Mehriban ürək

Bakı:

13°C

67%

8m/s

Əlaqə

AZ RU EN

Ana səhifə / Gündəm / Mehriban ürək

Mehriban ürək

08.03.2025 [08:16]

Güclü müasirlik duyğusu, yenilikçi təbiətə sahib, fədakar Azərbaycan Qadını!

Dünyada ölkələrin yüksəksəviyyəli rəsmilərinə xüsusi etiket qaydaları çərçivəsində xitab olunur. Azərbaycanın birinci xanımı, Birinci vitse-prezident Mehriban Əliyeva ilə görüşlərdə isə adətən rəsmi etiket qaydaları pozulur, insanlar ona sadəcə “bizim Mehriban” deyə müraciət edirlər. Bu sadə xitab Azərbaycan cəmiyyətinin Mehriban xanım Əliyevaya böyük məhəbbətini, səmimi münasibətini ifadə edir.

Xeyirxahlığa, humanizmə çağırış

Azərbaycan qadınının ən xarakterik cəhəti olan xeyirxahlıq, humanizm, xoş məram Birinci vitse-prezident, Heydər Əliyev Fondunun prezidenti Mehriban xanım Əliyevanın həyatından və fəaliyyətindən qırmızı xətt kimi keçir. Əlamətdar tarixlərdə, milli bayramlarda Mehriban xanım Əliyeva bir qayda olaraq uşaqların, ələlxüsus da fiziki qüsurlu və yaxud valideyin himayəsindən məhrum qalmış uşaqların yanında olmağa tələsir. Belə tədbirlərdə Mehriban xanım Əliyeva yüksək statusuna baxmayaraq, çox sadə davranır - uşaqlarla rəqs edir, onların gələcək planları ilə maraqlanır, viktorinalara qatılır, balaca dostlarını öz əlləri ilə bişirdiyi şirniyyatlara qonaq edir. Onun təşəbbüsü ilə Heydər Əliyev Fondu uşaqların və gənclərin təhsilinə dəstək məqsədilə bir neçə uğurlu proqram reallaşdırır. İndiyədək Heydər Əliyev Fondunun icra etdiyi təkcə “Uşaq evləri və internat məktəblərinə dəstək” layihəsi çərçivəsində 40-dan çox internat və uşaq evi yenidən qurulub. Mehriban xanım Əliyevanın təşəbbüsü ilə bir neçə “Məzun evi” tikilərək uşaq evləri və internat məktəblərinin məzunu olan gənclərin istifadəsinə verilib.

Mehriban xanım Əliyeva daim özündə xeyirxahlığı, humanizm dəyərlərini ehtiva edən təşəbbüslər irəli sürür. İndiyədək onun təşəbbüsü ilə bir neçə dəfə amnistiya aktı qəbul olunub. Əsasən əlamətdar tarixlər, milli bayramlarımız ərəfəsində qəbul olunan bu amnistiya aktlarının icrası nəticəsində 40 minə yaxın məhkum müxtəlif növ cəzalarından azad edilib. Bütün bunlarla Mehriban xanım Əliyeva xeyirxahlığa, humanizmə çağırış edir.

Qadınlar bayramı ərəfəsində Gəncəyə səfər

Mehriban xanım Əliyeva budəfəki qadınlar bayramı ərəfəsində də öz ənənəsinə sadiq qalıb. Belə ki, Mehriban Əliyeva, qızları Leyla Əliyeva və Arzu Əliyeva martın 6-da Gəncə şəhərinə səfər ediblər. Bu səfər də bir sıra səmimi görüşlərlə yadda qalıb. Azərbaycan xalqının Ümummilli Lideri Heydər Əliyevin Gəncə şəhərinin mərkəzində ucaldılan abidəsinin ziyarəti ilə başlayan səfər çərçivəsində Mehriban Əliyeva və qızı Arzu Əliyeva Gəncə şəhər 37 nömrəli tam orta məktəbdə Heydər Əliyev Fondu tərəfindən aparılan təmir-bərpa işləri ilə tanış olublar, Gəncə şəhəri 40 saylı körpələr evi-uşaq bağçasında olarkən Birinci vitse-prezident bağçada məktəbəqədər təhsilin və uşaqların təlim-tərbiyəsinin yüksək səviyyədə təşkili məqsədi ilə müvafiq tapşırıqlar verib. Mehriban Əliyeva, qızları Leyla Əliyeva və Arzu Əliyeva Ermənistan silahlı qüvvələrinin 2020-ci ildə Gəncə şəhərinə raket hücumları nəticəsində həlak olan dinc sakinlərin xatirəsini əbədiləşdirmək üçün inşa edilən Gəncə Memorial Kompleksinin layihəsi ilə də tanış olublar. Birinci vitse-prezident səfər çərçivəsində Gəncə Şəhər Birləşmiş Xəstəxanasının Perinatal Mərkəzində olub. Tibb müəssisəsindəki şəraitlə tanışlıq zamanı Perinatal Mərkəzə Heydər Əliyev Fondu tərəfindən küvəzlər və ultrasəs müayinə aparatı hədiyyə olunub. Gəncəyə səfər zamanı Mehriban Əliyevanın, Şah Abbas və Hüseyniyyə məscidlərində, eləcə də Aleksandr Nevski adına Rus Pravoslav kilsəsində olması isə Azərbaycanın tolerantlıq ənənələrinə sadiq qalmasının növbəti təsdiqidir.

Mübariz ABDULLAYEV

Paylaş:

Baxılıb: 111 dəfə