağırışlara verilən ortaq reaksiyalar – bütün bunlar iki ölkə arasında strateji tərəfdaşlığın və türk dünyasında birliyin simvolu kimi çıxış edir.

Bu müsahibə həm də onu göstərir ki, Azərbaycan–Qazaxıstan münasibətləri yalnız bugünkü reallıqlar üçün deyil, uzunmüddətli regional sabitlik və rifah üçün də mühüm rol oynamaqdadır.

Sahib Şükürov

YAP Göyçay rayon təşkilatının sədri

Paylaş:

Baxılıb: 412 dəfə