Azərbaycanda “Eko rəsm gündəliyi-2014” Beynəlxalq müsabiqəsinin milli mərhələsi başlanıb

Bakı:

11 °C

87 %

7 m/s

Əlaqə

AZ RU EN

Ana səhifə / Sosial / Azərbaycanda “Eko rəsm gündəliyi-2014” Beynəlxalq müsabiqəsinin milli mərhələsi başlanıb

Azərbaycanda “Eko rəsm gündəliyi-2014” Beynəlxalq müsabiqəsinin milli mərhələsi başlanıb

10.09.2014 [09:53]

Azərbaycan məktəbliləri arasında “Eko rəsm gündəliyi-2014” (“Eco Picture Diary 2014”) Beynəlxalq müsabiqəsinin milli mərhələsi başlanıb.
AzərTAc xəbər verir ki, bu münasibətlə sentyabrın 9-da Gəncə şəhərindəki Heydər Əliyev Mərkəzində yarışmanın elan olunması ilə bağlı tədbir keçirilib.
Tədbiri giriş sözü ilə Gəncə şəhər İcra Hakimiyyəti başçısının humanitar məsələlər üzrə müavini Sevda Qurbanəliyeva açaraq layihənin əhəmiyyətindən danışıb.
Sonra Bakı şəhərindəki Heydər Əliyev Mərkəzinin, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin və Yaponiyanın “Panasonic” şirkətinin MDB üzrə nümayəndələri çıxış edərək həyata keçirilən bu beynəlxalq layihədə Azərbaycan məktəblilərinin uğurlu iştirakından danışıblar və builki müsabiqənin şərtləri barədə ətraflı məlumat veriblər.
Qeyd edilib ki, Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Azərbaycan 2013-cü ildən bu müsabiqəyə qoşulub. Yerli məktəblilər UNESCO-nun himayəsi altında, Heydər Əliyev Mərkəzinin, Azərbaycan Respublikası Təhsil Nazirliyinin və “Panasonic Marketinq MDB”-nin dəstəyi ilə bu yarışmada iştirak edirlər.
Gənc nəsil arasında ekoloji mədəniyyətin təbliği, ətraf mühitə daha diqqətli və qayğıkeş münasibətin, təbiətin və insan sağlamlığının qorunması üzrə fəal vətəndaş mövqeyinin formalaşdırılması və ekoloji problemlərin həllinə yönələn fəaliyyətə uşaqların cəlb olunması məqsədilə həyata keçirilən layihənin təqdimatı zamanı qeyd edilib ki, müsabiqə Bakı və Gəncə şəhərlərini əhatə edir. Sentyabrın 15-16-da şagirdlərə 5000 ədəd xüsusi “Eko Gündəlik” paylanacaq.
Müsabiqədə ümumtəhsil məktəblərinin aşağı (6-11 yaş arası) və orta (12-15 yaş arası) yaş qruplarını təmsil edən şagirdlər iştirak edəcəklər. İştirakçılar 3 gün ərzində “Eko Gündəlik”də ekologiyaya dair rəsm çəkməli və onun ideyasının qısa təsvirini mətndə əks etdirməklə sentyabrın 25-dək təhvil verməlidirlər.
Tədbirdə o da bildirilib ki, təqdim edilən “Eko Gündəlik”ləri İDEA İctimai Birliyinin, Heydər Əliyev Mərkəzinin, Təhsil Nazirliyinin, Ekologiya və Təbii Sərvətlər Nazirliyinin, UNESCO-nun, “Panasonic Marketinq MDB”-nin, KİV və QHT-lərin nümayəndələrindən ibarət münsiflər heyəti qiymətləndirəcək. Final mərhələsinə vəsiqə alan 20 (hər yaş qrupu üzrə 10 nəfər) nəfər mükafatlandırılacaq. Finalçılardan bir nəfər milli qalib elan olunacaq və onun “Eko Gündəliy”i beynəlxalq münsiflər heyətinə göndəriləcək. Bununla da bütün ölkələrin milli qalibləri arasında ən yaxşı “Eko Gündəlik”lər seçiləcək.
Diqqətə çatdırılıb ki, artıq 6 ildir keçirilən və 50-dən çox ölkənin iştirak etdiyi yarışmanın keçənilki milli mərhələsində 3032 məktəbli iştirak edib və Bakı Avropa Liseyinin şagirdi, 11 yaşlı Fuad Soltanov milli qalib seçilib.
Tədbirin sonunda iştirakçıları maraqlandıran suallar cavablandırılıb.

Paylaş:

Baxılıb: 1004 dəfə