Qubadlıya öz sahibləri qayıdıb

Bakı:

22 °C

83 %

4 m/s

Əlaqə

AZ RU EN

Ana səhifə / YAP xəbərləri / Qubadlıya öz sahibləri qayıdıb

Qubadlıya öz sahibləri qayıdıb

21.10.2026 [16:31]

“Qubadlıya öz sahibləri qayıdıb. Qubadlının işğaldan azad edilməsi tarixi hadisə idi. Oktyabrın 25-də Qubadlı şəhərinin azad edilməsi bizim qələbəmizi yaxınlaşdırdı”.

Prezident, Müzəffər Ali Baş Komandan İlham Əliyevin bu sözləri Qubadlı şəhərinin azad edilməsinin xalqımızın tarixində tutduğu əhəmiyyəti dolğun ifadə edir. Oktyabrın 25-i Azərbaycan xalqının yaddaşına qürur, sevinc və milli iradənin təntənəsi kimi həkk olunub. Bu tarix yalnız bir şəhərin azad edilməsi deyil, doğma yurduna qayıtmaq arzusu ilə yaşayan insanların ümidlərinin gerçəkləşməsi deməkdir.

Qubadlı zəngin təbiəti, əlverişli coğrafi mövqeyi və böyük iqtisadi potensialı ilə seçilən rayonlarımızdandır. İşğala qədər burada taxılçılıq, üzümçülük, tütünçülük, bostan məhsullarının becərilməsi və heyvandarlıq geniş yayılmışdı. Zəhmətkeş insanların əməyi ilə inkişaf edən bu torpaqların iqtisadi həyatı işğal nəticəsində dayandırıldı, sakinlər doğma evlərindən didərgin düşdülər. Lakin onların Qubadlıya qayıtmaq inamı heç vaxt sönmədi.

2020-ci ildə başlanan Vətən müharibəsi Azərbaycan xalqının birliyini, ordumuzun gücünü və dövlətimizin qətiyyətini bütün dünyaya nümayiş etdirdi. Prezident İlham Əliyevin rəhbərliyi, Müzəffər Ali Baş Komandanın siyasi iradəsi və Azərbaycan Ordusunun qəhrəmanlığı sayəsində torpaqlarımız bir-birinin ardınca işğaldan azad edildi. Oktyabrın 25-də Qubadlının azad olunması müharibənin gedişində mühüm mərhələ oldu və tarixi Qələbəmizə aparan yolu daha da yaxınlaşdırdı. Bu uğur əsgər və zabitlərimizin igidliyinin, xalqımızın sarsılmaz birliyinin nəticəsi idi.

Qazanılmış Zəfərin əbədiləşdirilməsi dövlət siyasətimizin mühüm istiqamətlərindən biridir. Qubadlıda İşğal və Zəfər muzeyləri kompleksinin yaradılması təşəbbüsü gələcək nəsillərə tarixi həqiqətləri çatdırmaq baxımından xüsusi əhəmiyyət daşıyır. Bu məkanlar həm işğalın ağrılarını, həm də xalqımızın azadlıq mübarizəsini, qəhrəmanlığını və qələbə əzmini yaşadacaq. Tarixi yaddaşımızı qorumaq, şəhidlərimizin müqəddəs xatirəsini uca tutmaq hər birimizin mənəvi borcudur.

Bu gün Qubadlıda həyat yenidən canlanır. Mahruzlu və Zilanlı kəndlərinin yenidən qurulması Böyük Qayıdışın mühüm addımlarındandır. Məqsəd insanları doğma torpaqlarına qaytarmaqla yanaşı, onlar üçün müasir yaşayış şəraiti yaratmaqdır. Yeni yaşayış məntəqələri, infrastruktur layihələri və kənd təsərrüfatının inkişafı Qubadlının gələcəyinə inamı artırır.

Prezident İlham Əliyevin 19 oktyabr 2022-ci ildə Qubadlıya səfəri bu quruculuq siyasətinin ardıcıl xarakterini nümayiş etdirdi. Dövlətimizin başçısı “Zabuxçay” və “Bərgüşadçay” su anbarlarının layihələri ilə tanış oldu. Bu layihələr əkin sahələrinin suvarılması, kənd təsərrüfatının inkişafı və bölgənin iqtisadi imkanlarının genişləndirilməsi baxımından əhəmiyyətlidir. Həmin gün “Azərişıq” ASC-nin 35 kilovoltluq yarımstansiyasının və Rəqəmsal İdarəetmə Mərkəzinin təməli qoyuldu. Bu addımlar Qubadlının müasir enerji infrastrukturu ilə təmin olunmasına xidmət edir.

Qubadlı bu gün keçmişin ağrılarından gələcəyin ümidlərinə doğru inamla irəliləyir. Prezident İlham Əliyevin rəhbərliyi ilə həyata keçirilən bərpa və quruculuq işləri sübut edir ki, Azərbaycan azad etdiyi torpaqlarda həyatı yenidən qurmağa qadirdir. Oktyabrın 25-i xalqımızın yaddaşında daim yaşayacaq: Qubadlı öz sahiblərinə qovuşub və bu torpaqda yeni həyat başlayıb.

Sevinc Xəlilova

YAP Samux rayon təşkilatının sədr müavini