Azərbaycan–Avropa Komissiyası münasibətləri yeni strateji mərhələyə qədəm qoyur

Bakı:

24 °C

66 %

3 m/s

Əlaqə

AZ RU EN

Ana səhifə / YAP xəbərləri / Azərbaycan–Avropa Komissiyası münasibətləri yeni strateji mərhələyə qədəm qoyur

Azərbaycan–Avropa Komissiyası münasibətləri yeni strateji mərhələyə qədəm qoyur

07.07.2026 [10:48]

Toğrul Zeynalov

YAP Ağdam rayon təşkilatının əməkdaşı

Avropa Komissiyasının Prezidenti Ursula Fon der Lyayenin 1 iyul 2026-cı il tarixində Azərbaycana səfəri və Prezident İlham Əliyevlə keçirilən görüşlər iki tərəf arasında münasibətlərin dinamik inkişafının növbəti mühüm mərhələsi kimi qiymətləndirilir. Görüşdən sonra mətbuata verilən bəyanatda Prezident İlham Əliyev Azərbaycan ilə Avropa Komissiyası arasında formalaşmış qarşılıqlı etimada əsaslanan tərəfdaşlığın davamlı şəkildə inkişaf etdiyini vurğuladı. Dövlətimizin başçısı bildirdi ki, Azərbaycan və Avropa İttifaqı arasında əməkdaşlıq artıq yalnız enerji sahəsi ilə məhdudlaşmır, ticarət, nəqliyyat, logistika, yaşıl enerji, rəqəmsal inkişaf və regional əməkdaşlıq kimi istiqamətləri də əhatə edir. Prezident İlham Əliyevin qeyd etdiyi kimi, Avropa İttifaqı Azərbaycanın əsas ticarət tərəfdaşıdır və xarici ticarət dövriyyəsində mühüm paya malikdir. Bu fakt ölkəmizin Avropa iqtisadi məkanı ilə sıx əlaqələrinin göstəricisi olmaqla yanaşı, Azərbaycanın həyata keçirdiyi uğurlu iqtisadi islahatların, əlverişli investisiya mühitinin və beynəlxalq etimadın real nəticəsidir. Bu gün Azərbaycan öz milli maraqlarını qətiyyətlə qorumaqla yanaşı, beynəlxalq öhdəliklərinə də daim sadiq qalan, sözünə və imzasına etibar edilən etibarlı tərəfdaş kimi tanınır.

Prezident İlham Əliyevin bəyanatında xüsusi yer ayrılan məsələlərdən biri də enerji əməkdaşlığının yeni mərhələsi oldu. Azərbaycan uzun illərdir Avropanın enerji təhlükəsizliyinin təmin edilməsində mühüm rol oynayır və Cənub Qaz Dəhlizi vasitəsilə Avropa bazarlarına sabit təbii qaz tədarükünü uğurla həyata keçirir. Bununla yanaşı, dövlətimizin başçısı vurğuladı ki, Avropa Komissiyası ilə münasibətlərimizin yeni və perspektivli istiqaməti bərpaolunan enerji sahəsidir. Xəzər dənizinin zəngin külək enerjisi potensialı, ölkəmizin günəş enerjisi imkanları, Qarabağ və Şərqi Zəngəzurun yaşıl enerji zonası kimi inkişaf etdirilməsi Azərbaycanın gələcəyin enerji bazarında da mühüm mövqeyə sahib olacağını göstərir. Xarici investorların iştirakı ilə həyata keçirilən iri layihələr Azərbaycanın yaşıl enerji ixrac edən ölkəyə çevrilməsi istiqamətində mühüm addımların atıldığını təsdiqləyir. Eyni zamanda, Azərbaycan Avropa ilə Asiyanı birləşdirən Orta Dəhlizin əsas iştirakçılarından biri kimi beynəlxalq nəqliyyat və logistika sistemində də strateji mövqeyini daha da gücləndirir. Müasir limanlar, dəmir yolları və avtomobil magistralları ölkəmizin tranzit potensialını artıraraq Avropa ilə iqtisadi əməkdaşlığın yeni imkanlarını formalaşdırır.

Prezident İlham Əliyevin çıxışında diqqət çəkən mühüm məqamlardan biri də Azərbaycanın sülh gündəliyinə sadiqliyi ilə bağlı oldu. Dövlətimizin başçısı qeyd etdi ki, bu gün sülh Azərbaycan üçün artıq nəzəri anlayış deyil, real həyatın ayrılmaz hissəsinə çevrilməkdədir və ölkəmiz sülh şəraitində yaşamağı öyrənir. İşğaldan azad edilmiş ərazilərdə həyata keçirilən genişmiqyaslı bərpa və yenidənqurma işləri, "Böyük Qayıdış" proqramı çərçivəsində keçmiş məcburi köçkünlərin doğma torpaqlarına qayıdışı, yeni şəhər və kəndlərin salınması Azərbaycanın sülhə və inkişafa verdiyi önəmin ən parlaq təzahürüdür. Azərbaycan regional əməkdaşlığın, iqtisadi inteqrasiyanın və davamlı sabitliyin tərəfdarı kimi çıxış edir və bu istiqamətdə beynəlxalq tərəfdaşlarla konstruktiv dialoqu davam etdirir. Avropa Komissiyası ilə münasibətlərin yeni məzmun qazanması da məhz qarşılıqlı hörmət, etimad və ortaq maraqlara söykənən siyasətin nəticəsidir. Prezident İlham Əliyevin uzaqgörən və praqmatik xarici siyasəti sayəsində Azərbaycan bu gün həm Avropanın etibarlı enerji tərəfdaşı, həm mühüm nəqliyyat qovşağı, həm də regional sabitliyin təmin olunmasına töhfə verən nüfuzlu dövlət kimi tanınır. Bütün bunlar göstərir ki, Azərbaycan–Avropa Komissiyası münasibətlərinin qarşıdakı dövrdə daha da genişlənməsi və strateji tərəfdaşlığın yeni məzmunla zənginləşməsi üçün möhkəm siyasi iradə və etibarlı əsaslar mövcuddur.

Paylaş:

Baxılıb: 49 dəfə