Ərdoğanın Bakıya ilk səfəri...

Ana səhifə / Gündəm / Ərdoğanın Bakıya ilk səfəri...

Ərdoğanın Bakıya ilk səfəri...

11.05.2022 [10:02]

Şuşa Bəyannaməsinin ratifikasiyasından sonra

Xəbər verildiyi kimi, 26-29 may tarixlərində keçiriləcək “TEKNOFEST Azərbaycan” festivalı ərəfəsində qardaş Türkiyə dövlətinin Prezidenti Rəcəb Tayyib Ərdoğanın ölkəmizə səfəri gözlənilir. Ekspertlərin diqqət yetirdikləri əsas məqam budur ki, bu, Şuşa Bəyannaməsinin ratifikasiyasından sonra Ərdoğanın Azərbaycana ilk səfəri olacaq.

Nurlan QƏLƏNDƏRLİ

Bundan əvvəl Prezident İlham Əliyev martın 10-da Türkiyəyə işgüzar səfərdə olmuşdu. Dövlətimizin başçısı Ankarada Türkiyə Prezidenti ilə görüşmüş, görüşdə iki ölkə arasında müttəfiqlik münasibətlərinin inkişafı, hərbi-texniki sahədə əməkdaşlıq, iqtisadi-ticarət əlaqələri və digər məsələlər müzakirə edilmişdi. Bu, iki ölkə arasında dostluq, qardaşlıq və strateji tərəfdaşlıq münasibətlərinin zirvədə olduğunu, Bakı ilə Ankaranın geosiyasi iradəsinin vacib regional məsələlərin həllini təmin etdiyini bir daha təsdiqləmişdi. Xatırlatmaq lazımdır ki, bəhs olunan görüş zamanı Azərbaycan-Türkiyə müttəfiqlik əlaqələrinin inkişafından bir daha məmnunluq ifadə olunmuş və Prezident İlham Əliyev Prezident Rəcəb Tayyib Ərdoğanı Azərbaycana səfərə dəvət etmişdi.

Ölkələrimiz arasında siyasi münasibətlər ən yüksək səviyyədədir. İqtisadi-ticari əlaqələr də uğurla inkişaf edir. Şübhəsiz ki, Rəcəb Tayyb Ərdoğanın gözlənilən səfəri də əlaqələrin inkişafı baxımından əhəmiyyətli olacaq. Bütövlükdə, Türkiyə-Azərbaycan münasibətlərini müzakirə və təhlil edən analitiklər hazırkı reallıqlar fonunda bir neçə məsələnin xüsusi diqqət mərkəzində olduğunu vurğulayırlar:

- Bunlardan biri enerji sahəsində əməkdaşlıqdır. Dövlət başçısının bəhs olunan səfəri zamanı da bu məsələ müzakirə olunmuş, bu xüsusda Cənub Qaz Dəhlizinin uğurla fəaliyyət göstərdiyi qeyd edilmişdi. Bu dəhliz vasitəsilə qardaş ölkəyə və Türkiyə ərazisindən keçərək Avropaya qaz təchizatının artırılması imkanları, İğdır-Naxçıvan qaz xəttinin çəkilməsi diqqət mərkəzindədir;

- ikinci məqam iqtisadi-ticarət əlaqələrinin daha da genişləndirilməsidir;

- daha bir məsələ hərbi, hərbi texniki, o cümlədən hərbi təlim və tədris sahələrində əməkdaşlığın uğurla davam etdirilməsidir;

- Cənubi Qafqazda postmüharibə dövründə yaranmış yeni reallıqların fonunda Azərbaycan-Türkiyə dostluğu və strateji tərəfdaşlığı regionda dayanıqlı sülhün, etibarlı təhlükəsizliyin və çoxtərəfli əməkdaşlığın təmin olunması baxımından strateji önəm kəsb edir. Bütövlükdə, bölgədə qlobal əhəmiyyətli yeni geostrateji konfiqurasiyanın formalaşmasında Azərbaycan-Türkiyə müttəfiqliyi aparıcı amil kimi çıxış edir;

- iki ölkə arasında Şuşa Bəyannaməsindən irəli gələn addımların atılması da diqqət yetirilən mühüm məsələlərdən biridir. Bu da təsadüfi deyil. Çünki Bəyannamə regionun yeni geostrateji reallıqlarını təsdiqləyən sənəd, eləcə də qardaş ölkələrin strateji tərəfdaşlığının zirvəsidir. Qars müqaviləsindən yüz il sonra - 15 iyul 2021-ci il tarixində iki dost və qardaş ölkə arasında - liderlər Prezident İlham Əliyev və Prezident Rəcəb Tayyib Ərdoğan tərəfindən imzalanan, daha sonra isə ratifikasiya olunan Şuşa Bəyannaməsi müstəsna tarixi, mənəvi, siyasi və hərbi-strateji əhəmiyyət daşıyır. Şuşa Bəyannaməsinin imzalanması ilə hər iki ölkənin yeni hərbi-siyasi təhlükəsizlik çətiri formalaşdırması - yeni milli və regional təhlükəsizlik mexanizmi yaratmasıdır;

- postmünaqişə dövründə Azərbaycan ilə Ermənistan arasında əlaqələrin normallaşdırılması məsələsi də Bakı ilə Ankaranın geostrateji gündəliyinin mühüm tərkib hissəsidir. Azərbaycan ilə Türkiyə 2020-ci il noyabrın 10-da imzalanmış üçtərəfli Bəyanatda təsbit olunmuş bütün müddəaların Ermənistan tərəfindən icrasının vacibliyini qeyd edir, ortaq mövqe sərgiləyirlər. Bu xüsusda Türkiyə və Ermənistan arasında münasibətlərin normallaşdırılması məsələsində də vahid yanaşma ortaya qoyulur. Bu, Bakı ilə Ankaranın prinsipial - milli maraqlara dair məsələlərdə bir-birinin mövqeyini qətiyyətlə dəstəklədiyini göstərir.

Bugünkü reallıqlar iki dost, qardaş, strateji tərəfdaş ölkənin ortaq siyasi iradəsini, birlikdə yeni tarixi nailiyyətlər qazanmaq niyyətini, əzmini əks etdirir. Və bir daha sübuta yetirilir ki, Azərbaycan-Türkiyə dostluğu və strateji tərəfdaşlığı unikal bir nümunədir - dünyada bu iki ölkə qədər bir-birinə yaxın olan ölkələr tapmaq mümkün deyil. Türkiyə güclüdürsə, Azərbaycan da güclüdür. Azərbaycan güclüdürsə, Türkiyə də güclüdür!

Paylaş:

Baxılıb: 543 dəfə