Səbail rayonunda Çernobıl əlilləri hər cür qayğı ilə əhatə olunublar

Bakı:

25 °C

46 %

8 m/s

Əlaqə

AZ RU EN

Ana səhifə / Sosial / Səbail rayonunda Çernobıl əlilləri hər cür qayğı ilə əhatə olunublar

Səbail rayonunda Çernobıl əlilləri hər cür qayğı ilə əhatə olunublar

26.04.2014 [11:54]

Hər il aprel aynın 26-da MDB dövlətlərində, həmçinin Şərqi Avropanın bir sıra ölkələrində Çernobıl Atom Elektrik Stansiyasının 4-cü blokunda baş vermiş və XX əsrin ən dəhşətli qəzalarından sayılan faciənin ildönümü qeyd olunur.
Səbail rayon İcra Hakimiyyətindən AzərTAc-a bildiriblər ki, bəşəriyyət üçün ən dəhşətli texnogen faciələrdən biri olan Çernobıl qəzasının ildönümü ilə bağlı aprelin 25-də rayon rəhbərliyinin qəzanın aradan qaldırılmasının iştirakçıları olmuş rayon sakinləri ilə görüşü keçirilib.
Mərasimdə çıxış edən Səbail rayon İcra Hakimiyyətinin başçısı Asif Əsgərov bildirib ki, bu dəhşətli qəza bütün dünyada əks-səda doğurub. Hadisə nəticəsində 7 min insan həlak olub, 25 min insan güclü radiasiyaya məruz qalaraq ömürlük şikəst qalıb. Ukrayna və Belarusda 300 min nəfər öz yaşayış yerlərini tərk edib, İkinci Dünya müharibəsi illərində Yaponiyanın Xirosima və Naqasaki şəhərlərinə atılmış atom bombalarının fəsadlarına bərabər tutulan bu qəzanın nəticələrinin aradan qaldırılması üçün o dövrdə analoqu olmayan “Sarqofaq” əməliyyatına keçmiş SSRİ-nin bütün respublikalarından minlərlə insan cəlb olunub. 1986-cı ildə keçmiş SSRİ-nin digər respublikalarının nümayəndələri ilə birlikdə, Azərbaycandan da 7 mindən çox insan bu qəzanın aradan qaldırılması üçün Çernobıla yola düşüb.
Təhlükəli və ağır şəraitdə işləmək iştirakçıların əksəriyyətinin səhhətinə ciddi təsir göstərib. Onların bir çoxu normadan artıq şüalanmaya məruz qalıb, səhhətlərinə ciddi ziyan dəyib. Hadisədən artıq 28 il keçməsinə baxmayaraq bir çox iştirakçılar bu gün də əziyyət çəkirlər.
Vurğulanıb ki, Çernobıl qəzası zamanı əlil olmuş vətəndaşların vəziyyətini çox gözəl bilən Ümummilli lider Heydər Əliyev ikinci dəfə hakimiyyətə qayıtdıqdan az sonra, 1993-cü ilin sonlarında bu qəzanın ləğvində iştirak etmiş və həmin qəzadan zərər çəkmiş vətəndaşların statusu və sosial müdafiəsi haqqında xüsusi Sərəncam imzalayıb və bununla da Çernobıl əlillərinə diqqət və qayğı artıb. Çernobıl qəzasının aradan qaldırılmasında iştirak edən şəxslərə olan dövlət qayğısı, onların pensiya və müavinətləri Prezident İlham Əliyevin səyləri nəticəsində artırılıb. Hazırda əlillərin keyfiyyətli müalicəsi üçün müvafiq tədbirlər həyata keçirilir.
Prezident İlham Əliyevin tapşırıqlarına uyğun olaraq respublikamızda radiasiya şüalanmasından əziyyət çəkən vətəndaşlar üçün Mingəçevir şəhərində xüsusiləşdirilmiş müalicə mərkəzinin yaradılması və Bakı şəhərində çernobılçular üçün yaşayış binasının tikintisi minnətdarlıqla qarşılanıb.
Tədbirin sonunda Çernobıl əlillərinə maddi yardım və ərzaq bağlamaları təqdim olunub.

Paylaş:

Baxılıb: 1148 dəfə