Şimali Koreyadan yeni nüvə strategiyası...

Bakı:

19 °C

61 %

3 m/s

Əlaqə

AZ RU EN

Ana səhifə / Analitik / Şimali Koreyadan yeni nüvə strategiyası...

Şimali Koreyadan yeni nüvə strategiyası...

06.10.2023 [11:34]

Pxenyan nüvə proqramını konstitusiyasına daxil edib

Ötən ayın sonlarında Koreya Xalq Demokratik Respublikası özünün “mövcud olma hüququnu” təmin etmək üçün nüvə silahı proqramını konstitusiyasına daxil edib. Bu, beynəlxalq siyasi aləmdə yeni “soyuq müharibə”nin başlanğıcı kimi qiymətləndirilsə də, Şimali Koreya bu fikirdə deyil. “Spiegel”in yaydığı məlumata görə, Kim Çen In ABŞ-ın strateji obyektlərini regionda yerləşdirməsinə cavab olaraq bu yolla nüvə silahı istehsalını artırmağa çalışır. Başqa sözlə, KXDR özünü Cənubi Koreya “təhlükəsindən” qorumaq itədiyini göstərir. Hazırda KXDR raket və nüvə proqramına görə beynəlxalq sanksiyalar altındadır. Buna baxmayaraq, Şimali Koreya parlamentinin ötən ay keçirdiyi iclasında konstitusiyaya müvafiq dəyişiklik qəbul olunub. Qanun, eyni zamanda, nüvə silahının profilaktik məqsədlərlə istifadəsinə icazə verir. Qeyd edək ki, Pxenyan bu il çoxsaylı raket sınağı keçirərək regionda gərginliyi artırıb. Vaşinqton və Seul KXDR-in yaxın vaxtlarda nüvə silahı sınağı keçirə biləcəyi barədə xəbərdarlıq edib. Şimali Koreya sonuncu dəfə 2017-ci il sentyabrın 3-də nüvə silahının sayca 6-cı sınağını həyata keçirib.

Uzaq Şərq narahatdır...

Nüvə enerjisini inkişaf etdirmək strategiyasının Şimali Koreya konstitusiyasına daxil edilməsi isə dünyada birmənalı qarşılanmayıb. Bununla bağlı Cənubi Koreyanın Müdafiə Nazirliyi də xəbərdarlıq bəyanatı yayımlayıb. Qurum qeyd edib ki, Şimali Koreya nüvə silahından istifadə edərsə, bu, Pxenyan rejiminin sonu olacaq. “Ordumuz Cənubi Koreya-ABŞ tərəfdaşlığı çərçivəsində Şimali Koreyanın istənilən hücumuna cavab vermək imkanlarına malikdir. Odur ki, bu ölkə nüvə silahından istifadə etməyə çalışarsa, rejiminin sonu ilə üzləşəcək. Pxenyanın nüvə silahı proqramı Koreya yarımadasının sülhü və sabitliyi, o cümlədən beynəlxalq ictimaiyyət üçün ciddi təhdiddir”. Bildirilib ki, nüvə potensialının inkişaf etdirilməsi Şimali Koreyanı beynəlxalq ictimaiyyətdən daha da təcrid edəcək və problemləri artıracaq.

Yaponiya hökuməti də KXDR bu hərəkətini həyəcanla qarşılayıb. Yaponiya Nazirlər Kabinetinin baş katibi Hirokazu Matsuno Şimali Koreyanın nüvə strategiyasını genişləndirməsini və ballistik raket sənayesinin inkişafını Yaponiyanın sülh və təhlükəsizliyinə təhdid kimi qiymətləndirib. Matsuno bildirib ki, Yaponiya bütün bunlara dözmək məcburiyyətində deyil.

KXDR liderinin sonuncu Rusiya səfəri zamanı...

Rusiya mətbuatının yaydığı məlumatlara görə, qarşı tərəf KXDR-in bu hərəkətlərini sonuncu Rusiya səfəri ilə bağlayır. Nəzərə alınmalıdır ki, Şimali Koreya lideri Kim Çen In sentyabrın 12-dən 17-dək Rusiyada rəsmi səfərdə olub. O, Rusiya prezidenti Vladimir Putinlə görüşüb, Rusiyanın müdafiə naziri Sergey Şoyqu ilə danışıqlar aparıb. Görüşdən sonra Putin bildirib ki, Rusiyanın KXDR ilə hərbi-texniki sahədə əməkdaşlıq üçün yaxşı perspektivləri var. Bundan yol alaraq Cənubi Koreyanın xarici işlər nazirinin müavini Çanq Hojin bildirib ki, Rusiya ilə Şimali Koreya arasında hərbi əməkdaşlıq BMT Təhlükəsizlik Şurasının qətnamələrinin ciddi şəkildə pozulması deməkdir. Cənubi Koreyanın Milli Təhlükəsizlik Şurası tərəfləri silah sövdələşməsinə getməməyə çağırıb - əks halda Moskva və Pxenyanın bu hərəkətlərinə qarşı “lazımi tədbir” görüləcək. Kreml isə əmin edib ki, Şimali Koreya liderinin səfəri zamanı hərbi-texniki əməkdaşlığa dair heç bir saziş imzalanmayıb - çünki belə planlar olmayıb.

SADİQ

Paylaş:

Baxılıb: 793 dəfə