Aslan Aslanov: Pandemiya dövründə etibarlı xəbər mənbələrinə müraciətlərin artdığını gördük

Bakı:

24 °C

47 %

1 m/s

Əlaqə

AZ RU EN

Ana səhifə / Siyasət / Aslan Aslanov: Pandemiya dövründə etibarlı xəbər mənbələrinə müraciətlərin artdığını gördük

Aslan Aslanov: Pandemiya dövründə etibarlı xəbər mənbələrinə müraciətlərin artdığını gördük

10.06.2020 [09:23]

Pandemiya dövründə jurnalistikanın ənənəvi prinsipləri dezinformasiyaların qarşısının alınmasında böyük rol oynadı və biz etibarlı xəbər mənbələrinə müraciətlərin artdığını gördük.
Bu fikirləri AZƏRTAC-ın İdarə Heyətinin sədri, OANA-nın vitse-prezidenti Aslan Aslanov Avropa Xəbər Agentlikləri Alyansının (EANA) baş katibi Aleksandr Giboiyə müsahibəsində bildirib.
Müsahibədə Azərbaycanda xüsusi karantin rejimi müddətində dövlət başçısının tapşırığı ilə hökumətin həyata keçirdiyi miqyaslı sosial tədbirlər paketindən, evdə qaldığı müddətdə insanlara göstərilən maddi dəstəkdən bəhs edilib. Diqqətə çatdırılıb ki, bu dövrdə yayılan şayiələrin qarşısının alınmasında Operativ Qərargahın jurnalistlərlə birgə fəaliyyəti önəmli rol oynayıb. “Belə həssas məqamlarda istənilən özfəaliyyət, yoxlanılmamış məlumatın yayımı vəziyyəti daha da ağırlaşdıra bilər. Biz sosial şəbəkələr, mesencerlər vasitəsilə çox sayda dezinformasiya, uydurma məlumatlar paylaşıldığının şahidi olduq. Kimlərsə haradansa nələrsə eşidib onu tanışlarına göndərir və bu da bir qar topası kimi böyüyərək minlərlə insanı əhatə edir. Azərbaycanda karantin rejimi müddətində Nazirlər Kabineti yanındakı Operativ Qərargahın müntəzəm brifinqlər keçirməsi və sualları operativ cavablandırması vəziyyəti xeyli dəyişdi”, - deyə Aslan Aslanov bildirib.
AZƏRTAC-ın xüsusi karantin rejimində fəaliyyəti ilə bağlı suala cavab olaraq İdarə Heyətinin sədri qeyd edib ki, agentlik insanları COVID-19 xəstəliyi ilə bağlı məlumatlandırmaq və maarifləndirmək üçün işlərə hələ yanvardan başlayıb, infoqrafikalar, ekspert rəyləri, videoreportajlar hazırlayaraq abunəçilərə göndərib, veb-resurslarında, sosial şəbəkə səhifələrində yayıb: “İnsanların evdə qaldığı xüsusi karantin rejimində etibarlı məlumata olan ehtiyaclarının necə artdığının, bizim agentliyi doğru məlumat mənbəyi kimi seçdiklərinin şahidi olduq. Statistik məlumatlara əsasən deyə bilərəm ki, karantin rejimində bizim informasiyalara müraciətlər 40 faizə qədər yüksəldi. Sosial şəbəkə səhifələrimizdə həm abunəçilərin sayı, həm də digər KİV-lərin müraciəti artdı. Bu da agentliyin xəbərlərinə olan etibardan irəli gəlir”.
Müsahibədə, həmçinin AZƏRTAC-ın xüsusi karantin rejimi müddətində əməkdaşların təhlükəsizliyini təmin etmək istiqamətində görülən tədbirlərdən danışılıb. Qeyd olunub ki, işçilərə dezinfeksiyaedici maddələr, tibbi maskalar paylanılıb. Kollektivin 70 faizi məsafədən çalışsa da agentlik 8 dildə informasiya, video və foto buraxılışını davam etdirib.
Postpandemiya dövründə xəbər agentliklərinin fəaliyyəti ilə bağlı fikirlərini paylaşan Aslan Aslanov vurğulayıb ki, sosial şəbəkə bumuna, açıq informasiya mənbələrinin sürətlə artmasına baxmayaraq, gələcəkdə də xəbər agentliklərinə ehtiyac olacaq. “Sosial medianın genişlənməsi, onlayn media resurslarının artması, informasiyaya çıxışın hər kəs üçün əlçatan olması agentliklərə təsir edir və edəcək. Lakin cəmiyyətin seçim etmək imkanı olacaq: 100 illik tarixi olan media qurumuna etibar etsin, yoxsa yeni yaranan hansısa bir resursa? Əlbəttə, sosial-psixoloji amil seçimi böyük təcrübəsi olan medianın xeyrinə edəcək. Pandemiya dövründə biz bir daha bunun şahidi olduq. Eyni zamanda, real şərait göstərir ki, agentliklər informasiya texnologiyalarından daha çox yararlanaraq resurslarını gücləndirməli, fəaliyyətlərini şaxələndirməlidirlər”, - deyə o qeyd edib.

Paylaş:

Baxılıb: 319 dəfə