Qlobal çağırışların müzakirə olunduğu mühüm platforma

Bakı:

21 °C

52 %

4 m/s

Əlaqə

AZ RU EN

Ana səhifə / Arxiv / Qlobal çağırışların müzakirə olunduğu mühüm platforma

Qlobal çağırışların müzakirə olunduğu mühüm platforma

16.03.2026 [19:12]

Bakı Qlobal Forumu artıq on üçüncü dəfədir ki, dünyanın diqqət mərkəzindədir. Bu mötəbər beynəlxalq platforma hər il qlobal siyasətin aktual mövzularının müzakirə olunduğu, müxtəlif ölkələrin siyasi liderləri, ekspertlər və ictimai xadimləri bir araya gətirən mühüm dialoq məkanı kimi çıxış edir. Bu dəfəki forumda da beynəlxalq münasibətlər sistemində baş verən dəyişikliklər, geosiyasi gərginliklər və qlobal təhlükəsizlik məsələləri geniş şəkildə müzakirə olundu.

Müzakirələr bir daha göstərdi ki, müasir dünya yeni geosiyasi mərhələyə qədəm qoyur. Son illərdə regional münaqişələrin artması, siyasi rəqabətin dərinləşməsi və qlobal gərginliyin yüksəlməsi beynəlxalq münasibətlər sistemində fikir ayrılıqlarını daha da kəskinləşdirir. Bu baxımdan dialoq və əməkdaşlıq platformalarının əhəmiyyəti daha da artır.

“Keçid dövründə olan dünyada fikir ayrılıqlarının aradan qaldırılması” mövzusuna həsr olunan forumda İlham Əliyev açılış nitqi ilə çıxış edərək qlobal təhlükəsizlik, enerji sabitliyi, regional sülh və beynəlxalq əməkdaşlıqla bağlı mühüm mesajlar səsləndirdi. Dövlət başçısı çıxışında qeyd etdi ki, müasir beynəlxalq sistem ciddi transformasiya mərhələsindən keçir və bu proses yeni çağırışlarla yanaşı, yeni əməkdaşlıq imkanları da yaradır.

Prezident vurğuladı ki, beynəlxalq münasibətlərdə parçalanma və qarşıdurmaların artdığı indiki şəraitdə dialoq və əməkdaşlıq platformalarının rolu daha da yüksəlir. Bakı Qlobal Forumu da məhz belə bir platforma kimi müxtəlif ölkələrin siyasi liderlərini və ekspertlərini bir araya gətirərək qarşılıqlı anlaşmanın möhkəmləndirilməsinə və fikir ayrılıqlarının aradan qaldırılmasına xidmət edir. Bu isə Azərbaycanın həm regional, həm də qlobal səviyyədə mühüm diplomatik rol oynadığını göstərir.

Çıxışında dövlət başçısı xüsusilə vurğuladı ki, müasir beynəlxalq şəraitdə hər bir dövlət üçün təhlükəsizlik və sabitlik əsas prioritetlərdən biri olmalıdır. Qlobal təhlükəsizlik sistemində tarazlığın pozulması regional münaqişələrin artmasına, eyni zamanda iqtisadi sabitliyin zəifləməsinə səbəb olur. Buna görə də dövlətlər qarşıdurma deyil, qarşılıqlı hörmət və əməkdaşlıq prinsiplərinə əsaslanan siyasət yürütməlidirlər.

Forumda enerji təhlükəsizliyi məsələsi də diqqət mərkəzində oldu. Azərbaycanın Avropanın enerji təhlükəsizliyinin təmin edilməsində mühüm rol oynadığını qeyd edən Prezident İlham Əliyev bildirdi ki, enerji bazarlarında qeyri-sabitlik qlobal iqtisadiyyata ciddi təsir göstərir. Neft və qaz qiymətlərindəki kəskin dəyişikliklər həm istehlakçı, həm də istehsalçı ölkələr üçün müəyyən çətinliklər yaradır və ümumi iqtisadi sabitliyi risk altına alır.

Prezident çıxışında Cənubi Qafqaz regionunda sülh prosesinə də toxundu. O qeyd etdi ki, Azərbaycan Ermənistanla yekun sülh sazişinin imzalanmasında maraqlıdır və belə bir razılaşma regionda yeni iqtisadi və nəqliyyat layihələrinin həyata keçirilməsi üçün geniş imkanlar aça bilər. Rəsmi Bakının mövqeyinə görə, sülhün əldə olunması Cənubi Qafqazda yeni nəqliyyat marşrutlarının formalaşmasına və Ermənistanın ilk dəfə tranzit ölkə statusu qazanmasına şərait yarada bilər.

Ümumilikdə, XIII Bakı Qlobal Forumunda aparılan müzakirələr göstərir ki, bu gün qlobal təhlükəsizlik və sabitliyin qorunması beynəlxalq gündəliyin əsas prioritetlərindən biridir. Regional əməkdaşlıq və sülh isə davamlı iqtisadi inkişafın əsas şərtlərindən sayılır. Bakıdan səslənən mesajlar bir daha təsdiqləyir ki, Azərbaycan qlobal siyasi proseslərdə fəal iştirak edir və beynəlxalq dialoqun inkişafına mühüm töhfələr verir

İlahə Qurbanova

YAP Samux rayon təşkilatının əməkdaşı

Paylaş:

Baxılıb: 560 dəfə