20 Oktyabr – Zəngilan şəhəri günü: azadlıqdan dirçəlişə uzanan yol

Bakı:

20 °C

73 %

7 m/s

Əlaqə

AZ RU EN

Ana səhifə / YAP xəbərləri / 20 Oktyabr – Zəngilan şəhəri günü: azadlıqdan dirçəlişə uzanan yol

20 Oktyabr – Zəngilan şəhəri günü: azadlıqdan dirçəlişə uzanan yol

20.10.2026 [17:56]

Azərbaycan xalqının yaddaşında elə tarixlər var ki, onlar təkcə təqvimdə qeyd olunan bir gün deyil, həm də milli kimliyin, qürurun və birliyin rəmzinə çevrilir. 20 oktyabr – Zəngilan şəhəri günü də məhz belə tarixlərdəndir. 2020-ci il oktyabrın 20-də Müzəffər Ali Baş Komandan İlham Əliyev xalqa müraciətində Zəngilan şəhərinin işğaldan azad olunduğunu bəyan etdi. Həmin gün Zəngilan şəhəri ilə yanaşı rayonun Havalı, Zərnəli, Məmmədbəyli, Həkəri, Şərifan və Muğanlı kəndləri də düşməndən təmizləndi. Bu xəbər 27 il doğma yurd həsrəti ilə yaşayan minlərlə zəngilanlı ailənin, eləcə də bütün Azərbaycan xalqının qəlbinə sevinc və rahatlıq gətirdi.

Zəngilan rayonu 1993-cü il oktyabrın 30-da Ermənistan silahlı qüvvələri tərəfindən işğal edilmişdi. İşğal zamanı rayonun 1 şəhəri, 5 qəsəbəsi və 79 kəndi düşmən tapdağı altına düşdü, on minlərlə insan doğma ocağını tərk etməyə məcbur oldu. 707 kvadratkilometr ərazini əhatə edən, Qarabağın cənubunda, İranla sərhəddə, Araz çayı boyunca yerləşən bu gözəl diyar 27 il ərzində talan edildi, yaşayış məntəqələri yerlə-yeksan olundu, tarixi abidələr dağıdıldı, meşələr qırıldı, təbii sərvətlər qanunsuz istismar edildi. İşğalçılar geri çəkilərkən isə torpaqları minalarla çirkləndirərək bölgənin dirçəlişinə əngəl yaratmağa çalışdılar.

Zəngilan uğrunda döyüşlər İkinci Qarabağ müharibəsinin ən uğurlu Arazboyu əməliyyatlarından biri kimi hərb tarixinə düşdü. Azərbaycan Ordusu çətin relyef şəraitində yüksək peşəkarlıq, cəsarət və döyüş ruhu nümayiş etdirərək qısa müddətdə rayon ərazisini düşməndən təmizlədi. Zəngilanın azad edilməsi Azərbaycan–İran dövlət sərhədinin tam bərpasına, Arazboyu bölgədə strateji üstünlüyün təmin olunmasına və sonrakı əməliyyatların uğurla davam etdirilməsinə imkan yaratdı. Döyüşlərdə fərqlənən hərbçilərimiz “Zəngilanın azad olunmasına görə” medalı ilə təltif olundular. Bu qələbənin hər addımı şəhidlərimizin canı, qazilərimizin qanı bahasına qazanıldı və onların xatirəsi xalqımızın qəlbində əbədi yaşayacaq.

Zəngilanın azadlığından cəmi iki ay sonra, 2020-ci il dekabrın 23-də Prezident İlham Əliyev və Birinci xanım Mehriban Əliyeva Zəngilan şəhərində Azərbaycan bayrağını ucaltdılar. Üçrəngli bayrağımızın 27 illik fasilədən sonra Zəngilan səmasında dalğalanması qələbənin rəmzi möhürü oldu və bölgənin yeni tarixinin başlanğıcını elan etdi. Elə həmin vaxtdan Zəngilanda minatəmizləmə, bərpa və yenidənqurma işlərinə start verildi.

Qələbənin yaddaşda əbədi yaşaması üçün dövlət səviyyəsində mühüm addımlar atıldı. Prezident İlham Əliyevin 2023-cü il iyulun 31-də imzaladığı sərəncamla oktyabrın 20-si Zəngilan şəhəri günü kimi təsis edildi. Bu tarix ilk dəfə rəsmi olaraq 2023-cü ildə qeyd olundu və artıq hər il ölkəmizin hər guşəsində təntənə ilə qarşılanır. 2026-cı ildə Zəngilan şəhəri günü dördüncü dəfə rəsmi olaraq qeyd edilir, Zəngilanın işğaldan azad olunmasından isə 6 il ötür.

Ötən illər ərzində Zəngilan xarabalıqlardan müasir həyata doğru böyük yol qət edib. Azad edilmiş ərazilərdə ilk “ağıllı kənd” olan Ağalı məhz Zəngilanda salındı və 2022-ci ilin yayından etibarən keçmiş məcburi köçkünlər doğma yurdlarına qayıtmağa başladılar. 2022-ci il oktyabrın 20-də – Zəngilanın azadlıq günündə Prezident İlham Əliyev və Türkiyə Prezidenti Rəcəb Tayyib Ərdoğanın iştirakı ilə Zəngilan Beynəlxalq Hava Limanı istifadəyə verildi. Bu, Şərqi Zəngəzur iqtisadi rayonunda inşa edilən ilk, azad edilmiş ərazilərdə isə ikinci hava limanıdır. Rayonda bir neçə su elektrik stansiyası, Konqres Mərkəzi, Heydər Əliyev Fondu tərəfindən inşa edilən Zəngilan şəhər məscidi, “Ağalı” hoteli istifadəyə verildi, Məmmədbəyli kəndi yenidən quruldu.

2026-cı il mayın 10-da isə Zəngilan şəhərinin dirçəliş tarixində yeni səhifə açıldı: şəhərdə inşa olunmuş 104 mənzilli ilk yaşayış kompleksi istifadəyə verildi və ilk ailələr doğma şəhərlərinə qovuşdular. Bu hadisə Zəngilanın artıq yalnız tikinti meydanı deyil, həm də yaşayan, nəfəs alan, inkişaf edən bir şəhər olduğunu göstərdi.

Bu gün Zəngilan həm də regionun mühüm nəqliyyat və logistika qovşağına çevrilir. Horadiz–Cəbrayıl–Zəngilan–Ağbənd avtomobil yolu və Horadiz–Ağbənd dəmir yolu Zəngəzur dəhlizinin Azərbaycan ərazisindən keçən hissəsini təşkil edir. Bu layihələr Azərbaycanın əsas hissəsini Naxçıvanla, oradan isə Türkiyə və Avropa ilə birləşdirərək ölkəmizin tranzit potensialını əhəmiyyətli dərəcədə artıracaq.

20 oktyabr – Zəngilan şəhəri günü bizə həm qələbənin qürurunu, həm də bu qələbənin bədəlini xatırladır. Bu gün şəhidlərimizin ruhu qarşısında baş əyir, qazilərimizə minnətdarlığımızı bildirir, Zəngilanın dirçəlişinə töhfə verən hər kəsə təşəkkür edirik. Zəngilan bu gün azadlığın, quruculuğun və Böyük Qayıdışın simvoludur. Arazın sahilində yenidən doğulan bu şəhər qalib Azərbaycan xalqının gücünü, iradəsini və gələcəyə inamını bütün dünyaya nümayiş etdirir.

Azər SÜLEYMANOV,
Yeni Azərbaycan Partiyası Nəsimi rayon təşkilatının sədri

Paylaş:

Baxılıb: 1 dəfə

Xəbər lenti

Hamısına bax