Azərbaycan və Kamboca arasındakı əməkdaşlıqda yeni mərhələ

Bakı:

23 °C

83 %

4 m/s

Əlaqə

AZ RU EN

Ana səhifə / YAP xəbərləri / Azərbaycan və Kamboca arasındakı əməkdaşlıqda yeni mərhələ

Azərbaycan və Kamboca arasındakı əməkdaşlıqda yeni mərhələ

16.10.2026 [17:25]

Azərbaycan Respublikasının xarici siyasətində müxtəlif regionlarla əlaqələrin genişləndirilməsi, qarşılıqlı faydalı əməkdaşlığın inkişaf etdirilməsi mühüm yer tutur. Bu baxımdan Cənub-Şərqi Asiyanın dövlətlərindən biri olan Kamboca Krallığı ilə münasibətlərin möhkəmləndirilməsi xüsusi əhəmiyyət daşıyır. İki ölkə arasında siyasi dialoqun genişləndirilməsi, iqtisadi əlaqələrin inkişafı və innovativ idarəetmə təcrübəsinin bölüşdürülməsi əməkdaşlığın yeni istiqamətlərini formalaşdırır.

Azərbaycan ilə Kamboca arasında diplomatik münasibətlər 1994-cü il dekabrın 28-də qurulub. Ötən dövrdə tərəflər siyasi məsləhətləşmələr və qarşılıqlı təmaslar vasitəsilə əlaqələrin inkişafına töhfə veriblər. 2025-ci ildə keçirilən siyasi məsləhətləşmələr və 2026-cı ilin oktyabrında baş tutan yüksək səviyyəli görüşlər ikitərəfli münasibətlərin genişləndirilməsi baxımından əhəmiyyətli olub. Görüşlərdə ticarət, investisiya, enerji, təhsil, turizm və digər sahələrdə əməkdaşlıq imkanları müzakirə edilib, iqtisadi əlaqələrin hüquqi əsaslarının möhkəmləndirilməsinə yönələn sənədlər imzalanıb.

İqtisadi əməkdaşlığın genişləndirilməsi hər iki ölkə üçün yeni imkanlar yaradır. Ticarət dövriyyəsinin artırılması, sahibkarlar arasında birbaşa əlaqələrin qurulması, kənd təsərrüfatı, sənaye, rəqəmsal iqtisadiyyat və turizm sahələrində birgə layihələrin həyata keçirilməsi qarşılıqlı tərəfdaşlığın inkişafına xidmət edə bilər. Azərbaycanın enerji və infrastruktur sahələrində təcrübəsi, Kambocanın isə Cənub-Şərqi Asiya bazarlarına çıxış imkanları bu əlaqələrin genişləndirilməsi üçün əlverişli zəmin yaradır.

Azərbaycan–Kamboca münasibətlərinin diqqətçəkən istiqamətlərindən biri də “ASAN xidmət” modelinin Kambocada tətbiqi üzrə əməkdaşlıqdır. Azərbaycanın dövlət-vətəndaş münasibətlərində şəffaflıq, operativlik və vətəndaş məmnunluğu prinsiplərinə əsaslanan bu modeli ölkəmizin uğurlu idarəetmə təcrübələrindən biridir. 2025-ci ilin dekabrında tərəflər arasında əməkdaşlıq memorandumu imzalanıb, 2026-cı ildə isə modelin tətbiqi imkanları və praktiki addımlar müzakirə olunub. Bu əməkdaşlıq Kambocada dövlət xidmətlərinin əlçatanlığının artırılması, inzibati prosedurların sadələşdirilməsi və rəqəmsal həllərin genişləndirilməsi üçün imkanlar yaradır.

“ASAN xidmət” təcrübəsinin beynəlxalq səviyyədə paylaşılması Azərbaycanın innovativ dövlət idarəçiliyi sahəsində qazandığı nailiyyətlərin tanıdılması baxımından da əhəmiyyətlidir. Bu təşəbbüs Azərbaycanın yalnız iqtisadi və siyasi əlaqələrini deyil, institusional təcrübəsini də beynəlxalq tərəfdaşlarla bölüşdüyünü nümayiş etdirir.

Təhsil və humanitar sahələrdə əməkdaşlıq da ikitərəfli münasibətlərin inkişafında mühüm rol oynayır. Universitetlər və diplomatik təhsil müəssisələri arasında əlaqələrin genişləndirilməsi, mütəxəssis mübadiləsi və turizm sahəsində birgə təşəbbüslər xalqlar arasında qarşılıqlı anlaşmanın möhkəmlənməsinə kömək edə bilər. Beynəlxalq təşkilatlar çərçivəsində dialoq da tərəflərin ortaq maraqlarının uzlaşdırılması üçün əlavə imkanlar yaradır.

Azərbaycan–Kamboca münasibətləri siyasi dialoqdan iqtisadi tərəfdaşlığa, humanitar əlaqələrdən innovativ dövlət idarəçiliyinə qədər geniş sahələri əhatə edir. Xüsusilə “ASAN xidmət” modelinin Kambocada tətbiqi üzrə əməkdaşlıq Azərbaycanın beynəlxalq təcrübə mübadiləsində rolunu gücləndirən mühüm istiqamətdir. Mövcud razılaşmaların konkret layihələrlə davam etdirilməsi iki ölkə arasında əlaqələrin daha da möhkəmlənməsinə və yeni əməkdaşlıq imkanlarının reallaşmasına xidmət edə bilər.

Tural Sadıxov

YAP Culfa rayon təşkilatının mühasibi

Paylaş:

Baxılıb: 1 dəfə

Xəbər lenti

Hamısına bax