Azərbaycanın beynəlxalq mövqeyi və ədalət prinsipi

Bakı:

20 °C

73 %

7 m/s

Əlaqə

AZ RU EN

Ana səhifə / YAP xəbərləri / Azərbaycanın beynəlxalq mövqeyi və ədalət prinsipi

Azərbaycanın beynəlxalq mövqeyi və ədalət prinsipi

20.10.2026 [16:02]

Prezident İlham Əliyevin oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Görüşündə çıxışı Azərbaycanın xarici siyasət prioritetlərini, beynəlxalq münasibətlər sisteminə yanaşmasını və regional təhlükəsizliyə dair mövqeyini aydın şəkildə ortaya qoydu. Çıxışda beynəlxalq hüququn aliliyinin təmin edilməsi, dövlətlərin suverenliyinə hörmət və münaqişələrin həllində ikili standartların yolverilməzliyi əsas siyasi mesajlar kimi ön plana çıxdı.

Avropa ilə Asiyanın qovşağında yerləşən Azərbaycan bu gün təkcə coğrafi mövqeyi ilə deyil, həm də siyasi, iqtisadi, nəqliyyat və enerji əlaqələrinin inkişafına verdiyi töhfə ilə Avrasiya məkanında mühüm yer tutur. Ölkəmizin müstəqil xarici siyasəti dövlətlərin suveren bərabərliyi, ərazi bütövlüyü və daxili işlərinə qarışmamaq prinsiplərinə əsaslanır. Bu prinsiplər Azərbaycanın beynəlxalq münasibətlərdə tutduğu mövqenin əsasını təşkil edir.

Prezident İlham Əliyevin çıxışında beynəlxalq münasibətlərdə ikili standartların tətbiqi xüsusi diqqətə çatdırıldı. Azərbaycanın müstəqilliyini bərpa etməsindən sonra uzun illər ərzində üzləşdiyi işğal, etnik təmizləmə və humanitar fəsadlar beynəlxalq hüququn norma və prinsiplərinin ardıcıl tətbiqinin nə qədər vacib olduğunu göstərir. BMT Təhlükəsizlik Şurasının Ermənistan-Azərbaycan münaqişəsi ilə bağlı qəbul etdiyi qətnamələrin uzun müddət icra edilməməsi beynəlxalq qərarların yalnız qəbul olunmasının deyil, onların yerinə yetirilməsini təmin edən mexanizmlərin də vacibliyini üzə çıxardı.

Bu baxımdan, Azərbaycanın mövqeyi konkret tarixi təcrübəyə əsaslanır: beynəlxalq hüquq ayrı-ayrı dövlətlərin siyasi maraqlarından asılı olmayaraq tətbiq edilməli, ərazi bütövlüyü və suverenlik prinsiplərinə münasibətdə seçici yanaşmaya yol verilməməlidir. Əks halda, beynəlxalq təşkilatların qərarlarına etimad zəifləyir, münaqişələrin qarşısının alınması və davamlı sülhün təmin olunması çətinləşir.

Azərbaycan 2020-ci ildə Vətən müharibəsində qazandığı Zəfər və 2023-cü ilin sentyabrında həyata keçirilmiş antiterror tədbirləri nəticəsində öz suverenliyini tam bərpa etdi. Bu hadisələr ölkəmizin ərazi bütövlüyünün təmin olunması baxımından həlledici mərhələlər oldu. Eyni zamanda, Azərbaycanın Ermənistana sülh təklif etməsi regionda yeni münasibətlər sisteminin qurulmasına yönəlmiş siyasi iradənin göstəricisidir.

Bununla belə, sülhün əldə olunması qədər onun qorunması və möhkəmləndirilməsi də vacibdir. Davamlı sülh qarşılıqlı öhdəliklərə əməl edilməsini, etimadın formalaşdırılmasını və dövlətlərin legitim maraqlarına hörmətlə yanaşılmasını tələb edir. Cənubi Qafqazda sabitliyin möhkəmlənməsi yalnız region ölkələri üçün deyil, daha geniş coğrafiyada əməkdaşlıq və təhlükəsizlik baxımından da əhəmiyyətlidir.

Zirvə Görüşündə Azərbaycanın AQEM-ə ikiillik sədrliyi dövründə həyata keçirilən fəaliyyətə də diqqət yetirildi. Ölkəmiz nəqliyyat və bağlantılar, rəqəmsallaşma, ətraf mühit, turizm, təhsil və elm sahələrində əməkdaşlığın inkişafını təşviq edib. Bu istiqamətlər üzrə təşəbbüslər Azərbaycanın beynəlxalq platformalarda fəal iştirakının və regional dialoqun gücləndirilməsinə verdiyi töhfənin göstəricisidir. AQEM-in institusional imkanlarının möhkəmləndirilməsi və üzvlüyünün genişlənməsi də təşkilatın Asiyada qarşılıqlı etimad və əməkdaşlıq platforması kimi inkişafı baxımından əhəmiyyət daşıyır.

Prezident İlham Əliyevin çıxışının əsas məzmunu ondan ibarətdir ki, beynəlxalq təhlükəsizlik ayrı-ayrı dövlətlərin maraqlarına uyğun seçici yanaşmalarla deyil, hamı üçün eyni hüquqi meyarların tətbiqi ilə təmin oluna bilər. Azərbaycanın təcrübəsi göstərir ki, suverenliyin qorunması, milli maraqların müdafiəsi və beynəlxalq əməkdaşlığın inkişafı bir-birini tamamlayan istiqamətlərdir. Bu yanaşma ölkəmizin xarici siyasət xəttinin mahiyyətini və beynəlxalq münasibətlərdə ədalət prinsipinə verdiyi əhəmiyyəti ifadə edir.

Anar Məmmədov,

YAP Gədəbəy rayon təşkilatının əməkdaşı

Paylaş:

Baxılıb: 7 dəfə

Xəbər lenti

Hamısına bax