Dövlət idarəçiliyində cavabdehlik və xalqa xidmət prinsipi: Prezident İlham Əliyevin mesajları

Bakı:

25 °C

64 %

5 m/s

AZ RU EN

Ana səhifə / YAP xəbərləri / Dövlət idarəçiliyində cavabdehlik və xalqa xidmət prinsipi: Prezident İlham Əliyevin mesajları

Dövlət idarəçiliyində cavabdehlik və xalqa xidmət prinsipi: Prezident İlham Əliyevin mesajları

17.11.2025 [18:01]

Azərbaycan Respublikasının Prezidenti İlham Əliyevin 12 noyabr tarixində icra hakimiyyəti rəhbərliyinə yeni təyinat alan şəxslərlə görüşü ölkədə dövlət idarəçiliyinin əsas istiqamətlərinin müəyyən olunması baxımından mühüm əhəmiyyət kəsb edir. Bu görüş yalnız yeni təyinatların elan olunması deyil, həm də idarəçilikdə strateji yanaşmanın, müasir tələblərin və vəzifə məsuliyyətinin daha yüksək səviyyədə formalaşdırılması üçün mühüm mesajların verilməsi ilə yadda qaldı. Prezident İlham Əliyev tərəfindən bölgələrə təyin olunan rəhbərlərə konkret tapşırıqlar verilməsi, dövlətin məmur siyasətinin əsas prinsiplərinin izah edilməsi həm real vəziyyətin qiymətləndirilməsinə, həm də gələcək fəaliyyət istiqamətlərinin müəyyənləşdirilməsinə xidmət edir.

Prezident İlham Əliyev çıxışında bildirdi ki, rəhbər vəzifələrə təyin olunan şəxslərə göstərilən etimad onların ölkəyə, xalqa və dövlətə vicdanla xidmət edəcəyinə inamdan irəli gəlir. Dövlət başçısı qeyd etdi ki, icra başçılarının fəaliyyəti birbaşa xalqla təmasda olmaqdan, insanların problemlərini öyrənib aradan qaldırmaqdan, sosial ədalət prinsipinə əsaslanmaqdan ibarət olmalıdır.

Məmur davranışı məsələsi Dövlət Başçısının çıxışında geniş şəkildə vurğulandı. Dövlət başçısı qeyd etdi ki, məmur təkcə vəzifə səlahiyyətlərində deyil, şəxsi həyatında və gündəlik davranışında da nümunə göstərməlidir. Onun yaxın qohumları belə cəmiyyətlə münasibətdə məsuliyyətli davranmalı, məmurun nüfuzuna xələl gətirəcək addımlardan çəkinməlidirlər. Təkəbbür, insanlardan uzaqlaşma, cəmiyyətdən yuxarıda dayanmaq cəhdi məmurun fəaliyyətinə mənfi təsir göstərən amillərdir və bu cür hallar dövlətin siyasətinə kölgə salır.

Prezident İlham Əliyev korrupsiya ilə mübarizə mövzusunda da qətiyyətli mövqeyini bir daha ortaya qoydu. Qanunsuz varlanmaya yol verən, zəbtçilik, torpaq kateqoriyalarının qanunsuz dəyişdirilməsi, qanunsuz tikililər kimi hallara yol açan məmurların artıq hüquqi məsuliyyətə cəlb edilməsi dövlətin prinsipial mövqeyinin göstəricisidir. Dövlət başçısı bildirdi ki, mərkəz tərəfindən qanunsuz göstərişlərin verilməsi illər öncə mövcud olsa da, aparılan kadr və struktur islahatları nəticəsində həmin hallar tamamilə aradan qaldırılıb. Bu, yerli rəhbərlərin öz fəaliyyətlərini şəffaf və qanun çərçivəsində qurması üçün geniş imkanlar yaradır.

Görüş zamanı bölgələrdə infrastrukturun inkişafı ilə bağlı görülmüş işlər geniş şəkildə xatırladıldı. Son illərdə elektrik enerjisi təminatı, magistral yolların tikintisi, kənd yollarının yenilənməsi, içməli su layihələrinin həyata keçirilməsi, sosial obyektlərin tikilməsi bölgələrin inkişafını sürətləndirən əsas amillər olmuşdur. Prezident İlham Əliyev vurğuladı ki, artıq Azərbaycan bölgələrində əsas infrastruktur layihələrinin əksəriyyəti başa çatdırılıb və bu da insanların rifahına birbaşa təsir edən faktordur.

Prezident İlham Əliyev məşğulluq məsələlərini yeni icra başçılarının qarşısında duran əsas vəzifələrdən biri kimi müəyyən etdi. Dövlətin sahibkarlığın inkişafına göstərdiyi dəstək, güzəştli kreditlər, özünüməşğulluq proqramları və yeni müəssisələrin yaradılması bölgələrdə işsizliyin azalmasına şərait yaradır. Lakin bu istiqamətdə yerli icra başçıları tərəfindən görüləcək işlər xüsusi əhəmiyyət daşıyır. İcra hakimiyyəti yerli iş adamlarına şərait yaratmalı, investisiya mühitini yaxşılaşdırmalı və özəl sektorun bölgələrdə inkişafına dəstək verməlidir.

Ekoloji tarazlıq məsələsi də Prezident İlham Əliyevin çıxışında geniş yer aldı. Bakı və Sumqayıtda illər öncə mövcud olan ekoloji problemlərin uğurla aradan qaldırılması nümunə kimi göstərildi. Bölgələrdə də təbiətin qorunması, çay məcralarının dəyişdirilməsinə, tikinti materiallarının qanunsuz hasilatına, ekoloji tarazlığa zərər vuran fəaliyyəti aradan qaldırmaq üçün ciddi nəzarətin tətbiq edilməsi tələb olunur.

Prezident İlham Əliyevin çıxışında səsləndirdiyi fikirlər dövlət idarəçiliyinin əsas istiqamətlərini müəyyənləşdirir: xalqa xidmət, şəffaflıq, sosial ədalət, qanunun aliliyi, məsuliyyət, korrupsiyaya qarşı barışmaz mövqe, ekoloji sabitlik və infrastrukturun davamlı inkişafı. Yeni icra başçılarının üzərinə düşən vəzifələr genişdir, lakin dövlət başçısının sərt və prinsipial mövqeyi göstərir ki, Azərbaycan idarəçilikdə yüksək standartlara doğru inamla irəliləməkdədir. Xalqın məmnuniyyətinin təmin edilməsi, yerli problemlərin operativ həlli və dövlət siyasətinə sədaqətli xidmət hər bir rəhbərdən tələb olunan əsas prinsiplərdir.

Abbas Pənahov,

Yeni Azərbaycan Partiyası Nəsimi rayon təşkilatının sədr müavini

Paylaş:

Baxılıb: 566 dəfə