Zəfərimizin və Qürurrumuzun Tarixi: 26 İyun – Azərbaycan Silahlı Qüvvələr Günü

Bakı:

24 °C

54 %

3 m/s

Əlaqə

AZ RU EN

Ana səhifə / YAP xəbərləri / Zəfərimizin və Qürurrumuzun Tarixi: 26 İyun – Azərbaycan Silahlı Qüvvələr Günü

Zəfərimizin və Qürurrumuzun Tarixi: 26 İyun – Azərbaycan Silahlı Qüvvələr Günü

23.06.2026 [12:19]

Azərbaycan xalqı hər il iyun ayının 26-da özünün ən şərəfli, qürurverici və müqəddəs bayramlarından birini – Silahlı Qüvvələr Gününü böyük ruh yüksəkliyi ilə qeyd edir. Bu tarixi gün sadəcə təqvimdəki bir bayram deyil, Azərbaycan ordusunun keçdiyi şanlı döyüş yolunun, xalqın öz ordusuna olan inamının və dövlətin sarsılmaz gücünün rəmzidir. Bu gün Azərbaycan Silahlı Qüvvələri ölkəmizin suverenliyinin, ərazi bütövlüyünün və müstəqilliyinin ən etibarlı təminatçısıdır. Azərbaycan ordusunun formalaşma tarixi 1918-ci ilə – Azərbaycan Xalq Cümhuriyyəti (AXC) dövrünə təsadüf edir. Şərqdə ilk demokratik respublika olan AXC-nin Nazirlər Şurasının 1918-ci il 26 iyun tarixli qərarı ilə ilk müntəzəm hərbi hissə – Əlahiddə Azərbaycan Korpusu yaradıldı. Elə həmin ilin avqustunda Hərb Nazirliyi təsis olundu, general Səməd bəy Mehmandarov və general-leytenant Əlağa Şıxlinski kimi peşəkar hərbçilər ordu quruculuğuna rəhbərlik etdilər. Lakin Cümhuriyyətin süqutundan sonra yarımçıq qalan bu şanlı tarix, uzun illər sonra xalqın Ümummilli Lideri Heydər Əliyevin uzaqgörən siyasəti sayəsində yenidən canlandırıldı. Ulu Öndərin 22 may 1998-ci il tarixli Sərəncamı ilə 26 iyun tarixi Azərbaycan Respublikasının Silahlı Qüvvələr Günü elan edildi. Bu qərar milli ordu quruculuğu ənənələrinə sadiqliyin və tarixi varisliyin ən bariz nümunəsi oldu. XXI əsrin müasir və qüdrətli ordusu bu gün Müzəffər Ali Baş Komandan İlham Əliyevin rəhbərliyi altında dünyanın ən güclü və müasir orduları sırasındadır. Aparılan köklü islahatlar, maddi-texniki bazanın ən son hərbi texnologiyalarla yenilənməsi, Quru Qoşunları, Hərbi Hava və Hava Hücumundan Müdafiə Qüvvələri, eləcə də Hərbi Dəniz Qüvvələrinin mükəmməl hazırlığı ordumuzu Qafqazın ən güclü hərbi qüvvəsinə çevirmişdir. Azərbaycan ordusu NATO standartlarına uyğunlaşdırılmış təlimləri, komando hərbi hissələrinin yaradılması və yüksək döyüş ruhu ilə istənilən xarici təhdidin qarşısını almağa tam qadirdir.

Azərbaycan Silahlı Qüvvələri özünün qüdrətini və sarsılmazlığını 2020-ci ilin payızında – 44 günlük Vətən müharibəsində bütün dünyaya nümayiş etdirdi. Ali Baş Komandanın əmri ilə əks-hücum əməliyyatlarına başlayan rəşadətli ordumuz, 30 ilə yaxın müddətdə işğal altında qalan torpaqlarımızı azad etdi. XXI əsrin müasir müharibə strategiyasını yazan ordumuz, Şuşa zəfəri başda olmaqla, hər bir kənd və şəhərimizin azad olunmasında misilsiz qəhrəmanlıq göstərdi. 2023-cü ilin sentyabrında keçirilən cəmi 23 saatlıq antiterror əməliyyatı isə ordumuzun peşəkarlığının zirvəsi oldu. Bu əməliyyat nəticəsində Azərbaycan özünün suverenliyini ölkənin bütün ərazilərində tam və qəti şəkildə bərpa etdi.

Biz bu günkü sülhü, sabitliyi və ərazi bütövlüyünü canından keçən şəhidlərimizə və sağlamlığını itirən qazilərimizə borcluyuq. Azərbaycan dövləti və xalqı hər bir əsgərin, zabitin şücaətini uca tutur, şəhidlərimizin əziz xatirəsini dərin ehtiramla yad edir. Onların qanı ilə yazılan bu tarix, gələcək nəsillər üçün ən böyük vətənpərvərlik məktəbidir. Ümummilli Lider Heydər Əliyev vurğulayırdı: "Ordu ölkəmizin, millətimizin, dövlətimizin müstəqilliyinin dayağıdır". Bu gün tam əminliklə demək olar ki, bu dayaq sarsılmazdır.

26 İyun Silahlı Qüvvələr Günü hər bir azərbaycanlı üçün qələbə, güvən və iftixar günüdür.

Bayramınız mübarək, Azərbaycan Əsgəri!

Nurəngiz Bədəlova

YAP Biləsuvar rayon təşkilatı 30 saylı şəhər ərazi partiya təşkilatının sədri

Paylaş:

Baxılıb: 57 dəfə