"Kuwait Times" qəzetində Azərbaycanla bağlı məqalə dərc edilib

Bakı:

25 °C

67 %

1 m/s

Əlaqə

AZ RU EN

Ana səhifə / Siyasət / "Kuwait Times" qəzetində Azərbaycanla bağlı məqalə dərc edilib

"Kuwait Times" qəzetində Azərbaycanla bağlı məqalə dərc edilib

05.08.2009 [14:01]

Yazıda qeyd olunur ki, Prezident İlham Əliyevin rəhbərliyi altında neftdən gələn gəlirlər bugünkü və gələcək nəsillərin mənafeyi naminə istifadə olunur
“Əsrin müqaviləsi”nin 15 illiyi ərəfəsində Küveyt və Körfəz regionunun aparıcı gündəlik ingilisdilli “Kuwait Times” qəzetinin 2 avqust nömrəsində Azərbaycanın Küveytdəki səfiri Şahin Abdullayevin “Azərbaycanın neft tarixi: Orta əsrlərdən çağdaş günümüzə qədər” adlı məqaləsi dərc edilib.
Məqalədə səfir Ş.Abdullayev Azərbaycan nefti haqqında orta əsr ərəb və Avropa mənbələrindən olan yazılara istinad edərək, dünyada sənaye üsulu ilə ilk neft quyusunun Azərbaycanda qazıldığını və müasir neft istismarı və hasilatında istifadə olunan texnologiyaların Bakıda tətbiq edildiyini qeyd edib. Məqalə müəllifi XX əsrin əvvəllərində dünya neftinin yarısının Azərbaycanda istehsal olunduğu barədə məlumat verərək, Bakının dünya neft ticarətinin mərkəzinə çevrilməklə, bütün Qafqazın iqtisadi inkişafında xüsusi rol oynadığını nəzərə çatdırıb. Məqalədə, həmçinin Şərqdə ilk demokratik respublika olan ADR-nın süqutundan sonra Bakı neftinin bolşeviklər tərəfindən istismarı və 1940-cı ildə SSRİ-də neft hasilatının 72 faizinin Bakının payına düşdüyü bildirilir. İkinci Dünya müharibəsində Hitlerin və müttəfiq dövlətlərin Bakı haqqında planlarına dair məlumat verən səfir, sovet tank və təyyarələrinin mütləq əksəriyyətinin Bakı nefti ilə hərəkətə gəldiyini və bununla da Azərbaycan neftinin müharibənin taleyində əlahiddə rol oynadığını vurğulayıb.
Yazıda, həmçinin Azərbaycan Dövlət Neft Akademiyasının timsalında Azərbaycanın sovet və dünya neft-qaz istehsalı sənayesinə verdiyi töhfələr, müstəqilliyin bərpa edilməsi və ümummilli lider Heydər Əliyevin neft strategiyası ilə ölkəmizin neft sənayesi qarşısında yeni üfüqlərin açıldığı qeyd olunur. “Əsrin müqaviləsi”nin imzalanması mərasimində Ulu öndər Heydər Əliyevin nitqindən “...Neft sənayemiz yeni başlanğıca qədəm qoyub. Bu mərhələdə, Azərbaycan xalqının iradəsini ifadə edərək, təbii resurslarımızın istismarı üçün lazımi tədbirlər görəcəyik” - sözləri sitat gətirilərək, çar Rusiyası və Sovet dövründən sonra, “Əsrin müqaviləsi” və yeni neft strategiyası ilə bu gün neftimizin xalqımızın mənafeyi naminə istifadə edildiyi vurğulanır. Azərbaycan Prezidenti İlham Əliyevə istinadla 1994-cü ildə Azərbaycanın düzgün seçim etdiyi və Ulu öndər Heydər Əliyevin neft strategiyasının bu gün öz bəhrələrini verdiyi oxucuların diqqətinə çatdırılır. Yenə də Prezident İlham Əliyevə istinad edərək, hazırda Azərbaycanın yeddi neft-qaz ixrac kəmərinə malik olduğu, bunların sırasında Heydər Əliyev adına Bakı-Tbilisi-Ceyhan əsas neft ixrac kəmərinin xüsusi rol oynadığı bildirilir.
Prezident İlham Əliyevin rəhbərliyi altında neftdən gələn gəlirlərin bugünkü və gələcək nəsillərin mənafeyi naminə istifadə olunduğunu qeyd edən səfir Ş.Abdullayev, Dövlət Neft Fondunun fəaliyyəti və mineral ehtiyatların hasilatı ilə məşğul olan sənaye sahələrində şəffaflıq təşəbbüsündə Azərbaycanın fəal iştirakı haqqında ətraflı məlumat verir. Azərbaycanın bu təşəbbüsün icrasında qabaqcıl dövlət olduğu, neft və qaz hasilatından əldə olunan gəlirlərin ictimaiyyətə açıq, müfəssəl və başa düşülən formada mütəmadi əsasda çatdırıldığı və bunun nəticəsi olaraq, Azərbaycan Respublikası Dövlət Neft Fondunun 2007-ci ildə BMT-nin dövlət xidməti mükafatına layiq görüldüyü vurğulanır.
Habelə, Azərbaycanın mineral ehtiyatların hasilatı ilə məşğul olan sənaye sahələrində şəffaflıq təşəbbüsünün prinsip və meyarlarına uyğunluğunu yoxlayan keyfiyyətə təminat prosesini uğurla keçdiyi və bunun nəticəsi olaraq, Şəffaflıq Təşəbbüsü Şurası tərəfindən 2009-cu il fevralın 16-dan 18-dək Dohada keçirilən 4-cü Beynəlxalq konfransda Azərbaycanın şəffaflıq təşəbbüsünün 2009-cu il üzrə “EİTİ Award 2009” adlı mükafatına layiq görüldüyü qeyd olunur.
Məqalənin sonunda yüksək şəffaflıq və düzgün idarəetmə prinsipləri ilə Azərbaycanın neft və qaz ehtiyatlarından əldə olunan gəlirlərin bugünkü və gələcək nəsillərin mənafeyi naminə yeni-yeni imkanlar yaratdığı və Azərbaycan iqtisadiyyatının qeyri-neft sektorunun uğurla inkişaf etdiyi vurğulanır.

Paylaş:

Baxılıb: 1309 dəfə