Qondarma rejimin “maliyyə qutusu”...

Ana səhifə / Siyasət / Qondarma rejimin “maliyyə qutusu”...

Qondarma rejimin “maliyyə qutusu”...

26.08.2023 [11:05]

Ərazi bütövlüyümüzü tanıdığını bəyan edən İrəvan separatçılara niyə yardım edir?

Ermənistanın qeyri-konstruktiv mövqeyi regionda sülhün bərqərar olmasına maneçilik törətməsi ilə yanaşı, təhlükəsizliyə də təhdid yaradır. İki ilə yaxındır ki, davam edən və iki istiqamətdə aparılan Ermənistan ilə Azərbaycan arasındakı münasibətlərin normallaşması prosesinin uzanması, bəzi hallarda isə pozulması da məhz rəsmi İrəvanın qeyri-konstruktiv mövqeyi ilə əlaqədardır. Belə ki, 2021-ci ilin dekabrından başlayaraq sülhyaratma prosesində vasitəçilik edən Avropa İttifaqının moderatorluğu ilə baş tutan danışıqların nəticə verməməsinin əsas səbəbi Ermənistanın mövqesizliyi, daha doğrusu, bu ölkənin ikiüzlü siyasət yürütməyə çalışması ilə əlaqədardır. Onlar bu kimi məkrli addımlarla nələrəsə nail ola biləcəklərini düşünürlər. Bir yandan Brüssel prosesinə sadiq olduğunu bildirən, hətta görüşlərdə proqressiv irəliləyişlərə belə “hə” deyən, Azərbaycanın ərazi bütövlüyünü detallı şəkildə tanıyan Ermənistan digər tərəfdən təxribatlarını davam etdirir. Bir tərəfdə sülhdən, ərazi bütövlüyünün tanınmasından, delimitasiya və demarkasiyanın vacibliyindən bəhs açan İrəvan nəticədə nəinki üzərinə götürdüyü öhdəliklərə riayət etmir, hətta verdiyi sözü belə danır. Məsələn, Laçın dövlət sərhəd-buraxılış məntəqəsi ilə bağlı BMT TŞ-da müzakirələrin başladılması bəhanəsi də məhz Ermənistanın ikiüzlü siyasətinin bariz sübutlarından idi. Əldə edilən razılaşmaya əsasən Azərbaycan torpaqlarından çıxmalı olan erməni silahlı birləşmələrini geri çəkmək yerinə silahlı təxribatlara əl atan, ərazi bütövlüyümüzü tanıdığını bəyan etməyin fonunda qondarma rejimə “kömək etməyə çalışan” Ermənistan bununla danışıqlar prosesində də qeyri-müəyyənlik yaradır. Bu qeyri-müəyyənlik isə bütövlükdə, prosesin sürətlənməsini, sülhün və təhlükəsizliyin təmin olunmasını ləngidir. Amma bu kimi “mövqe” Ermənistan üçün yaxşı gələcək vəd etmir.

İrəvanın yeni “oyunu”...

Yeri gəlmişkən, rəsmi İrəvan yeni təxribatı ilə gündəmə gəlib. Belə ki, Ermənistan hökuməti Qarabağda Rusiya sülhməramlılarının nəzarət etdiyi ərazilərdə hələ də qalan qondarma və oyuncaq rejimə “müharibədən sonrakı dövrdə yaranmış sosial gərginliyin azaldılmasına yönəlmiş əlavə maliyyələşmə üçün” dövlət büdcəsindən 4 milyard dram məbləğində dövlətlərarası kredit verməyi planlaşdırır. Erməni mediasının xəbərinə görə, müvafiq qərar cümə axşamı hökumətin iclasında qəbul edilib.

Göründüyü kimi, bu qərar bütövlükdə prosesə vurulan böyük bir zərbədir. BMT TŞ məğlubiyyətini “həzm edə bilməyən” ermənilər bu kimi sərsəm addımları ilə özlərini çətin vəziyyətə sürükləyirlər. Son 4 ayda bir neçə dəfə Azərbaycanın ərazi bütövlüyünü detallı şəkildə tanıdığını bəyan edən, Qarabağı suveren Azərbaycan torpağı kimi qəbul edən Ermənistanın bu addımı sözünə dönük çıxmaqdır. Bunun nəticəsi isə ağır ola bilər...

Təxribatlar dayandırılmalıdır...

Bəli, Azərbaycanın sülh çağırışına adekvat cavab verməyən, qarşılığında qondarma rejimə “kömək əli uzatmaqla” yenidən prosesləri dalana aparan Ermənistan hələ də müəyyən “qaranlıq məsələlərə” ümid edir. Ermənistan sülh gündəliyini uzatmaq, proseslərin sürətini azaltmaq üçün bütün ünvanların “qapısını döymək”lə yanaşı, Azərbaycana qarşı çirkin oyunlar oynamağa niyyətlənir. Təbii ki, İrəvan bu kimi addımlarında bəzi regionda marağı olan ölkələrin dəstəyinə “ümid” bağlayır. Amma unudur ki, Azərbaycan bütün platformalarda İrəvanın qondarma iddialarının ifşası ilə bağlı situasiya formalaşdırıb - bunun ən real görüntüsü isə BMT TŞ müzakirələri idi. Təbii ki, hər zaman olduğu kimi onların bu cəhdləri də fiasko ilə nəticələnəcək - artıq Ermənistan anlamalıdır ki, başqa çıxış yolu yoxdur və Azərbaycana qarşı təxribatlarını dayandırmalıdır.

Ermənistan qaranlıq fikirləri ilə...

Ermənistanın bu kimi qeyri-konstruktiv mövqeyi regionda təhlükəsizliyin təmini ilə yanaşı, bu dövlətin gələcək inkişafını da yubadır. Onsuz da ötən 30 illik işğal dövründə Ermənistan iqtisadi - siyasi müstəvidə çox şey itirib - bu dövlət müstəqil olmaq şansını itirib. Yenidən eyni metodlarla regionda qarışıqlığın davam etməsinə şərait yaratmaqla Ermənistan özünə daha böyük pisliyi etmiş olur. Çünki Azərbaycanın sülhlə bağlı mövqeyi nə qədər humanist olsa da, “qırmızı xəttimiz” bəllidir - Azərbaycanın suveren əraziləri ilə bağlı hər hansı bir iddia mümkünsüzdür. Qarabağ Azərbaycanın ayrılmaz hissəsidir və bunu həm Ermənistan, həm onun havadarları, həm də qondarma rejim nümayəndələri birmənalı şəkildə dərk etməlidir. Qarabağda yaşayan ermənilər isə Azərbaycan vətəndaşlarıdır. Onların Azərbaycan cəmiyyətinə inteqrasiyadan başqa çıxış yolları yoxdur. Azərbaycan qanunları, Azərbaycanın ərazi bütövlüyü çərçivəsində yaşamaq istəyənlər vətəndaş olaraq ölkəmizdə yaşaya bilərlər. Digər tərəfdən, Ermənistanın qondarma separatçı quruma “yardımları” da fiaskoya məhkumdur - Azərbaycanın daxili işi olan Qarabağa hər hansı bir dövlətin müdaxiləsi yolverilməz və qəbulolunmazdır.

Beynəlxalq sənədlərdə tanınan hüquq...

Əks halda, sülh tərəfdarı kimi çıxış edən Azərbaycan beynəlxalq sənədlərlə nizamlanan hüquqlarından istifadə edə bilər. Sülh prosesinə sadiqlik nümayiş etdirən Azərbaycan BMT nizamnaməsinin 51-ci maddəsi ilə tanınan hüququndan hələlik istifadə etmir. Bəlli olduğu kimi, BMT nizamnaməsinin 51-ci maddəsində göstərilir ki, quruma üzv olan hər bir ölkə öz ərazi bütövlüyünü bərpa etmək hüququna malikdir. Azərbaycan da BMT üzvü olaraq tam bu hüquqa malikdir. Və ən əsası Azərbaycanın buna həm hərbi gücü, həm də qətiyyəti çatır.

SADİQ

Paylaş:

Baxılıb: 221 dəfə