Yenidən doğulmaq...

Bakı:

26 °C

64 %

12 m/s

Əlaqə

AZ RU EN

Ana səhifə / Siyasət / Yenidən doğulmaq...

Yenidən doğulmaq...

28.04.2023 [09:50]

Zərifə Əliyeva - 100

Günel ABBASOVA

Həyatın normal qanunlarından biri insan övladının doğulub, müəyyən bir həyat yaşayıb sonra bu dünyadan köçməsidir. Yəni, əvvəlcə doğulub, sonra ölürsən. Doğum və ölüm tarixləri də buna uyğun olaraq ardıcıl gəlir. Bu gün 100 illik yubileyini qeyd etdiyimiz görkəmli alim, oftalmoloq Zərifə Əliyevanın həyat yolu qədər doğum və ölüm tarixləri arasında möcüzəvi bir əlaqə var - doğulduğu və həyatdan köçdüyü tarixlər eyni aya təsadüf edir. Ona görə möcüzəvi adlandırıram ki, burada sanki dünyanın bütün nizamı pozulub. Necə? Biz bu ay əvvəlcə Zərifə xanımın anım gününü qeyd etdik. İndi - təxminən bir həftə sonra onun doğum gününü qeyd edirik. Bu o deməkdir ki, bəzi insanlar həyatdan köçsə də, “yenidən doğula bilirlər”. Bəziləri işıldayan gözlərdə, bəziləri şeirlərdə, bəziləri nəğmələrdə doğularaq insanların həyatına işıq saçır...

Ümumiyyətlə, zaman keçdikcə olduqca vacib və əhəmiyyətli bir şeyi xatırlayanda, çox vaxt sondan başlamalı olursan. Bu yazını hazırlayanda xatirələri çox araşdırmalı oldum. Qərara gəldim ki, Zərifə xanım haqqında xatirələr o qədər canlıdır ki, ölümü belə yaxına buraxmır. Yəqin ki, bu hissləri başqaları da yaşayıb...

Mən həmişə belə hesab etmişəm ki, (bəlkə də çoxları mənimlə razı deyil), faydalı ictimai fəaliyyət üçün də istedad lazımdır. Necə ki, cərraha, riyaziyyatçıya, dövlət xadiminə istedad gərəkdir. Zərifə xanımda belə bir istedad var idi. Odur ki, ona üz tutan insanlarla asanlıqla dil tapa bilərdi. Bu xüsusiyyət yalnız istedadı və güclü hissiyyatı olan adamlara məxsusdur.

O, tibb elmi sahəsində elə bir tədqiqatlar aparırdı ki, burada vəziyyət bir qədər təzadlı şəkil almışdı. Əmək heç də mücərrəd şey deyil, hər şeydən əvvəl fabriklərdə, zavodlarda, tarlalarda, laboratoriyalarda, dəzgah arxasında iş deməkdir. Əmək insanı yaratmaqla yanaşı, istehsalçı üçün xüsusi həyat şəraiti də yaradıb. Odur ki, insanın sağlamlığı ilə hesablaşmamaq olmaz. Və ən nəhayət, insan öz iş yerində şüurlu həyatının üçdə birini keçirir. Bizim zəmanədə işçinin bütün gücü ilə fəaliyyət göstərməsi üçün görmə qabiliyyətinin vəziyyətindən çox şey asılıdır və müasir cəmiyyətdə görmə qabiliyyətinin yaxşılaşdırılmasına tələbat günü-gündən artır. Bununla yanaşı, həmin mövzuya həsr olunmuş fundamental elmi əsərlər yox idi, yalnız ayrı-ayrı elmi fraqmentlər mövcud idi. Üstəlik onlar da vahid elmi sistem halında toplanmamışdı. Zərifə xanım kimi sosial həssaslığa malik olmaq lazım idi ki, öz istedadını, bilik və bacarığını olduqca çətin, mürəkkəb və xeyirxah, eyni zamanda, heç də həmişə layiqincə qiymətini almayan bir sahənin xidmətlərinə sərf edəsən.

Sonda bir tarixi haşiyə çıxmaq istərdim. Ölkələrin birində dövlət başçısı seçmək lazım gəlir. Bir çox mübahisələrdən və müzakirələrdən sonra üç namizəd qalır. Uzun müddət onların heç biri səslərin çoxunu toplaya bilmir. Bu zaman el ağsaqqalı üzünü toplaşanlara tutub deyir: “Bunlardan biri Ağıllıdır, biri Qüdrətlidir, biri də Xeyirxah! İndi özünüz seçin! “ Hamı Xeyirxaha səs verir. Bu mənada Zərifə xanım Əliyeva haqqında fikirlərimi bir sözlə ifadə etməli olsaydım, deyərdim: o həm Xeyirxah , həm Ağıllı , həm də Qüdrətli idi!

Paylaş:

Baxılıb: 583 dəfə