Gənclər Siyasəti üzrə I Qlobal Forumla bağlı Təşkilat Komitəsinin iclası keçirilib

Bakı:

24 °C

66 %

3 m/s

Əlaqə

AZ RU EN

Ana səhifə / Siyasət / Gənclər Siyasəti üzrə I Qlobal Forumla bağlı Təşkilat Komitəsinin iclası keçirilib

Gənclər Siyasəti üzrə I Qlobal Forumla bağlı Təşkilat Komitəsinin iclası keçirilib

17.09.2014 [09:20]

Gənclər və İdman Nazirliyində (GİN) oktyabrın 28-30-da Bakıda keçiriləcək Gənclər Siyasəti üzrə I Qlobal Forumla bağlı Təşkilat Komitəsinin iclası keçirilib.
GİN-in mətbuat xidmətindən AzərTAc-a bildiriblər ki, iclasda 20-ə yaxın dövlət qurumunun - Daxili İşlər, Milli Təhlükəsizlik, Maliyyə, Xarici İşlər, Səhiyyə, Nəqliyyat, Rabitə və Yüksək Texnologiyalar, Mədəniyyət və Turizm nazirlikləri, Azərbaycan Dövlət Teleqraf Agentliyi (AzərTAc), “Azərbaycan Televiziya və Radio Verilişləri” Qapalı Səhmdar Cəmiyyəti, Azərbaycan Respublikasının Prezidenti yanında Gənclər Fondu, Dövlət Miqrasiya, Dövlət Sərhəd xidmətləri, Dövlət Gömrük Komitəsi, “Azərbaycan Hava Yolları” Qapalı Səhmdar Cəmiyyəti və “İçərişəhər” Dövlət Tarix-Memarlıq Qoruğunun rəsmiləri iştirak ediblər.
Gənclər və idman naziri Azad Rəhimov dünyada baş verən siyasi proseslərdə gənclərin rolunun çox böyük olduğunu bildirib. Diqqətə çatdırıb ki, məhz elə bu səbəbdən gənclər siyasətinə böyük önəm verən BMT baş katibi Pan Gi Mun tutduğu vəzifəyə ikinci dəfə seçilərkən təqdim etdiyi 5 əsas istiqamətdən biri gənclər siyasəti ilə bağlı olub. Baş katib, həmçinin qurumun nəzdində gənclər siyasəti üzrə xüsusi büronun yaradılması qərarına gəlib. Qeyd edilib ki, BMT-nin nəzdində yaradılmış gənclər siyasəti üzrə xüsusi qurumun elçisi Əhməd Əlhəndavi ölkəmizdə rəsmi səfərdə olub və Forumla bağlı geniş müzakirələr aparılıb.
Azad Rəhimov deyib ki, Azərbaycan Forumun ölkəmizdə keçirilməsi təklifini irəli sürən ilk ölkələrdən biri olub. Nazir bu ilin martında ABŞ-a səfəri çərçivəsində BMT-də keçirdiyi görüşdə Forumun Azərbaycanda keçirilməsi ideyasının dəstəkləndiyini vurğulayıb. Bildirib ki, Bakıda keçiriləcək Gənclər Siyasəti üzrə I Qlobal Forum dünyanın gənclər siyasəti sahəsində yeni model olacaq.
Foruma 170-dən çox ölkədən 700-dən artıq iştirakçının qatılacağı gözlənilir. Mötəbər tədbirdə gənclər siyasəti üzrə yeni istiqamətlərin işlənilməsi, növbəti illər üçün yeni addımların atılması, gənclər siyasəti üzrə müxtəlif ölkələrlə təcrübə mübadiləsinin aparılması və bu sahədə əhəmiyyət kəsb edən digər mövzular diqqət mərkəzində olacaq. Forumda, eyni zamanda, gənclər siyasəti üzrə yeni prinsipləri müəyyən edən sənədin də hazırlanması nəzərdə tutulur. I Qlobal Forumun əsas tərəfdaşları Azərbaycan Hökuməti, Avropa Şurası, UNESCO, BMT-nin İnkişaf Proqramı və gənclər siyasəti üzrə elçisidir.

Paylaş:

Baxılıb: 705 dəfə