MDB ölkələri ilə müqayisədə...

Bakı:

26 °C

67 %

10 m/s

Əlaqə

AZ RU EN

Ana səhifə / MEDİA / MDB ölkələri ilə müqayisədə...

MDB ölkələri ilə müqayisədə...

16.01.2024 [11:35]

Azərbaycan qat-qat irəlidədir

Günel ABBAS

Bu gün sosial şəbəkələrdə hər mövzuda, hər kontekstdə informasiyaya rast gəlmək mümkündür. Ancaq yayılan informasiyaların nə dərəcədə həqiqəti əks etdirməsi də ayrılıqda müzakirə məsələsidir. Təbii ki, ciddi media resurslarında gündəmə gələn informasiyaların etibarlılıq dərəcəsi daha yüksəkdir. Son zamanlar media resurslarında “feyk nyus”lara az-az rast gəlinir. Bu da bilavasitə media haqqında yeni qanunun tələbləri ilə bağlıdır.

Müstəqillik dövrünə nəzər saldıqda görürük ki, ötən illər ərzində fikir, söz və məlumat azadlığının təmin edilməsi istiqamətində çoxsaylı işlər görülüb. 1998-ci ildə bu sahədə ilk addımlar atılıb. Xüsusi qeyd etmək lazımdır ki, Heydər Əliyevin 1998-ci il 18 iyun tarixli sərəncamı ilə təsdiq edilmiş “İnsan hüquqlarının müdafiəsinə dair Dövlət Proqramı”, həmçinin 1998-ci il avqustun 6-da imzaladığı “Azərbaycan Respublikasında söz, fikir və mətbuat azadlığının təmin edilməsi sahəsində tədbirlər haqqında” Fərman ölkəmizdə söz, mətbuat və fikir azadlıqlarının təminatına əlverişli şərait yaradıb.

Günümüzdə informasiyaya çıxış imkanları kifayət qədər genişdir. Elə buna görə də müasir cəmiyyətin əsas atributu fikir, söz və məlumat azadlığı hesab olunur. Çünki internet resursları üzərindən istənilən informasiyanı əldə etmək mümkündür. Ancaq təəssüf ki, internet resurslarında zərərli, şəxsi maraqlara hesablanmış məlumatlar da yayılmaqdadır. Belə ki, sosial şəbəkələrdə müxtəlif adlarla doğru, ya da yanlış informasiyanı rahat şəkildə yaymaq mümkündür. Sosial şəbəkələrə tam nəzarət etmək mümkünsüz olduğundan, müəyyən qüvvələr bu imkanlardan şəxsi maraqlar naminə faydalanmağa çalışır. Ekspertlər hesab edir ki, bu prosesin qarşısını almağın yeganə yolu cəmiyyətin dəqiq informasiyalara çıxış imkanlarının daha da genişləndirilməsindən keçir.

Mövzu barədə suallarımızı Azərbaycan Mətbuat Şurası İdarə Heyətinin üzvü, “Bakı-Xəbər” qəzetinin baş redaktoru Aydın Quliyevə ünvanladıq. Onun sözlərinə görə, Azərbaycan son illər aparılan islahatların əsas istiqamətlərindən biri də söz azadlığının müdafiəsi, media nümayəndələrinin hüquqlarının və onların sosial haqlarının müdafiəsidir: “Eyni zamanda, media sahəsində çalışanların hüquqlarının beynəlxalq normalara uyğun şəkildə yeni qanunvericilikdə əks olunması istiqamətində addımlar atıldı. Bu ,söz azadlığı, plüralizm və fikirlərin sərbəst şəkildə ifadə olunması üçün önəmli bir prosesdir.. Məlum olduğu kimi, Konstitusiya və müvafiq sahə qanunları çərçivəsində hər kəsə fikrini sərbəst şəkildə ifadə etməsi üçün münbit zəmin mövcuddur. Qarşıya çıxan neqativ halların aydın şəkildə ictimai müzakirə predmetinə çevrilərək qısa müddətdə həll olunması və medianın üzərinə düşən bir çox məsələlərlə bağlı Azərbaycan dövləti ciddi islahatlar aparmaqda iradəlidir. Bu istiqamətdə keçirilən treninqlər, icra olunan layihələr, insanların fikirlərini sərbəst şəkildə ifadə etməsi üçün atılan addımlar, beynəlxalq və yerli medianın inteqrasiyası onu göstərir ki, Azərbaycan digər MDB ölkələri ilə müqayisədə qat-qat irəlidədir”.

A.Quliyev əlavə edib ki, bu gün sosial şəbəkələrdə, rəqəmsal informasiya orqanlarında da insanlar öz fikirlərini azad şəkildə ifadə edə bilirlər: “Vətəndaşların gündəmə gətirdikləri problemlər əgər haqlıdırsa, qısa zamanda həll olunmasına heç bir şübhə yoxdur. Bu da onu göstərir ki, Azərbaycan dövləti media ilə vətəndaşların, bütün cəmiyyətin arasında bir körpünün yaranmasında maraqlıdır və bu işin peşəkar təşkili üçün addımlar atmaqdadır. Bütün bu addımların hər biri də şübhəsiz ki, Azərbaycan dövlətinin güclənməsinə hesablanır. Bu istiqamətdə Azərbaycanda mövcud vəziyyət qənaətbəxşdir və gələcəkdə beynəlxalq təcrübəyə də istinad edərək xalqın və dövlətin maraqlarını qorumaq şərti ilə inteqrasiya prosesinin sürətlənməsini zəruri hesab edirəm”.

Göründüyü kimi, bu istiqamətdə dövlət müəyyən addımlar atır, yeni qanunverici baza yaradılıb, media resurslarının inkişafına yönəlik layihələr keçirilir. Təbii ki, dünyanın hər yerində bütün sahələrdə olduğu kimi burada da müəyyən çatışmazlıqlar da mövcuddur. Bu mənada ekspertlər hesab edir ki, çatışmazlıqların aradan qaldırılması üçün beynəlxalq təcrübələrə istinada ehtiyac var.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Fikir, söz və məlumat azadlığının, plüralizmin inkişaf etdirilməsi” istiqaməti üzrə hazırlanmışdır

Paylaş:

Baxılıb: 772 dəfə