“Əbədiyyətə hökm edənlər”in günü...

Bakı:

4 °C

65 %

7 m/s

Əlaqə

AZ RU EN

Ana səhifə / Elm / “Əbədiyyətə hökm edənlər”in günü...

“Əbədiyyətə hökm edənlər”in günü...

05.10.2024 [07:23]

“Müəllim keçmişin əmanətçisi, gələcəyin qurucusudur”- deyirdi müdriklərdən biri. Müəllim adı elə şərəfli ad, elə vüqarlı peşədir ki, min illərdir ondan uca ad dünyaya gəlməyib, gəlməyəcək də... Çünki müəllimin özünü də öyrədən müəllimdir. Necə deyirdi Həzrəti Əli: “Mənə bir hərf öyrədənin köləsi olaram”.

Bu gün o uca adın daşıyıcılarının- müəllimlərimizin günüdür- Beynəlxalq Müəllimlər Günü.

Bu əlamətdar gün UNESCO-nun qərarı ilə 1966-cı ildən qeyd edilir. Həmin il təşkilat tərəfindən müəllimlərin statusunun artırılması ilə bağlı tövsiyə xarakterli sənəd də qəbul olunub. Beynəlxalq Müəllimlər Günü həyatını xalqın işıqlı gələcəyinə həsr edən müqəddəs peşə sahiblərinin bayramıdır.

Beynəlxalq Müəllimlər Günü bütün dünyada müəllim əməyini qeyd etməyə, parlaq zəkaların və istedadlı gənclərin bu peşəyə cəlb olunmasına və bu sahədə saxlanılmasının həlli yollarını tapmağa və ümumiləşdirmələr aparmağa imkan yaradır.

Azərbaycanda Beynəlxalq Müəllimlər Günü 1993-cü ildən qeyd edilir. Ölkəmizdə bu günə dövlət səviyyəsində diqqət ayrılır.

Müəllimlik dünyada ən çətin, eyni zamanda ən şərəfli və ən gözəl peşədir. Məhz müəllimlərin, onların əməyinin nəticəsində cəmiyyət formalaşır, savadlı, bilikli, geniş dünyagörüşlü, aydın fikirli, müasir düşüncəli, nümunəvi əxlaqa malik insanlar yetişir. Bu cür insanların sayəsində isə cəmiyyət inkişaf edir.

Müəllimlər yeni cəmiyyət quruculuğunun memarlarıdır. Hər birimizin layiqli vətəndaş kimi yetişməyində müəllimlərimizin əvəzsiz xidmətləri olub şübhəsiz.

Daim müəllim adını uca tutan, onun əməyini yüksək qiymətləndirən, “özünü müəllimliyə həsr etmiş insan ən şərəfli insandır”-deyən Ümummilli Lider Heydər Əliyev öz çıxışlarında müəllim haqqında həmişə xoş sözlər söyləyib. Onun tez-tez öz müəllimlərini də minnətdarlıqla xatırlaması, onların xidmətləri haqqında ürəkdolusu danışması cəmiyyətimiz üçün müəllimə verilən dəyərin əsl örnəyidir. Ulu Öndər ölkəmizə rəhbərlik etdiyi bütün dövrlərdə həmişə müəllimə hörmət və ehtiramla yanaşmış, onların maddi vəziyyətinin, rifah halının yaxşılaşdırılması qayğısına qalmışdır. O, deyirdi: “Hər birimizdə müəllimin hərarətli qəlbinin bir zərrəciyi vardır. Məhz müəllim doğma yurdumuzu sevməyi, hamının rifahı namınə vicdanla işləməyi müdrikliklə və səbirlə bizə öyrətmiş və öyrədir”.

Bir zamanlar özü də pedaqoji fəaliyyətlə məşğul olan ölkə Prezidenti cənab İlham Əliyev də bu gün atasının miras qoyduğu siyasi irsi inamla davam etdirir, müəllimlərə hörmət və qayğı ilə yanaşır, onların rifah halının yaxşılaşdırılmasına çalışır. Onun müəllim adına və fəaliyyətinə verdiyi dəyər bu cümlədən aydın şəkildə görünür: “Azərbaycanın əldə etdiyi bütün nailiyyətlərin əsasında məhz müəllimin gərgin zəhməti və gündəlik fəaliyyəti durur”.

Henri Bruks Adams deyirdi ki, bir müəllim əbədiyyətə hökm edən insandır. Bu gün məhz həmin hökmranların günüdür. 5 oktyabr bütün ömrünü elmə, öyrətməyə, öyrənməyə həsr edən, cəmiyyətimizə yararlı vətəndaşlar yetişdirmək üçün qara saçlarını ağardan müəllimlərimizə 365 gün içərisindəki bir günlük minnətdarlığımızdır. Təəssüf ki, bəzən bu gün cəmiyyətdə müxtəlif müzakirələrə, fərqli fikirlərə səbəb olur. Lakin kimin nə düşünüb, nə danışmağından asılı olmayaraq, bu barədə ən doğru fikri əsrlər öncə dahi filosof Sokrat demişdi: “Dünyada hər şeyə dəyər vermək mümkündür, lakin müəllimin əməyinə əsla dəyər verilə bilməz”.

Gününüz mübarək, əbədiyyətə hökm edənlər!

Şahanə MÜŞFİQ

Paylaş:

Baxılıb: 567 dəfə