5 noyabr mitinqinə “hazırlıq”...

Bakı:

23 °C

43 %

6 m/s

Əlaqə

AZ RU EN

Ana səhifə / Siyasət / 5 noyabr mitinqinə “hazırlıq”...

5 noyabr mitinqinə “hazırlıq”...

05.11.2022 [09:55]

Ermənistanın sərhəd təxribatları hansı məqsədlərə xidmət edir?

Nardar BAYRAMLI

Azərbaycanla Ermənistan arasında münasibətlərin normallaşdırılması istiqamətində keçirilən görüşlərdən və əldə edilən razılaşmalardan sonra erməni tərəfi müxtəlif təxribatlara əl atır. Bu yanaşma Ermənistan üçün artıq ənənə halına çevrilib. Oktyabrın 31-də Rusiya Prezidenti Vladimir Putinin təşəbbüsü ilə Soçi şəhərində Azərbaycan Prezidenti İlham Əliyevin və Ermənistanın baş naziri Nikol Paşinyanın görüşü keçirilib. Üçtərəfli görüşdə bəzi razılaşmalar əldə olunub və yekun bəyanat qəbul edilib. Paşinyan sülh razılaşmasının tərəfdarı olduğunu desə də, görüşdən sonra erməni hərbi birləşmələri dövlət sərhədində təxribatlar törədir, mövqelərimizi atəşə tutur.

Müdafiə Nazirliyinin məlumatına görə, noyabrın 3-dən 4-nə keçən gecə Ermənistan silahlı qüvvələrinin bölmələri beş saat müddətində Basarkeçər rayonunun Əzizli və Yuxarı Şorca yaşayış məntəqələri istiqamətlərində yerləşən mövqelərindən Azərbaycan Ordusunun Kəlbəcər rayonunun Yellicə və Mollabayramlı yaşayış məntəqələri istiqamətlərində yerləşən mövqelərini müxtəlif çaplı atıcı silahlardan istifadə etməklə fasilələrlə atəşə tutub. Ordumuzun bu istiqamətlərdə yerləşən bölmələri tərəfindən adekvat cavab tədbirləri görülüb.

Ümumiyyətlə, ermənilərin bu təxribatı hansı məqsədlərə hesablanıb? Məsələ ilə bağlı qəzetimizə açıqlama verən hərbi ekspert Emin Həsənli bildirib ki, erməni tərəfi mütəmadi olaraq təxribatlar törətməklə bölgədə gərginlik yaratmağa çalışır. Onun sözlərinə görə, Ermənistan heç vaxt beynəlxalq hüquq normalarına əməl etməyib. Buna görə də, Azərbaycan BMT Təhlükəsizlik Şurasının müvafiq qətnamələrini öz gücünə icra etdi. Bu gün Azərbaycan Ordusu çox güclüdür, qarşıya qoyulan bütün tapşırıqları yerinə yetirir. Bundan sonra da istənilən tapşırığı yerinə yetirməyə hazırdır. Əgər ermənilər təxribatlara davam etsələr, dəmir yumruq yenə də başlarına dəyəcək.

E.Həsənlinin fikrincə, Azərbaycan növbəti dəfə də özünümüdafiə məqsədilə əməliyyatlar keçirə bilər. Dövlət sərhədində təxribatların törədilməsinə gəlincə, ekspert hesab edir ki, Ermənistan regionda vəziyyəti gərginləşdirməyə çalışmaqla münasibətlərin normallaşdırılması təşəbbüslərinə qarşı çıxır. Onun sözlərinə görə, belə təxribatlar rəsmi İrəvanın özü üçün problemlər yaradacaq: “Ermənistan müharibədə məğlub olub, ona görə də mövcud reallıqlarla barışmalı, razılaşmalara, o cümlədən beynəlxalq hüquq normalarına və götürdüyü öhdəliklərə əməl etməlidir. Azərbaycan öz təhlükəsizliyini yüksək səviyyədə təmin edir. Dövlət sərhədində Ermənistanın hərbi təxribatlarının qarşısının necə alındığını görürük. 12-13 sentyabr hadisələri buna sübutdur. Bu mənada, erməni tərəfi bundan sonra da layiqli cavablarını alacaq”.

Həmsöhbətimiz deyib ki, dövlət sərhədində mövqelərimiizn atəşə tutulması Ermənistandakı daxili siyasi gərginliklə də bağlı ola bilər: “Məlumdur ki, Ermənistan müxalifəti noyabrın 5-də İrəvanda mitinq təyin edib. Dövlət sərhədində bu təxribatların törədilməsi həmin mitinqlə bağlı ola bilər. Hakimiyyət çalışır ki, sərhəddə insident yaratmaqla erməni cəmiyyətinin diqqətini mitinqdən yayındırsın. Çünki revanşist müxalifət Azərbaycanla sülh sazişinin imzalanmasına qarşı çıxır. Ona görə də Paşinyan hakimiyyətinə mitinqlər vasitəsilə təsir etməyə çalışırlar. Hakimiyyət də adekvat olaraq bu kimi hallarla cəmiyyəti, insanları mitinqdə iştirakdan çəkindirməyə çalışır”. E.Həsənlinin fikrincə, digər bir ehtimal erməni ordusunda keçmiş hakimiyyətin kadrlarının çox olması ilə bağlıdır. Belə ki, hazırda orduda Koçaryanın və Sarkisyanın zamanında yüksək vəzifələrə təyin olunmuş hərbçilər var. Həmin hərbçilər revanşistlərin tapşırıqlarını yerinə yetirməklə, sərhəddə vaxtaşırı olaraq təxribatlar törədə bilərlər. Bununla da, sülh prosesini pozmağa çalışırlar.

Ekspert qeyd edib ki, Ermənistanda siyasi hakimiyyət də, hərbi komandanlıq da gözəl dərk edir ki, Azərbaycanla Ermənistan heç bir halda müqayisə belə edilə bilməz: “Bu təxribatlar davam edəcəyi təqdirdə isə Azərbaycan ordusundan layiq olduqları cavabı alacaqlarını bilirlər”.

Paylaş:

Baxılıb: 742 dəfə