12-ci sanksiya paketi!

Bakı:

33 °C

46 %

5 m/s

Əlaqə

AZ RU EN

Ana səhifə / Analitik / 12-ci sanksiya paketi!

12-ci sanksiya paketi!

29.07.2023 [11:35]

Qərbin Rusiyaya növbəti iqtisadi “hücum”u...

Yeganə BAYRAMOVA

Rusiyaya qarşı sanksiyaların əhatə dairəsi genişlənməkdədir. ABŞ və Avropa İttifaqı (Aİ) dövlətləri Moskvaya sanksiyalar tətbiq etməklə ölkənin maliyyə resurslarını tükətmək, beləliklə, gündəlik müharibə xərclərini qarşılamaq imkanlarını məhdudlaşdırmaq məqsədi güdürlər. Xatırladaq ki, indiyədək Rusiyaya qarşı sərt sanksiyalar on bir mərhələdə reallaşdırılıb.

Siyahının uzanması - qadağalar paketinin sayının artması sözsüz ki, Rusiya iqtisadiyyatına ciddi şəkildə zərbə vurur. Bu günlərdə isə Aİ şimal qonşumuza qarşı növbəti qadağaların olacağını bəyan edib. Belə ki, Aİ Rusiyaya qarşı on ikinci sanksiyalar paketini tətbiq etmək niyyətindədir. Bu barədə Aİ Xarici İşlər Xidmətinin rəsmi nümayəndəsi Piter Stano məlumat verib. Stano ilin sonuna qədər yeni məhdudlaşdırıcı tədbirlərin qəbulu ilə bağlı sualı cavablandırarkən deyib: “Əgər Kreml vəziyyəti daha da gərginləşdirərsə, əlavə sanksiyalar həmişə mümkündür”.

Bu ilin sonunadək...

Qeyd edək ki, Rusiyaya qarşı 12-ci sanksiyalar paketini Baltikyanı ölkələrin və Polşanın nümayəndələri elan ediblər. İyunun 23-də Polşa xarici işlər nazirinin müavini Pyotr Vavrşik bildirmişdi ki, Varşava Rusiya üçün böyük maliyyə resursları təmin edən dörd elementi aradan qaldırmaq istəyir. Onun sözlərinə görə, Polşa Rusiyanın nüvə enerjisi sahəsində məhdudiyyətlər axtarmağı planlaşdırır.

Yeri gəlmişkən, iyunun sonunda Litva prezidenti Gitanas Nauseda Aİ-ni “Rosatom”a qarşı sanksiyalar tətbiq etməyə çağırıb. Fransa Avropa Parlamentinin deputatı Thierry Mariani isə bildirib ki, Rusiyaya qarşı növbəti sanksiyalar paketinin tətbiqi yalnız zaman məsələsidir. O, həmçinin 12-ci paketin bu ilin sonuna qədər qəbul oluna biləcəyini təsdiqləyib.

Rusiya almazlarının idxalı

Mümkün sanksiyaların əsas məqsədi Rusiya almazlarının idxalının qarşısının alınmasıdır. Qeyd edək ki, dünyanın almaz paytaxtı sayılan Belçikanın Antverpen şəhəri Rusiyadan ən çox almaz alıcısı olaraq qalır. Dünyadakı kobud almazların 80%-ə qədəri şəhərin birjalarından keçir. “Antverpen World Diamond Center” ticarət assosiasiyasının məlumatına görə, bu şəhərdə təxminən 1,7 min şirkət və 4,5 min diler brilyant alır və satır. Bundan əvvəl, Belçika rəhbərliyi bəyan etmişdi ki, ölkə ümumilikdə Rusiya almazlarına əlavə məhdudiyyətlərin tətbiqini dəstəkləməyə hazırdır.

Paketdə başqa nələr var?

Bununla belə, mümkün 12-ci sanksiyalar paketinin dəqiq məzmunu barədə danışmaq hələ çətindir. Ancaq Avropa Parlamentinin deputatı Qunnar Bek vurğulayıb ki, Brüsseldə “Rosatom”a qarşı məhdudiyyətlər, Rusiyanın bank sektoruna qarşı sanksiyalar, Aİ-də dondurulmuş aktivlərlə bağlı gələcək tədbirlər, eləcə də paralel mal idxalında iştirak edən üçüncü ölkələrə qarşı məhdudiyyətlərin artırılması müzakirə olunur.

Taxıl idxalına qadağalar...

Dövlət İdarəetmə Universitetinin Dünya İqtisadiyyatı və Beynəlxalq İqtisadi Münasibətlər kafedrasının professoru Qalina Sorokina istisna etmir ki, Aİ-nin məhdudiyyətlərinə hətta Rusiya taxılının idxalına qadağalar da daxil ola bilər.

Moskva özünü pis ssenarilərə hazırlamalıdır

Rusiya Beynəlxalq Əlaqələr Şurasının (RİAC) baş direktoru İvan Timofeyev isə hesab edir ki, Moskva sanksiyalar rejiminin tədricən sərtləşdirilməsinə hazırlaşmalıdır: “Rusiya sanksiyalarla bağlı özünü ən pis ssenarilərə hazırlamalı, ona uyğun hərəkət etməlidir. Sevindirici haldır ki, keçən il tətbiq edilən sanksiyalara baxmayaraq, Rusiya iqtisadiyyatı möhkəmlik nümayiş etdirdi və ən pis ssenariyə hazırlaşarkən zərbəni dəf etdi”.

Xatırladaq ki, Aİ-nin Rusiyaya qarşı 11-ci sanksiyalar paketi iyunun 23-də tətbiq edilib. Yeni məhdudiyyətlər əsasən mövcud sanksiyalardan yayınma ilə mübarizəyə yönəlib.

Paylaş:

Baxılıb: 929 dəfə