Düzgün seçim edin!

Bakı:

18 °C

63 %

4 m/s

Əlaqə

AZ RU EN

Ana səhifə / Sosial / Düzgün seçim edin!

Düzgün seçim edin!

05.07.2025 [08:11]

Qeyri-çimərlik ərazilər can alır...

Yay mövsümünü kiçikdən-böyüyə hər kəs səbirsizliklə gözləyir. Xüsusilə, bu aylarda insanlar istirahətə önəm verir, isti havalarda dənizə girərək sərinlənir və çimərliklərdə asudə vaxt keçirirlər. Lakin əyləncə və istirahətimizin xoş bitməsi üçün təhlükəsizliyimiz çox önəmlidir. Buna görə nəzarətsiz çimərliklərdən istifadə etməməli, eyni zamanda dəniz suyunda mikrobioloji çirklənmə səviyyəsi yüksək olan ərazilərə üz tutmamalıyıq.

Əhaliyə mühüm müraciət...

Fövqəladə Hallar Nazirliyi (FHN) qeyri-çimərlik ərazilərdən istifadə ilə əlaqədar əhaliyə müraciət edib.

Sözügedən müraciətdə deyilir ki, FHN tərəfindən aparılan kütləvi maarifləndirmə işlərinə baxmayaraq, yenə də bəzi vətəndaşlar, o cümlədən, uşaq və yeniyetmələr tərəfindən çimərlik kimi nəzərdə tutulmayan kanal, çay, arx, süni göl və digər su hövzələrindən çimərlik kimi istifadə faktlarına rast gəlinir. Bu da bir sıra hallarda acı nəticələrə gətirib çıxarır. Belə ki, yalnız son 2 həftə ərzində bu kimi qeyri-çimərlik ərazilərdə 7 nəfərin batması faktı qeydə alınıb.

Təhlükə yaradan hallar

Nəzərə alınmalıdır ki, çimərlik üçün nəzərdə tutulmayan kanal, arx, çay, göl və digər su hövzələrinin təhlükəli sualtı relyefə, sürətli axına, qeyri-müəyyən dərinliyə, məhdud görüntü və digər təhlükəli xüsusiyyətlərə malik olması həmin hövzələrdən yayda sərinləmək məqsədilə istifadə zamanı həyat və sağlamlıq üçün ciddi təhlükə yaradır.

FHN nələri tövsiyə edir?

Qeyd olunanlarla bağlı FHN bir daha əhaliyə, xüsusilə, valideynlərə müraciət edərək, uşaq və yeniyetmələrin nəzarətsiz qoyulmamasına, müvafiq təhlükəsizlik qaydalarına ciddi əməl edilməsinə və çimərlik kimi nəzərdə tutulmayan su hövzələrindən istifadə olunmamasına çağırır.

Ölümlərin 98 faizindən çoxu nəzarətsiz çimərliklərdə baş verir

Mövzu barədə fikirlərini “Yeni Azərbaycan”la bölüşən təhlükəsizlik məsələləri üzrə ekspert Elmar Nurəliyev bildirib ki, çimərlik mövsümü başlamadan əvvəl müvafiq qurumlar dəniz sahillərində monitorinq aparırlar: “Hər il bu çimərliklərin siyahısı kütləvi informasiya vasitələrində dərc olunur. İcazəsiz fəaliyyət göstərən çimərliklər insan həyatı üçün risklidir. Vətəndaşlar yalnız icazə verilmiş çimərliklərə üz tutmalıdır. Çünki bu ərazilərdə xilasetmə xidməti mövcuddur və çimmək daha təhlükəsiz sayılır. FHN-in tabeliyində olan Kiçikhəcmli Gəmilərə Nəzarət və Sularda Xilasetmə Dövlət Xidmətinin məlumatına əsasən, onların nəzarətində olan ərazilərdə indiyədək bir nəfər belə boğulma halı qeydə alınmayıb. Əlverişsiz hava şəraitində və ya sərxoş vəziyyətdə çimərliyə getmək təhlükəlidir. Əgər küləyin sürəti saniyədə 10-12 metrə çatarsa, dənizə getmək planı təxirə salınmalıdır. Çünki dünya statistikası göstərir ki, boğulma hallarının 70 faizindən çoxu məhz hava şəraiti ilə əlaqəlidir. Bütün ölkələrdə çimərliklərdə təhlükəsizliyi təmin etmək məqsədilə tədbirlər gücləndirilir. Hər il dünya üzrə 400 minə yaxın insan suda boğularaq həyatını itirir. Bu ölümlərin 98 faizindən çoxu qeyri-rəsmi, nəzarətsiz çimərliklərdə baş verir”.

Ekspert əlavə edib ki, çimərlik sahəsi olan istənilən istirahət məkanında xilasetmə xidməti mütləq şəkildə fəaliyyət göstərməlidir: “Çimərliyin dövlətə və ya özəl şəxsə aid olması önəmli deyil. Hər iki halda sahilboyu ərazisi 100 metr olan çimərliklərdə ən azı bir, 200 metrlik sahələrdə isə iki xilasetmə heyəti fəaliyyət göstərməlidir. Təbii ki, bu xilasetmə xidmətinin sertifikasiyası da olmalıdır. Onlar ilkin tibbi yardım və xilasetmə üzrə təlimlərə qatılır, kifayət qədər təcrübəyə malik olurlar. Çimərlik sahibləri ərazidə təhlükəsizlik qaydalarını əks etdirən məlumat lövhələri yerləşdirməlidirlər. Eyni zamanda, üzmə sərhədlərini göstərən nişanlar quraşdırılmalıdır”.

Qeyd edək ki, paytaxtın Şıx, Görədil, Novxanı, Buzovna, Pirşağı və Sahil qəsəbələrində baxımsız sahilyanı ərazilərdə yaradılan pulsuz ictimai çimərliklərdə təmizlik, abadlıq və digər hazırlıq işləri başa çatdırılıb və bu məkanlar çimərlik mövsümünə tam hazır vəziyyətə gətirilib. Hazırda FHN-in Kiçikhəcmli Gəmilərə Nəzarət və Sularda Xilasetmə Dövlət Xidməti, ümumilikdə, 75 çimərliyə nəzarət edir. Çimərlik mövsümü sentyabrın 15-də başa çatacaq.

Yeganə BAYRAMOVA

Paylaş:

Baxılıb: 370 dəfə